Mullaperiyar Dam | മുല്ലപ്പെരിയാര്‍ ഡാമിന്റെ സുരക്ഷ സംബന്ധിച്ച് തമിഴ് നാട് സ്വതന്ത്ര പഠനത്തിനുള്ള നടപടികള്‍ സ്വീകരിക്കുമെന്ന് കേന്ദ്ര ജല കമിഷന്റെ റിപോര്‍ട്

ഇരു സംസ്ഥാനങ്ങളും തമ്മില്‍ ധാരണയിലെത്തുന്ന വിഷയങ്ങളുടെ അടിസ്ഥാനത്തില്‍ പരിശോധനയുമായി തമിഴ്‌നാട് മുന്നോട്ടുപോകുമെന്നാണ് റിപോര്‍ടില്‍ പറയുന്നത്. അതേസമയം, സ്വതന്ത്ര സമിതിയെ വച്ചുള്ള സമഗ്ര പരിശോധനയാണ് കോടതി നിര്‍ദേശിച്ചിരുന്നത്. കേരളത്തിന് ഇതുമായി ബന്ധപ്പെട്ട് ആശങ്കകളുള്ളതിനാല്‍, പരിശോധനയ്ക്കു തമിഴ്‌നാടിനെ തന്നെ ചുമതലപ്പെടുത്തുന്നതിന് തുല്യമാവും ഇതെന്ന് വിലയിരുത്തലുകളും ഉയരുന്നുണ്ട്.

കേരളത്തിലെ പ്രളയ സാഹചര്യം കണക്കിലെടുത്ത് മുല്ലപ്പെരിയാര്‍ ഡാം തുറക്കുന്നതു സംബന്ധിച്ച വിവരം മുന്‍കൂര്‍ അറിയിക്കുന്ന കാര്യത്തില്‍ സാങ്കേതിക തടസ്സങ്ങളുണ്ടെന്നും റിപോര്‍ടില്‍ പരാമര്‍ശിക്കുന്നുണ്ട്. ഇതിനു താല്‍കാലിക പരിഹാരം കാണാനാണ് നിലവില്‍ തീരുമാനമെന്നും റിപോര്‍ടില്‍ പറയുന്നു.

വള്ളക്കടവ് മുല്ലപ്പെരിയാര്‍ ഗാട്ട് റോഡ് അറ്റകുറ്റപ്പണി നടത്തി ശക്തിപ്പെടുത്തുന്ന വിഷയത്തില്‍ കേരളം സഹകരിക്കുന്നില്ലെന്ന പരാതിക്കും പരിഹാരമായെന്നാണ് സൂചന. നിര്‍മാണത്തിനുള്ള എസ്റ്റിമേറ്റ് കേരളത്തിന്റെ വനം വകുപ്പ് തമിഴ്‌നാടിനു കൈമാറും. അവര്‍ തുക നല്‍കുന്ന മുറയ്ക്ക് കേരളം നിര്‍മാണത്തിലേക്കു കടക്കും.

അതേസമയം, ബേബി, എര്‍ത് ഡാമുകളിലെ 15 മരങ്ങള്‍ മുറിച്ചുനീക്കുന്ന കാര്യത്തില്‍ ഇതുവരെ തീര്‍പ്പായില്ല. കേരളം ഇനിയും അനുമതി നല്‍കിയിട്ടില്ലെന്ന് റിപോര്‍ട് ചൂണ്ടിക്കാട്ടുന്നു. പ്രശ്‌നത്തിനു പരിഹാരം കാണാന്‍ സമിതി ഇരു ചീഫ് സെക്രടറിമാരോടും നിര്‍ദേശിച്ചു.