സുവ നിയമം: വെള്ളിയാഴ്ചക്കകം സത്യവാങ്മൂലം നല്‍കാന്‍ സുപ്രീംകോടതിയുടെ നിര്‍ദേശം

ഡെല്‍ഹി: കടല്‍ക്കൊല കേസില്‍ നാവികര്‍ക്കുമേല്‍ സുവ നിയമം ചുമത്തുന്ന കാര്യം സംബന്ധിച്ച് വെള്ളിയാഴ്ചയ്ക്കകം സത്യവാങ്മൂലം നല്‍കാന്‍ കേന്ദ്ര സര്‍ക്കാരിന് സുപ്രീംകോടതിയുടെ നിര്‍ദേശം. അതേസമയം ഇതുസംബന്ധിച്ചുള്ള കാര്യം നിയമമന്ത്രാലയത്തിന്റെ പരിഗണനയിലാണെന്ന് അറ്റോര്‍ണി ജനറല്‍ കോടതിയെ അറിയിച്ചു.

കേസ് തിങ്കളാഴ്ച വീണ്ടും പരിഗണിക്കും. നാവികര്‍ക്ക് വധശിക്ഷ നല്‍കാന്‍ പാടില്ലെന്ന് ഇറ്റലി ഇന്ത്യയെ അറിയിച്ചിരുന്നു. നാവികരെ കേസില്‍ നിന്നും ഒഴിവാക്കണമെന്നും ഇറ്റലി ആവശ്യപ്പെട്ടിരുന്നു.

കടല്‍കൊള്ളക്കാരോ തീവ്രവാദികളോ അല്ലാത്തതിനാല്‍ സുവ പോലുള്ള കടുത്ത നടപടികള്‍ നാവികര്‍ക്കെതിരെ ചുമത്തരുതെന്നുമാണ് ഇറ്റലിയുടെ ആവശ്യം. നാവികരെ  വിട്ടയക്കണമെന്ന ഇറ്റലിയുടെ ഹര്‍ജിയിലാണ് സുപ്രീംകോടതിയുടെ നിര്‍ദ്ദേശം.

കേന്ദ്രത്തിന് അന്ത്യശാസനം നല്‍കിയ സുപ്രീംകോടതി വിധിയെ ഇറ്റാലിയന്‍ പ്രതിനിധി സ്‌റ്റെഫാന്‍ ഡി മിസ്തുര സ്വാഗതം ചെയ്തു. അതേസമയം കേസ് മാറ്റിവെച്ചതില്‍ ഇറ്റലി നിരാശ പ്രകടിപ്പിച്ചു.

സുവ നിയമത്തിലെ വധശിക്ഷ ഒഴിവാക്കിയ കാര്യം കേന്ദ്രം
സുപ്രീംകോടതിയെ അറിയിച്ചിരുന്നു. ഇറ്റലിയുടെയും യൂറോപ്യന്‍ യൂണിയന്റെയും ശക്തമായ എതിര്‍പ്പിനെ തുടര്‍ന്നാണ് സുവ നിയമത്തിലെ വധശിക്ഷ ഉറപ്പാക്കുന്ന വകുപ്പുകള്‍ കേന്ദ്രസര്‍ക്കാര്‍ ഒഴിവാക്കിയത്.