SC Judgment | മുതിർന്നവരുടെ ജയിലിൽ പ്രായപൂർത്തിയാകാത്തവരെ പാർപിക്കുന്നത് അവരുടെ സ്വാതന്ത്ര്യം ഹനിക്കുന്നതിന് തുല്യമാണെന്ന് സുപ്രീം കോടതി

ന്യൂഡെൽഹി: (www.kvartha.com) മുതിർന്നവരുടെ ജയിലിൽ പ്രായപൂർത്തിയാകാത്തവരെ പാർപിക്കുന്നത് അവരുടെ വ്യക്തി സ്വാതന്ത്ര്യം ഹനിക്കുന്നതിന് തുല്യമാണെന്ന് സുപ്രീം കോടതി. ജസ്‌റ്റിസ് ദിനേശ് മഹേശ്വരി, ജസ്‌റ്റിസ് ജെ ബി പർദിവാല എന്നിവരടങ്ങിയ ബെഞ്ചാണ്, 1982ലെ കൊലപാതകക്കേസിൽ ജീവപര്യന്തം തടവിന് ശിക്ഷിക്കപ്പെട്ട പ്രതികളിലൊരാളുടെ ഹരജി പരിഗണിക്കവെ ഈ നിരീക്ഷണം നടത്തിയത്.         
                    
കുറ്റകൃത്യം നടന്ന തീയതി പ്രകാരം തന്റെ കൃത്യമായ പ്രായം പരിശോധിക്കാൻ ഉത്തർപ്രദേശ് സർകാരിന് നിർദേശം നൽകണമെന്നായിരുന്നു ഹർജിയിലെ ആവശ്യം. ജീവപര്യന്തം തടവ് ശിക്ഷ സുപ്രീം കോടതി ശരിവെച്ചതിന് പിന്നാലെയാണ് കുറ്റവാളി പ്രായം പരിശോധിക്കണമെന്ന ഹർജി നൽകിയത്. നേരത്തെ അലഹബാദ് ഹൈകോടതി നൽകിയ വിധിയുടെ അടിസ്ഥാനത്തിൽ സംസ്ഥാനം രൂപീകരിച്ച മെഡികൽ ബോർഡ് അദ്ദേഹത്തെ വൈദ്യപരിശോധനയ്ക്ക് വിധേയനാക്കിയിരുന്നു.

1982 സെപ്‌റ്റംബർ 10-ന് കുറ്റം ആരോപിക്കപ്പെടുന്ന തീയതിയിൽ കുറ്റവാളിയുടെ പ്രായം ഏകദേശം 15 വയസ് ആണെന്ന് സാക്ഷ്യപ്പെടുത്തി മെഡികൽ ബോർഡ് റിപോർട് സമർപിച്ചു. കുടുംബ രജിസ്റ്ററിന്റെയും മറ്റ് രേഖകളുടെയും അടിസ്ഥാനത്തിൽ, 1982-ൽ ആരോപിക്കപ്പെടുന്ന കുറ്റകൃത്യം നടന്ന ദിവസം താൻ പ്രായപൂർത്തിയാകാത്ത ആളാണെന്നും വിചാരണയിലെ മറ്റ് കൂട്ടുപ്രതികൾക്കൊപ്പം വിചാരണ ചെയ്യപ്പെടേണ്ടതില്ലെന്നും യുവാവ് സുപ്രീം കോടതിയിൽ വാദിച്ചു.

കുടുംബ രജിസ്റ്ററിന്റെ ആധികാരികത പരിശോധിക്കാൻ സെഷൻസ് കോടതിയോട് സുപ്രീം കോടതി ബെഞ്ച് നിർദേശിച്ചു. 'പ്രായപൂർത്തിയായവരുടെ ജയിലിൽ പ്രായപൂർത്തിയാകാത്തയാളെ തടങ്കലിൽ വയ്ക്കുന്നത് പല വശങ്ങളിലും അയാളുടെ വ്യക്തിസ്വാതന്ത്ര്യം ഇല്ലാതാക്കുന്നതിന് തുല്യമാണെന്ന് പറയുന്നതിൽ തെറ്റില്ല', ബെഞ്ച് പറഞ്ഞു. പ്രായം നിർണയിക്കാനോ മറ്റേതെങ്കിലും ആധുനിക അംഗീകൃത രീതിക്കോ വേണ്ടിയുള്ള ഓസിഫികേഷൻ ടെസ്റ്റിലൂടെയോ പ്രതിയുടെ വൈദ്യപരിശോധന നടത്തി ഒരു മാസത്തിനകം റിപോർട് സമർപിക്കണമെന്ന് സെഷൻസ് കോടതിയോട് സുപ്രീം കോടതി ആവശ്യപ്പെട്ടു. < !- START disable copy paste -->