സർസംഘചാലക് ഡോ. മോഹൻ ഭാഗവതിൻ്റെയും സർകാര്യവാഹ് ദത്താത്രേയ ഹൊസബാളെയുടെയും സാന്നിധ്യത്തിൽ ആർഎസ്എസ് അഖില ഭാരതീയ കാര്യകാരി മണ്ഡൽ ബൈഠക്കിന് ജബൽപൂരിൽ തുടക്കം; സംഘശതാബ്ദി ഒരുക്കങ്ങൾ ചർച്ചാവിഷയം

ജബൽപൂർ (മധ്യപ്രദേശ്): (KVARTHA) ആർഎസ്എസ് അഖില ഭാരതീയ കാര്യകാരി മണ്ഡൽ ബൈഠക്കിന് ജബൽപൂരിലെ കച്‌നാർ സിറ്റിയിൽ തുടക്കമായി. സർസംഘചാലക് ഡോ. മോഹൻ ഭാഗവതും സർകാര്യവാഹ് ദത്താത്രേയ ഹൊസബാളെയും ഭാരതമാതാപ്രതിമയിൽ പുഷ്പാർച്ചന നടത്തിക്കൊണ്ടാണ് യോഗം ഉദ്ഘാടനം ചെയ്തത്.

സഹസർകാര്യവാഹുമാരായ ഡോ. കൃഷ്ണ ഗോപാൽ, സി.ആർ. മുകുന്ദ, അരുൺ കുമാർ, രാംദത്ത് ചക്രധർ, അലോക് കുമാർ, അതുൽ ലിമായെ, കാര്യകാരി അംഗങ്ങൾ, ക്ഷേത്രീയ, പ്രാന്തീയ സംഘചാലകന്മാർ, കാര്യവാഹുമാർ, പ്രചാരകർ എന്നിവരാണ് മൂന്ന് ദിവസത്തെ ബൈഠക്കിൽ പങ്കെടുക്കുന്നത്.

അനുശോചനം രേഖപ്പെടുത്തി

ആദ്യം പഹൽഗാമിൽ ബലിദാനികളായവർക്ക് യോഗം ആദരാഞ്ജലി രേഖപ്പെടുത്തി. തുടർന്ന് സമീപകാലത്ത് അന്തരിച്ച പ്രമുഖർക്ക് അനുശോചനം രേഖപ്പെടുത്തിക്കൊണ്ടുള്ള പ്രസ്താവനയും ഉണ്ടായി.

രാഷ്ട്ര സേവിക സമിതിയുടെ മുൻ പ്രമുഖ് സഞ്ചാലിക പ്രമീള തായ് മേഢെ, മുതിർന്ന പ്രചാരകൻ മധുഭായ് കുൽക്കർണി, കേരള മുൻ മുഖ്യമന്ത്രി വി.എസ്. അച്യുതാനന്ദൻ, പ്രൊഫ. എം.കെ. സാനു, ഗുജറാത്ത് മുൻ മുഖ്യമന്ത്രി വിജയ് രൂപാണി, ഝാർഖണ്ഡ് മുൻ മുഖ്യമന്ത്രി ഷിബു സോറൻ, ദൽഹി മുൻ മുഖ്യമന്ത്രി വിജയ് മൽഹോത്ര, മുതിർന്ന ശാസ്ത്രജ്ഞൻ കസ്തൂരിരംഗൻ, മുൻ ഗവർണർ എൽ. ഗണേശൻ, ഗാനരചയിതാവ് പിയൂഷ് പാണ്ഡെ, ചലച്ചിത്ര നടന്മാരായ സതീഷ് ഷാ, പങ്കജ് ധീർ, അസ്രാനി, ആസാമീസ് സംഗീതജ്ഞൻ സുബിൻ ഗാർഗ് എന്നിവരാണ് അനുശോചനം രേഖപ്പെടുത്തിയ പ്രമുഖർ.

സേവന പ്രവർത്തനങ്ങൾ ചർച്ചാവിഷയമായി

രാജ്യത്തിൻ്റെ വിവിധ ഭാഗങ്ങളിൽ സ്വയംസേവകരുടെ നേതൃത്വത്തിൽ നടന്ന സേവനപ്രവർത്തനങ്ങൾ ബൈഠക്കിൽ വിശദമായി അവതരിപ്പിച്ചു. പ്രവർത്തനങ്ങൾ കൂടുതൽ വ്യാപിപ്പിക്കാനുള്ള മാർഗ്ഗങ്ങളും ചർച്ച ചെയ്തു.

പ്രധാന വാർഷികങ്ങൾ

മൂന്ന് ദിവസത്തെ ബൈഠക്കിൽ സുപ്രധാനമായ മൂന്ന് വാർഷികങ്ങൾ സംബന്ധിച്ച് പ്രസ്താവനകൾ ഉണ്ടാകും. ഗുരു തേഗ്ബഹാദൂറിൻ്റെ 350-ാം ബലിദാന വാർഷികം, വീര ബിർസ മുണ്ടയുടെ 150-ാം ജന്മവാർഷികം, വന്ദേമാതരം രചിച്ചതിൻ്റെ 150-ാം വാർഷികം എന്നിവയാണ് ചർച്ച ചെയ്യുന്ന പ്രധാന വിഷയങ്ങൾ.

സംഘശതാബ്ദി ഒരുക്കങ്ങൾ

സംഘശതാബ്ദി പ്രവർത്തനങ്ങളുടെ ഭാഗമായി നടപ്പിലാക്കാനുദ്ദേശിക്കുന്ന പദ്ധതികളുടെ തയാറെടുപ്പുകൾ യോഗം വിലയിരുത്തും. 'ഹർ ഘർ സമ്പര്‍ക്കം', 'ഹിന്ദു സമ്മേളനങ്ങൾ', 'സദ്ഭാവ് യോഗങ്ങൾ', 'പൗരപ്രമുഖരുടെ പൊതു സിമ്പോസിയങ്ങൾ' എന്നിവയുടെ പുരോഗതിയാണ് വിലയിരുത്തുക. 

കൂടാതെ, ഈ വർഷത്തെ വിജയദശമി ആഘോഷങ്ങളും നിലവിലെ രാജ്യത്തെ സാഹചര്യങ്ങളും ബൈഠക്കിൽ പ്രധാന ചർച്ചാവിഷയമാകും.

ഈ വാർത്തയെക്കുറിച്ചുള്ള നിങ്ങളുടെ അഭിപ്രായങ്ങൾ പങ്കുവെക്കുക. 

Article Summary: RSS Karyakari Mandal meeting in Jabalpur discusses service, anniversaries, and centenary plans.

#RSS #Jabalpur #MohanBhagwat #DattatreyaHosabale #Sangh #KaryakariMandal