ആന്റണിയുടെ ഭാര്യ വരച്ച ചിത്രം എയര്‍പോര്‍ട്ട് അതോറിറ്റി 28 കോടിക്ക് വാങ്ങി

ന്യൂഡല്‍ഹി: പ്രതിരോധമന്ത്രി എ.കെ ആന്റണിയുടെ ഭാര്യ എലിസബത്ത് വരച്ച ചിത്രം 28 കോടി രൂപയ്ക്ക് എയര്‍പോര്‍ട്ട് അതോറിറ്റി ഓഫ് ഇന്ത്യ വാങ്ങി. പ്രമുഖ ദൈ്വവാരികയായ ഇന്ത്യാ ടുഡേയാണ് അവരുടെ വെബ്‌സൈറ്റില്‍ ഈ റിപ്പോര്‍ട്ട് പുറത്തുവിട്ടിരിക്കുന്നത്. എട്ട് ചിത്രങ്ങളാണ് എലിസബത്തില്‍ നിന്നും എയര്‍പോര്‍ട്ട് അതോറിറ്റി വിലയ്ക്ക് വാങ്ങിയത്. ചിത്രങ്ങള്‍ രാജ്യത്തെ തിരഞ്ഞെടുത്ത വിമാനത്താവളങ്ങളിലാണ് വെയ്ക്കുക.

 ചിത്രത്തിന്റെ വില സംബന്ധിച്ച വിവരം എയര്‍പോര്‍ട്ട് അതോറിറ്റിയോ, എലിസബത്തോ പുറത്തുവിടാന്‍ തയ്യാറായില്ല. ചിത്രങ്ങള്‍ എയര്‍പോര്‍ട്ട് അതോറിറ്റി വാങ്ങിയതായി എലിസബത്ത് സ്ഥിരീകരിച്ചതായി ഇന്ത്യാ ടുഡേ വെളിപ്പെടുത്തുന്നു. എയര്‍പോര്‍ട്ട് അതോറിറ്റി ഉന്നത വൃത്തങ്ങളില്‍ നിന്നും ലഭിച്ച വിവരത്തിലാണ് 28 കോടി രൂപയ്ക്കാണ് പെയ്ന്റിംഗ് വാങ്ങിയതെന്ന വിവരം ലഭിച്ചത്. ചിത്രങ്ങളില്‍ രണ്ടെണ്ണം തിരുവനന്തപുരം അന്താരാഷ്ട്ര വിമാനത്താവളത്തില്‍ ഇതിനകം വെച്ചിട്ടുണ്ട്. തിബ് മെഹ്തയുടെ സെലിബ്രേഷനാണ് ഇന്ത്യന്‍ ചിത്രകലയില്‍ 1.5 കോടി രൂപവില നേടുന്ന ആദ്യ ആധുനിക ചിത്രമായി കണക്കാക്കുന്നത്.