March | 'ഞങ്ങൾക്ക് വധുവിനെ വേണം'; പ്രതിഷേധ മാർച്ച് നടത്തി അവിവാഹിതരായ യുവാക്കൾ; പെണ്ണ് കിട്ടാത്തതിന് പിന്നിൽ സർക്കാരെന്ന് വിമർശനം

സോളാപൂർ: (www.kvartha.com) മഹാരാഷ്ട്രയിലെ സോലാപൂർ ജില്ലയിൽ തങ്ങൾക്ക് വധുക്കളെ തേടി അവിവാഹിതരായ യുവാക്കൾ നടത്തിയ മാർച്ച് കൗതുകകരമായി. രാജ്യത്തിന്റെ പല ഭാഗങ്ങളിലും ആൺ-പെൺ അനുപാതം താളം തെറ്റിയത് മൂലം യുവാക്കളുടെയും യുവതികളുടെയും വിവാഹം നടക്കാത്ത സ്ഥിതി വിശേഷമുണ്ട്. ഈ പശ്ചാത്തലത്തിലാണ് സോളാപൂരിലെ ജ്യോതി ക്രാന്തി പരിഷത്ത് എന്ന സംഘടന അവിവാഹിതരുടെ മാർച്ച് നടത്തിയത്.
           
നിരവധി യുവാക്കൾ വിവാഹ വേഷങ്ങൾ ധരിച്ച്, കുതിരപ്പുറത്ത് കയറി, ബാൻഡ് വാദ്യത്തിന്റെ അകമ്പടിയോടെ കലക്ടറുടെ ഓഫീസിലെത്തി തങ്ങൾക്ക് വധുക്കളെ ആവശ്യപ്പെട്ട് നിവേദനം നൽകി. മഹാരാഷ്ട്രയിലെ ലിംഗാനുപാതം മെച്ചപ്പെടുത്തുന്നതിന് പ്രീ-കൺസെപ്ഷൻ ആൻഡ് പ്രീ-നാറ്റൽ ഡയഗ്നോസ്റ്റിക് ടെക്നിക്‌സ് (PCPNDT) നിയമം കർശനമായി നടപ്പാക്കണമെന്നും നിവേദനത്തിൽ ആവശ്യപ്പെടുന്നു.

'ആളുകൾ ഈ മാർച്ചിനെ പരിഹസിച്ചേക്കാം, എന്നാൽ സംസ്ഥാനത്ത് ആൺ-പെൺ അനുപാതം താളം തെറ്റിയതിനാൽ വിവാഹപ്രായമായ യുവാക്കൾക്ക് വധുക്കളെ ലഭിക്കുന്നില്ല എന്നതാണ് ഭീകരമായ യാഥാർത്ഥ്യം', ജ്യോതി ക്രാന്തി പരിഷത്ത് സ്ഥാപകൻ രമേഷ് ബരാസ്‌കർ പറഞ്ഞു. മഹാരാഷ്ട്രയിലെ ലിംഗാനുപാതം 1000 ആൺകുട്ടികൾക്ക് 889 പെൺകുട്ടികളാണ്. പെൺ ഭ്രൂണഹത്യ കാരണം ഈ അസമത്വം നിലനിൽക്കുന്നു, ഈ അസമത്വത്തിന് സർക്കാരാണ് ഉത്തരവാദിയെന്നും അദ്ദേഹം ആരോപിച്ചു.