മുംബൈ: (KVARTHA) പ്രമുഖ വ്യവസായിയും ടാറ്റ സൺസ് ചെയർമാനുമായിരുന്ന രത്തൻ ടാറ്റ (86) ഗുരുതരാവസ്ഥയിലാണെന്നും മുംബൈയിലെ ഒരു ആശുപത്രിയിലെ തീവ്രപരിചരണ വിഭാഗത്തിൽ ചികിത്സയിലാണെന്നും റോയിട്ടേഴ്‌സ് റിപ്പോർട്ട് ചെയ്തു. വിഷയത്തെക്കുറിച്ച് നേരിട്ട് അറിവുള്ള രണ്ട് ഉറവിടങ്ങളെ ഉദ്ധരിച്ചുകൊണ്ടാണ് റിപ്പോർട്ട് പുറത്തുവിട്ടത്.

ഈ ആഴ്ച ആദ്യം രത്തൻ ടാറ്റയെ ആശുപത്രിയിൽ പ്രവേശിപ്പിച്ചിരുന്നു. പ്രായവും ആരോഗ്യനിലയും കണക്കിലെടുത്ത് നടത്തുന്ന പതിവ് ആരോഗ്യ പരിശോധനയുടെ ഭാഗമായിട്ടാണെന്ന് ഇതെന്നാണ് അറിയിച്ചിരുന്നത്. എന്നാൽ പിന്നീട് അദ്ദേഹത്തിന്റെ ആരോഗ്യനില വഷളായതായി റിപ്പോർട്ടുകൾ പുറത്തുവന്നതോടെ ആശങ്ക വർദ്ധിച്ചു.

തന്റെ ആരോഗ്യനിലയെക്കുറിച്ച് പ്രചരിക്കുന്ന അഭ്യൂഹങ്ങളെ തള്ളി തിങ്കളാഴ്ച ടാറ്റ സോഷ്യൽ മീഡിയ അക്കൗണ്ടുകളിൽ പ്രസ്താവന പോസ്റ്റ് ചെയ്തിരുന്നു. താൻ ഗുരുതരാവസ്ഥയിലാണെന്നുള്ള റിപ്പോർട്ടുകൾ അടിസ്ഥാനരഹിതമാണെന്ന് വ്യക്തമാക്കിക്കൊണ്ട്, ആശങ്കപ്പെടേണ്ട സാഹചര്യവുമില്ലെന്നും അദ്ദേഹം പറഞ്ഞിരുന്നു. 

തന്റെ ആരോഗ്യനിലയെ കുറിച്ച് പതിവ് പരിശോധനകൾ നടത്താറുണ്ടെന്ന് അദ്ദേഹം പറഞ്ഞു. അതുകൊണ്ട്, തന്റെ ആരോഗ്യത്തെക്കുറിച്ച് തെറ്റായ വിവരങ്ങൾ പ്രചരിപ്പിക്കുന്നത് ഒഴിവാക്കണമെന്നും അദ്ദേഹം പൊതുജനങ്ങളോടും മാധ്യമങ്ങളോടും അഭ്യർത്ഥിച്ചിരുന്നു. ഇതിന് പിന്നാലെയാണ് പുതിയ റിപ്പോർട്ട് പുറത്തുവന്നിരിക്കുന്നത്.

ഇന്ത്യൻ വ്യവസായത്തിലെ ഏറ്റവും മികച്ച വ്യക്തിത്വങ്ങളിൽ ഒരാളായി അറിയപ്പെടുന്ന രത്തൻ ടാറ്റ 1991 മുതൽ 2012 വരെ ടാറ്റ സൺസിന്റെ ചെയർമാനായിരുന്നു. ടാറ്റ ഗ്രൂപ്പ് അദ്ദേഹത്തിന്റെ നേതൃത്വത്തിൽ ആഗോളതലത്തിൽ വളർന്നു. ടെറ്റ്ലി, കോറസ്, ജാഗ്വാർ ലാൻഡ് റോവർ തുടങ്ങിയ പ്രമുഖ കമ്പനികളെ സ്വന്തമാക്കിയതോടെ ടാറ്റ ആഗോള തലത്തിലേക്കും പടർന്നു പന്തലിക്കുകയായിരുന്നു.

ടാറ്റ ഗ്രൂപ്പ് ലോകത്തിലെ ഏറ്റവും വിലകുറഞ്ഞ കാറായ ടാറ്റ നാനോ പുറത്തിറക്കിയതോടൊപ്പം സോഫ്റ്റ്‌വെയർ സേവന വിഭാഗമായ ടാറ്റ കൺസൾട്ടൻസി സർവീസസിനെ (TCS) ആഗോള ഐടി രംഗത്തെ ഒരു മുൻനിര കമ്പനിയാക്കി വളർത്തിയെടുത്തു. 2012-ൽ ഗ്രൂപ്പിന്റെ ചെയർമാൻ സ്ഥാനം ഒഴിഞ്ഞെങ്കിലും പിന്നീട് ടാറ്റ സൺസ്, ടാറ്റ മോട്ടോഴ്‌സ്, ടാറ്റ സ്റ്റീൽ തുടങ്ങിയ നിരവധി കമ്പനികളുടെ ചെയർമാനായി തിരഞ്ഞെടുക്കപ്പെട്ടു. ഗ്രൂപ്പിനുള്ളിലെ നേതൃത്വ തർക്കങ്ങളുടെ പശ്ചാത്തലത്തിൽ 2016-ൽ ഇടക്കാല ചെയർമാനായി തിരിച്ചെത്തി.

#RatanTata #TataGroup #healthupdate #IndiaNews #businessnews