Rahul Gandhi | രാഹുല്‍ ഗാന്ധിയെ 'പപ്പു' എന്നു പരിഹസിക്കുന്നത് നിര്‍ഭാഗ്യകരം, സമര്‍ഥനായ വ്യക്തി എന്നും രഘുറാം രാജന്‍

ന്യൂഡെല്‍ഹി: (www.kvartha.com) കോണ്‍ഗ്രസ് നേതാവ് രാഹുല്‍ ഗാന്ധിയെ 'പപ്പു' എന്നു പരിഹസിക്കുന്നത് നിര്‍ഭാഗ്യകരമെന്ന് ആര്‍ബിഐ മുന്‍ ഗവര്‍ണര്‍ രഘുറാം രാജന്‍. വയനാട് എംപിയായ രാഹുല്‍ ഗാന്ധി സമര്‍ഥനായ വ്യക്തിയാണെന്നും അദ്ദേഹം പറഞ്ഞു. ദാവോസില്‍ ലോക സാമ്പത്തിക ഫോറം ഉച്ചകോടിക്കിടെ ദേശീയ മാധ്യമത്തോടു സംസാരിക്കുകയായിരുന്നു അദ്ദേഹം.


പ്രധാനമന്ത്രി നരേന്ദ്ര മോദിയുടെ നേതൃത്വത്തിലുള്ള ബിജെപി സര്‍കാരിന്റെ സാമ്പത്തിക നയങ്ങളെ വിമര്‍ശിക്കുന്നതിനെക്കുറിച്ചു ചോദിച്ചപ്പോള്‍, മന്‍മോഹന്‍ സിങ് നയിച്ച കോണ്‍ഗ്രസ് സര്‍കാരിന്റെ നയങ്ങളെയും താന്‍ വിമര്‍ശിച്ചിട്ടുണ്ട് എന്നായിരുന്നു രഘുറാം രാജന്റെ മറുപടി. ഇന്‍ഡ്യയുടെ സാമ്പത്തികരംഗം കൈകാര്യം ചെയ്യുന്ന കേന്ദ്ര ധനമന്ത്രി നിര്‍മല സീതാരാമന്റേതു കഠിനമായ ജോലിയാണെന്നും അദ്ദേഹം അഭിപ്രായപ്പെട്ടു.

'നിര്‍മല സീതാരാമന്റെ ജോലിയെ റാങ്ക് ചെയ്യാന്‍ ഞാനില്ല. അങ്ങനെ ചെയ്യുകയുമില്ല. അവര്‍ കഠിനമായ ജോലിയാണു ചെയ്യുന്നത്. രാജ്യത്തു മധ്യവര്‍ഗത്തിലെ താഴെത്തട്ടിലുള്ളവര്‍ക്ക് ആശങ്കയുണ്ട്. അവരുടെ തൊഴിലുകള്‍ നഷ്ടമാകുന്നു. പക്ഷേ, വലിയ ബിസിനസുകള്‍ നന്നായി നടക്കുന്നുണ്ട്. കിട്ടാക്കടം ബാങ്കുകള്‍ എഴുതിത്തള്ളുകയും ചെയ്തു. കോവിഡ് മഹാമാരി മധ്യവര്‍ഗത്തിലെ താഴെത്തട്ടിലുള്ളവരെയാണു മോശമായി ബാധിച്ചത്.' രഘുറാം രാജന്‍ ചൂണ്ടിക്കാട്ടി.

നേരത്തെ ഭാരത് ജോഡോ യാത്രയില്‍ രഘുറാം രാജന്‍ പങ്കെടുത്ത വാര്‍ത്ത വളരെ പ്രാധാന്യത്തോടെയാണ് മാധ്യമങ്ങള്‍ നല്‍കിയത്. രഘുറാം രാജനെ കൂടാതെ പല പ്രമുഖരും യാത്രയില്‍ പങ്കെടുത്തിരുന്നു. ജനുവരി 30 ന് യാത്ര ജമ്മു കശ്മീരില്‍ സമാപിക്കും.