ന്യൂഡൽഹി: (KVARTHA) വിരമിച്ച ശേഷമുള്ള ജീവിതം സുഖകരമാക്കാൻ കേന്ദ്ര സർക്കാർ തുടങ്ങിയ പദ്ധതിയാണ് നാഷണൽ പെൻഷൻ സ്കീം അഥവാ എൻ.പി.എസ്. ഈ പദ്ധതിയിൽ നിക്ഷേപിക്കുന്നതിലൂടെ ഒരു സുരക്ഷിതമായ ഭാവി ഉറപ്പാക്കാൻ കഴിയും. ആദ്യം സർക്കാർ ജീവനക്കാർക്കു മാത്രമായിരുന്നു ഈ പദ്ധതി. പക്ഷേ ഇപ്പോൾ എല്ലാ ഇന്ത്യക്കാരനും ഇതിൽ നിക്ഷേപിക്കാം. എന്നാൽ ഒരു പ്രവാസിക്ക് ഈ പദ്ധതിയിൽ നിക്ഷേപിക്കാൻ സാധിക്കുമോ? അതിനുള്ള നിയമങ്ങൾ എന്തൊക്കെയാണെന്ന് നോക്കാം.

പ്രവാസികൾക്കുള്ള നിയമങ്ങൾ എന്തൊക്കെയാണ്?

നിയമങ്ങൾ പ്രകാരം, മറ്റ് ഇന്ത്യൻ പൗരന്മാരെപ്പോലെ പ്രവാസികൾക്കും നാഷണൽ പെൻഷൻ സ്കീമിൽ നിക്ഷേപം നടത്തി പദ്ധതിയുടെ ആനുകൂല്യങ്ങൾ നേടാൻ സാധിക്കും. എന്നാൽ അവർക്ക് ടയർ-1 അക്കൗണ്ട് മാത്രമേ തുറക്കാൻ സാധിക്കൂ, ടയർ-2 ൽ നിക്ഷേപിക്കാൻ കഴിയില്ല. എൻപിഎസ് അക്കൗണ്ട് തുറക്കുന്നതിന് പ്രവാസികൾ നിലവിലുള്ള കെവൈസി നിയമങ്ങൾ പാലിക്കേണ്ടതുണ്ട്.

എൻപിഎസിൽ രണ്ട് തരം അക്കൗണ്ടുകൾ 

സാധാരണയായി എൻപിഎസിൽ രണ്ട് തരം അക്കൗണ്ടുകൾ ഉണ്ട്, ടയർ-1, ടയർ-2. ഏതൊരു വ്യക്തിക്കും ടിയർ-1 അക്കൗണ്ട് തുറക്കാം, എന്നാൽ ടിയർ-2 അക്കൗണ്ട് തുറക്കാൻ ടയർ-1 അക്കൗണ്ട് ഉണ്ടായിരിക്കണം. എന്നിരുന്നാലും, പ്രവാസികൾക്ക് എൻപിഎസ് ടയർ-2 അക്കൗണ്ടിൽ നിക്ഷേപിക്കുന്നത്  നിരോധിച്ചിരിക്കുന്നു. നിയമങ്ങൾ പ്രകാരം, 60 വയസ് തികഞ്ഞതിന് ശേഷം നിക്ഷേപിച്ച മൊത്തം തുകയുടെ 60% ഒറ്റത്തവണയായി എടുക്കാം. ബാക്കി 40 ശതമാനം പെൻഷൻ പദ്ധതിക്ക് വേണ്ടി ഉപയോഗിക്കാം

പ്രവാസികൾക്ക് എങ്ങനെ നിക്ഷേപിക്കാം?

എൻപിഎസിൽ നിക്ഷേപിക്കാൻ ആദ്യം ഔദ്യോഗിക വെബ്സൈറ്റിലേക്ക് (eNPS) പോകുക. നാഷണൽ പെൻഷൻ സ്കീം (എൻപിഎസ്) തിരഞ്ഞെടുത്ത് രജിസ്റ്റർ ഫോർ എൻപിഎസ് എന്ന ഓപ്ഷനിലേക്ക് പോകുക. താഴേക്ക് സ്ക്രോൾ ചെയ്ത് എൻആർഐ ഓപ്ഷൻ തിരഞ്ഞെടുത്ത് രജിസ്റ്റർ നൗ ക്ലിക്ക് ചെയ്യുക. ഇതിനുശേഷം ജനനത്തീയതി, പാൻ നമ്പർ, മൊബൈൽ നമ്പർ, ഇമെയിൽ ഐഡി തുടങ്ങിയ വിവരങ്ങൾ നൽകുക. 

തുടർന്ന് നൽകിയിരിക്കുന്ന നിർദ്ദേശങ്ങൾ പാലിച്ച് ആവശ്യമായ വിവരങ്ങൾ പൂരിപ്പിച്ച് രജിസ്ട്രേഷൻ പൂർത്തിയാക്കാം. ഇതിനു പുറമേ ഓഫ്‌ലൈനായും അക്കൗണ്ട് തുറക്കാം. ഇതിനായി ഏതെങ്കിലും പോയിന്റ് ഓഫ് പ്രസൻസിന്റെ (പിഒപി) അംഗീകൃത ശാഖയിൽ പോയി ഫോം പൂരിപ്പിച്ച് ആവശ്യമായ എല്ലാ രേഖകളും സമർപ്പിക്കേണ്ടതുണ്ട്.

ആവശ്യമായ രേഖകൾ 

അക്കൗണ്ട് തുറക്കുമ്പോൾ ആധാർ കാർഡ്, പാൻ കാർഡ്, റദ്ദാക്കിയ ചെക്ക്, പാസ്പോർട്ടിന്റെ പകർപ്പ് തുടങ്ങിയ രേഖകൾ പ്രവാസിയിൽ നിന്ന് തേടുന്നു. ഇതിനുശേഷം നിക്ഷേപകർ 500 രൂപ അടച്ചുകൊണ്ട് അക്കൗണ്ട് തുറക്കേണ്ടതുണ്ട്. വ്യക്തിയുടെ പിആർഎൻ (പെർമനന്റ് റിട്ടയർമെന്റ് അക്കൗണ്ട് നമ്പർ) നമ്പർ നൽകിയ ശേഷം 90 ദിവസത്തിനുള്ളിൽ അത് വേരിഫൈ ചെയ്യും. ഇതിനായി ഒരു ഇമെയിൽ ലഭിക്കും, അതിലൂടെ അക്കൗണ്ട് വേരിഫൈ ചെയ്യാം. ശേഷം പ്രവാസികൾക്ക് പദ്ധതിയിലേക്ക് നിക്ഷേപം ആരംഭിക്കാം.

#NPS #NRI #investment #pension #retirement #India