രാഷ്ട്രപതി തെരഞ്ഞെടുപ്പ്; 2.75 ലക്ഷത്തിന്റെ ലീഡുമായി രാംനാഥ് കോവിന്ദ് കുതിക്കുന്നു

ന്യൂഡല്‍ഹി: (www.kvartha.com 20.07.2017) രാഷ്ട്രപതി തെരഞ്ഞെടുപ്പിന്റെ വോട്ടെണ്ണല്‍ മൂന്ന് സംസ്ഥാനങ്ങളിലേത് പൂര്‍ത്തിയായപ്പോള്‍ 2.75 ലക്ഷത്തിന്റെ ലീഡുമായി ബി ജെ പിയുടെ രാഷ്ട്രപതി സ്ഥാനാര്‍ത്ഥി രാംനാഥ് കോവിന്ദ് കുതിക്കുകയാണ്. വ്യാഴാഴ്ച്ച ഉച്ചയ്ക്ക് രണ്ടരയ്ക്കുള്ള കണക്ക് അനുസരിച്ച് ലോക്‌സഭ, രാജ്യസഭ, പതിനൊന്ന് സംസ്ഥാനങ്ങള്‍ എന്നിവിടങ്ങളിലെ വോട്ടുകള്‍ എണ്ണി തീര്‍ന്നപ്പോള്‍ രാംനാഥ് കോവിന്ദിന് 4,79,585 വോട്ടുകളും മീരാ കുമാറിന് 2,04,594 വോട്ടുകളുമാണ് ലഭിച്ചത്. കോവിന്ദിന് 2,74,991 വോട്ടുകളുടെ ലീഡാണുള്ളത്. പാര്‍ലമെന്റിലെ ഇരുസഭകളില്‍ നിന്നുമായി കോവിന്ദ് 3,69,576 വോട്ടുകള്‍ നേടിയപ്പോള്‍ 1,59,300 വോട്ടുകളാണ് മീരാകുമാറിന് ലഭിച്ചത്.

പാര്‍ലമെന്റിലെ 21 വോട്ടുകള്‍ അസാധുവായപ്പോള്‍ ഛത്തീസ്ഗണ്ഡില്‍ മൂന്നും ഗോവയില്‍ രണ്ടും വോട്ടുകള്‍ അസാധുവാക്കപ്പെട്ടു. ഗോവയിലും ഗുജറാത്തിലും വോട്ടുകള്‍ മറിഞ്ഞപ്പോള്‍ അത് എന്‍ഡിഎ സ്ഥാനാര്‍ഥിക്ക് ഗുണം ചെയ്യുകയായിരുന്നു.


ആന്ധ്രപ്രദേശില്‍ നിന്നുള്ള മുഴുവന്‍ വോട്ടും സ്വന്തമാക്കിയ എന്‍ഡിഎ സ്ഥാനാര്‍ഥി രാംനാഥ് കോവിന്ദ് അരുണാചല്‍ പ്രദേശില്‍ നിന്നുള്ള 94.9 ശതമാനം വോട്ടും, അസമില്‍ നിന്നുള്ള 95.8 ശതമാനം വോട്ടും നേടിയെടുത്തു.

എന്നാല്‍ ബീഹാറില്‍ ആര്‍ജെഡി- കോണ്‍ഗ്രസ് കക്ഷികളുടെ പിന്തുണയോടെ 45.7 ശതമാനം വോട്ട് വിഹിതം മീരാകുമാര്‍ നേടിയെടുത്തു. അക്ഷരമാല ക്രമത്തിലാണ് സംസ്ഥാനങ്ങളുടെ വോട്ടുകള്‍ എണ്ണിക്കൊണ്ടിരിക്കുന്നത്.

എന്‍ഡിഎ കക്ഷികളുടെ വോട്ടുകള്‍ കൂടാതെ ജനതാദള്‍ യുണൈറ്റഡ്, ബിജു ജനതാദള്‍ എന്നിവിടങ്ങളിലെ വോട്ടുകള്‍ കൂടി എണ്ണി തീരുമ്പോള്‍ രാംനാഥ് കോവിന്ദിന്റെ വോട്ട് വിഹിതം ഏഴ് ലക്ഷത്തിലേക്ക് കടക്കുമെന്നാണ് എന്‍ഡിഎ നേതാക്കളുടെ പ്രതീക്ഷ.

Also Read: