ഭാമനാവത്ത്

ന്യൂഡൽഹി:(KVARTHA) രാജ്യം ഇന്ന് (ഏപ്രിൽ 21 തിങ്കളാഴ്ച) ദേശീയ സിവിൽ സർവീസ് ദിനമായി ആചരിക്കുന്നു. ജനസേവനം മുഖമുദ്രയാക്കി മുന്നോട്ട് പോകുന്ന സിവിൽ സർവീസ് ഉദ്യോഗസ്ഥരുടെ പ്രാധാന്യം ഓർമ്മപ്പെടുത്തുന്ന ദിനമാണിത്. 

1947 ഏപ്രിൽ 21ന് ഡൽഹിയിലെ നെറ്റ് കാൾഫ് ഹൗസിൽ ഓൾ ഇന്ത്യ അഡ്മിനിസ്ട്രേറ്റീവ് സർവീസ് ട്രെയിനിങ് സ്കൂളിലെ പ്രൊബേഷനറി ഓഫീസർമാരെ അഭിസംബോധന ചെയ്തുകൊണ്ട് സർദാർ വല്ലഭഭായി പട്ടേൽ നടത്തിയ ചരിത്രപ്രധാനമായ പ്രസംഗത്തിൻ്റെ ഓർമ്മയ്ക്കായാണ് ഈ ദിനം ആചരിക്കുന്നത്. ജവഹർലാൽ നെഹ്റുവിൻ്റെ നേതൃത്വത്തിലുള്ള ഇടക്കാല സർക്കാരിലെ ആഭ്യന്തര മന്ത്രിയായിരുന്നു അദ്ദേഹം. 2006 ഏപ്രിൽ 21 മുതലാണ് ഇന്ത്യയിൽ സിവിൽ സർവീസ് ദിനം ഔദ്യോഗികമായി ആചരിക്കാൻ തുടങ്ങിയത്.

ന്യൂഡൽഹിയിലെ വിജ്ഞാൻ ഭവനിലാണ് സിവിൽ സർവീസ് ദിനത്തിൻ്റെ ആദ്യ ചടങ്ങ് നടന്നത്. അന്നത്തെ പ്രധാനമന്ത്രി മൻമോഹൻ സിംഗ് ആയിരുന്നു ഈ പരിപാടി ഉദ്ഘാടനം ചെയ്തത്. സിവിൽ സർവീസ് ഉദ്യോഗസ്ഥർക്ക് രാജ്യത്തിൻ്റെയും പൗരന്മാരുടെയും ലക്ഷ്യത്തിനും സുരക്ഷയ്ക്കുമായി സ്വയം സമർപ്പിക്കാനും, പൊതുസേവനത്തിലും ജോലിയിലെ മികവിലും തങ്ങളുടെ പ്രതിബദ്ധത പുതുക്കാനുമുള്ള ഒരു അവസരമായാണ് ഈ ദിനം കണക്കാക്കപ്പെടുന്നത്.

ഇന്ത്യയിലെ ഭരണ പരിഷ്കാര വകുപ്പ്, പൊതു ഭരണ വകുപ്പ്, പൊതുജന പരാതി വകുപ്പ്, പെൻഷൻ വകുപ്പ് എന്നിവ സംയുക്തമായാണ് ഈ ദിനാചരണം സംഘടിപ്പിക്കുന്നത്.

സ്വാതന്ത്ര്യപൂർവ്വ ഇന്ത്യയിൽ ബ്രിട്ടീഷ് ഈസ്റ്റ് ഇന്ത്യ കമ്പനിയിലെ സിവിലിയൻ ജീവനക്കാർ ഭരണപരമായ കാര്യങ്ങളിൽ ഏർപ്പെട്ടിരുന്നതിൽ നിന്നാണ് സിവിൽ സർവീസ് എന്ന പദം രൂപംകൊണ്ടത്. അന്നത്തെ ഗവർണർ ജനറൽ ആയിരുന്ന വാറൻ ഹേസ്റ്റിംഗ്സ് ഇതിന് തുടക്കമിടുകയും പിന്നീട് ചാൾസ് കോൺവാലിസ് ഇതിനെ കൂടുതൽ പരിഷ്കരിക്കുകയും ചെയ്തു. അതിനാൽത്തന്നെ കോൺവാലിസിനെ ഇന്ത്യൻ സിവിൽ സർവീസിൻ്റെ പിതാവായി വിശേഷിപ്പിക്കുന്നു.

1857-ലെ ഒന്നാം സ്വാതന്ത്ര്യ സമരത്തിന് ശേഷം ഇന്ത്യയുടെ ഭരണം ബ്രിട്ടീഷ് ഈസ്റ്റ് ഇന്ത്യ കമ്പനിയിൽ നിന്ന് ഇംഗ്ലണ്ടിലെ രാജ്ഞി നേരിട്ട് ഏറ്റെടുത്തതോടെയാണ് ഇന്ത്യൻ സിവിൽ സർവീസിൻ്റെ യഥാർത്ഥ തുടക്കമെന്ന് പറയാം. തുടക്കത്തിൽ 'സിവിലിയൻസ്' എന്നറിയപ്പെട്ടിരുന്ന ഐസിഎസിലെ ജീവനക്കാരിൽ ഭൂരിഭാഗവും ബ്രിട്ടീഷുകാരായിരുന്നു.

1947-ൽ ഇന്ത്യ വിഭജന സമയത്ത് ഐസിഎസ് ഇന്ത്യയ്ക്കും പാക്കിസ്ഥാനുമിടയിൽ വിഭജിക്കപ്പെട്ടു. ബ്രിട്ടീഷ് ഭരണത്തിൻ്റെ ഏറ്റവും പ്രധാനപ്പെട്ട പൈതൃകങ്ങളിൽ ഒന്നായിരുന്നു ഐസിഎസ്. ഇന്ത്യയിലേക്ക് പോയ ഭാഗം ഇന്ത്യൻ അഡ്മിനിസ്ട്രേറ്റീവ് സർവീസ് (ഐഎഎസ്) എന്നും പാക്കിസ്ഥാനിലേക്ക് പോയ ഭാഗം സിവിൽ സർവീസ് ഓഫ് പാക്കിസ്ഥാൻ (സിഎസ്പി) എന്നും അറിയപ്പെട്ടു. ഭൂരിഭാഗം ബ്രിട്ടീഷുകാരും സ്വതന്ത്ര ഇന്ത്യയിലും പാക്കിസ്ഥാനിലും തുടരാൻ താല്പര്യമില്ലാതെ ബ്രിട്ടനിലേക്ക് മടങ്ങിയപ്പോൾ, വളരെ കുറച്ചുപേർ മാത്രമാണ് ഇന്ത്യയിൽ തുടർന്നത്.

സ്വാതന്ത്ര്യാനന്തര ഇന്ത്യ മുന്നോട്ട് പോകണമെങ്കിൽ ഐസിഎസിൽ പ്രവർത്തിച്ചവരുടെ അനുഭവസമ്പത്ത് അനിവാര്യമാണെന്ന് ജവഹർലാൽ നെഹ്റു തിരിച്ചറിഞ്ഞു. അതിൻ്റെ ഭാഗമായി ഏറെക്കാലം ഐസിഎസിൽ പ്രവർത്തിച്ചതും ഭാരതീയ റിസർവ് ബാങ്കിൻ്റെ ആദ്യ ഇന്ത്യക്കാരനായ ഗവർണറുമായിരുന്ന ചിന്തൻ ദേശ്മുഖിനെ ധനകാര്യ മന്ത്രിയായും കെ പി എസ് മേനോനെ വിദേശകാര്യ സെക്രട്ടറിയായും നിയമിച്ചാണ് അദ്ദേഹം പുതിയ ഇന്ത്യയിലേക്ക് ചുവടുവെച്ചത്. ഇന്ത്യയെ ഐക്യത്തോടെ മുന്നോട്ട് നയിക്കാൻ ഇവരുടെ അനുഭവക്കരുത്ത് ഏറെ സഹായകമായിരുന്നു എന്ന് സർദാർ പട്ടേൽ പിന്നീട് അനുസ്മരിച്ചിട്ടുണ്ട്.

കാലക്രമേണ സിവിൽ സർവീസ് മേഖലയിലും വലിയ മാറ്റങ്ങൾ സംഭവിച്ചു. ഇന്ത്യക്കാർക്ക് വേണ്ടി ഇന്ത്യക്കാർ തന്നെ ഭരിക്കുന്ന ഒരു സാഹചര്യം വന്നു. സിവിൽ സർവീസുകളിൽ ഏർപ്പെട്ടിരിക്കുന്നവരുടെ മാതൃകാപരമായ സേവനങ്ങൾക്ക് ആവശ്യമായ നിർദ്ദേശങ്ങൾ നൽകാനും, വിവിധ വകുപ്പുകൾ നൽകിയ സേവനങ്ങൾ വിലയിരുത്താനും, വരും വർഷങ്ങളിലേക്കുള്ള പ്രവർത്തനങ്ങളെക്കുറിച്ച് ഒരു കാഴ്ചപ്പാട് രൂപീകരിക്കാനും ഈ ദിനത്തിൽ ലക്ഷ്യമിടുന്നു. 

പൊതുജനങ്ങൾക്ക് വേണ്ടി കൂടുതൽ കാര്യക്ഷമമായി പ്രവർത്തിക്കാൻ സിവിൽ സർവീസ് ഉദ്യോഗസ്ഥരെ പ്രോത്സാഹിപ്പിക്കുകയും മികച്ച പ്രവർത്തനം നടത്തിയവരെ ആദരിക്കുക എന്നതും ഈ ദിനാചരണത്തിൻ്റെ പ്രധാന ലക്ഷ്യമാണ്.

ഈ വാർത്തയെക്കുറിച്ചുള്ള അഭിപ്രായങ്ങളും ഇത് സംബന്ധിച്ച് നിങ്ങൾ അറിയുന്ന മറ്റ് കാര്യങ്ങളും കമന്റ് ബോക്സിൽ പങ്കുവെക്കുക. സുഹൃത്തുകൾക്ക് ഈ വിവരങ്ങൾ എത്താനായി ഷെയർ ചെയ്യാനും മറക്കരുത്.

Summary: India celebrates National Civil Service Day on April 21st, commemorating the importance of civil servants and their commitment to public service. The day marks Sardar Vallabhbhai Patel's historic 1947 address to probationary officers and has been officially observed since 2006.

#CivilServiceDay, #India, #PublicService, #IAS, #SardarPatel, #Governance