കാസർകോട്ടുകാരി നഗ്മ മുഹമ്മദ് മാലിക് ജപ്പാനിലെ ഇന്ത്യൻ അംബാസഡർ; രാജ്യത്തിന്റെ നയതന്ത്ര തലസ്ഥാനത്തേക്ക് ഒരു മലയാളിപ്പെരുമ

ന്യൂഡെൽഹി: (KVARTHA) രാജ്യത്തിന്റെ സുപ്രധാന നയതന്ത്ര ദൗത്യങ്ങളിലൊന്നിലേക്ക് കാസർകോടിന് അഭിമാനമായി മറ്റൊരു നിയമനം. കാസർകോട് ഫോർട്ട് റോഡ് സ്വദേശിനിയും സീനിയർ ഐഎഫ്എസ് ഉദ്യോഗസ്ഥയുമായ നഗ്മ മുഹമ്മദ് മാലിക്കിനെ ജപ്പാനിലെ ഇന്ത്യൻ അംബാസഡറായി നിയമിച്ചു. 

നിലവിൽ പോളണ്ടിലെ അംബാസഡർ എന്ന പദവി വഹിക്കുന്നതിനിടയിലാണ് പുതിയ ദൗത്യം. രാജ്യത്തിന്റെ നയതന്ത്ര രംഗത്ത് മികച്ച സേവന പാരമ്പര്യമുള്ള വ്യക്തിത്വമാണ് നഗ്മ.

കാസർകോട് ഫോർട്ട് റോഡിലെ മുഹമ്മദ് ഹബീബുള്ളയുടെയും സുലു ബാനുവിന്റെയും മകളാണ് നഗ്മ മുഹമ്മദ് മാലിക്. അക്ഷരങ്ങളിലൂടെ വിപ്ലവം സൃഷ്ടിച്ച എഴുത്തുകാരി സാറ അബൂബക്കറിൻ്റെ സഹോദരപുത്രി കൂടിയാണ് ഇവർ. 

രാജ്യതലസ്ഥാനത്തായിരുന്നു നഗ്മയുടെ ബാല്യകാലവും പഠനവും. എന്നാൽ ലോകത്തിന്റെ ഏതു കോണിൽ ചെന്നാലും താൻ ഒരു 'കാസർകോട്ടുകാരി' ആണെന്ന് പറയുന്നതിൽ വലിയ അഭിമാനമുണ്ടായിരുന്നതായി അവർ മുൻപ് പല വേദികളിലും വ്യക്തമാക്കിയിട്ടുണ്ട്. 

മറ്റൊരു അമ്മാവൻ, 1965-ലെ ഇന്ത്യ-പാകിസ്‌താൻ യുദ്ധത്തിൽ ഇരുപത്തിമൂന്നാം വയസ്സിൽ രക്തസാക്ഷിയായ ലെഫ്. പി.മുഹമ്മദ് ഹാഷിമാണ്. അദ്ദേഹത്തോടുള്ള ആദരസൂചകമായി തളങ്കരയിലെ ഒരു തെരുവിന് അദ്ദേഹത്തിന്റെ പേര് നൽകുകയും പുലിക്കുന്നിൽ സ്‌തൂപം നിർമിക്കുകയും ചെയ്തിട്ടുണ്ട്.

നഗ്മയുടെ മുത്തച്ഛനായ ഫോർട്ട് റോഡ് തെരുവത്ത് കുന്നിൽ പുതിയപുരയിൽ അഹമ്മദ് 1930 മുതൽ 1970 വരെ കാസർകോട് കോടതിയിൽ പ്രാക്‌ടീസ് ചെയ്തിരുന്ന ആദ്യത്തെ മുസ്‌ലിം അഭിഭാഷകരിൽ ഒരാളായിരുന്നു എന്ന ചരിത്രപരമായ പ്രാധാന്യവുമുണ്ട്.

1991-ലാണ് നഗ്മ മുഹമ്മദ് മാലിക് ഇന്ത്യൻ വിദേശകാര്യ സർവീസിൽ പ്രവേശിക്കുന്നത്. സേവനരംഗത്തെ തുടക്കത്തിൽ തന്നെ അവർ ചരിത്രത്തിൽ ഇടംനേടി. ഇന്ത്യയിലെ ആദ്യത്തെ വനിതാ ഡെപ്യൂട്ടി ചീഫ് ഓഫ് പ്രോട്ടോകോൾ ആയി അവർ നിയമിതയായി. പാരീസിലായിരുന്നു നഗ്മയുടെ നയതന്ത്ര ജീവിതത്തിന്റെ തുടക്കം. അവിടെ ഇന്ത്യൻ എംബസിയിലും യുനെസ്കോയിലും അവർ പ്രവർത്തിച്ചിട്ടുണ്ട്.

വിവിധ സുപ്രധാന പദവികളിൽ സേവനമനുഷ്ഠിച്ച ശേഷമാണ് നഗ്മ ജപ്പാനിലെ അംബാസഡർ പദവിയിലെത്തുന്നത്. മുൻ പ്രധാനമന്ത്രി ഐ.കെ. ഗുജ്റാളിൻ്റെ പേഴ്‌സണൽ സ്റ്റാഫിൽ വെസ്റ്റ് യൂറോപ്പ് ഡിവിഷനിൽ ഡെസ്‌ക് ഓഫീസറായും അവർ സേവനമനുഷ്ഠിച്ചു. കൂടാതെ, നേപ്പാളിലും ശ്രീലങ്കയിലും ഇന്ത്യയുടെ ഫസ്റ്റ് സെക്രട്ടറിയായും കൗൺസിലറായും അവർ പ്രവർത്തിച്ചിട്ടുണ്ട്.

തുടർന്ന് ഡൽഹിയിൽ തിരിച്ചെത്തിയ ശേഷം വിദേശകാര്യമന്ത്രാലയത്തിൻ്റെ ഡെപ്യൂട്ടി വക്താവ്, യുറേഷ്യ ഡിവിഷനിൽ ഡയറക്ടർ എന്നീ ചുമതലകൾ വഹിച്ചു. റഷ്യയുമായും സിഐഎസ് രാജ്യങ്ങളുമായുള്ള ഇന്ത്യയുടെ നയതന്ത്ര പ്രതിനിധിയായും അവർ പ്രവർത്തിച്ചു. 2010 മുതൽ 2012 വരെ തായ്ലാൻഡിലെ ഡെപ്യൂട്ടി ചീഫ് ഓഫ് മിഷൻ പദവിയും അവർ അലങ്കരിച്ചു.

തുണീഷ്യയിലെ അംബാസഡർ (2012-15), ബ്രൂണൈ ദാറുസ്സലാമിലെ ഹൈക്കമ്മിഷണർ (2015-18) എന്നീ നിലകളിലും നഗ്മ സേവനമനുഷ്ഠിച്ചു. 2019-2020 കാലഘട്ടത്തിൽ പോളിസി പ്ലാനിങ് ഡിവിഷൻ്റെ തലപ്പത്തെത്തി. 

കിഴക്കൻ, ദക്ഷിണാഫ്രിക്കൻ രാജ്യങ്ങളുമായുള്ള ബന്ധത്തിന് മേൽനോട്ടം വഹിച്ച അഡീഷണൽ സെക്രട്ടറിയായും അവർ പ്രവർത്തിച്ചു. 2021 സെപ്റ്റംബർ മുതൽ പോളണ്ടിലെ ഇന്ത്യയുടെ അംബാസഡറായിരുന്നു. ഈ പദവിയിൽനിന്നാണ് ജപ്പാനിലെ സുപ്രധാന ദൗത്യത്തിലേക്ക് അവർ എത്തുന്നത്.

ഇംഗ്ലീഷ് സാഹിത്യത്തിൽ ബിരുദവും സോഷ്യോളജിയിൽ ബിരുദാനന്തര ബിരുദവും നേടിയ നഗ്മയ്ക്ക് ഇംഗ്ലീഷ്, ഫ്രഞ്ച്, ഹിന്ദി, ഉറുദു, മലയാളം തുടങ്ങിയ ഭാഷകളിൽ പ്രാവീണ്യമുണ്ട്. ഇന്ത്യൻ ക്ലാസിക്കൽ നൃത്തം, സംഗീതം, സാഹിത്യം തുടങ്ങിയവയിലും അവർക്ക് പ്രത്യേക താൽപ്പര്യമുണ്ട്. 

ഡൽഹി ആസ്ഥാനമായി പ്രവർത്തിക്കുന്ന അഭിഭാഷകനായ ഫരീദ് ഇനാം മാലിക്കാണ് ഭർത്താവ്. ഇവർക്ക് ഒരു മകനും ഒരു മകളുമുണ്ട്. കാസർകോടിന് മാത്രമല്ല, കേരളത്തിന് മൊത്തം അഭിമാനിക്കാവുന്ന വ്യക്തിത്വമാണ് നഗ്മ മുഹമ്മദ് മാലിക്.

ഈ വാർത്തയെക്കുറിച്ചുള്ള നിങ്ങളുടെ അഭിപ്രായങ്ങൾ പങ്കുവെക്കൂ. 

Article Summary: Senior IFS officer Nagma Mohamed Mallick is the new Indian Ambassador to Japan.

#NagmaMohamedMallick #IndianAmbassador #Japan #Kasaragod #IFS #MalayaliPride