ന്യൂഡൽഹി: (KVARTHA) 21-ാം നൂറ്റാണ്ടിലെ ഏറ്റവും വിപ്ലവകരമായ സാങ്കേതികവിദ്യകളിലൊന്നായ ചാറ്റ്ജിപിടിയുടെ പിന്നിലെ പ്രധാന ശക്തിയായിരുന്ന സുചിർ ബാലാജിയുടെ അപ്രതീക്ഷിതമായ മരണം ടെക് ലോകത്തെ നടുക്കിയിരിക്കുകയാണ്. ഓപ്പൺഎഐയിലെ തന്റെ കാലത്ത് സുചിർ, ചാറ്റ്ജിപിടിയുടെ വികസനത്തിൽ നിർണായകമായ പങ്ക് വഹിച്ചിരുന്നു.

കാലിഫോർണിയ സർവകലാശാലയിൽ നിന്ന് കമ്പ്യൂട്ടർ സയൻസിൽ ബിരുദം നേടിയ സുചിർ, കോളജ് പഠനകാലത്ത് തന്നെ ഓപ്പൺഎഐയിലും സ്കെയിൽ എഐയിലും ഇന്റേൺഷിപ്പ് ചെയ്ത് തന്റെ പ്രതിഭ തെളിയിച്ചിരുന്നു. ഓപ്പൺഎഐയിൽ തന്റെ ആദ്യ ദിവസങ്ങളിൽ അദ്ദേഹം വെബ്‌ജിപിടിയിൽ ജോലി ചെയ്തു, പിന്നീട് ജിപിടി-4, ഒ1 ഉള്ള റീസണിംഗ് ടീം, ചാറ്റ്ജിപിടിക്ക് ശേഷമുള്ള പരിശീലന ടീം എന്നിവയിൽ പ്രവർത്തിച്ചു.

ദുരൂഹ മരണം 

26-കാരനായ ഇന്ത്യൻ വംശജനായ സുചിറിനെ സാൻഫ്രാൻസിസ്കോയിലെ അപ്പാർട്ട്‌മെന്റിലാണ് മരിച്ച നിലയിൽ കണ്ടെത്തിയത്. സാൻഫ്രാൻസിസ്കോ പൊലീസ് നടത്തിയ അന്വേഷണത്തിൽ മരണം ആത്മഹത്യയാണെന്നാണ് നിഗമനത്തിലെത്തിയത്. കാരണം വെളിപ്പെടുത്തിയിട്ടില്ലെങ്കിലും മരണം ആത്മഹത്യയാണെന്ന് മെഡിക്കൽ എക്‌സാമിനർ ഓഫീസും സ്ഥിരീകരിച്ചു. എന്നാൽ സുഹൃത്തുക്കളും ബന്ധുക്കളും സംശയങ്ങൾ ഉയരത്തിയിട്ടുണ്ട്.

എന്തായിരുന്നു സുചിർ ബാലാജിയുടെ ആശങ്കകൾ?

എന്നാൽ ഈ തിളക്കമാർന്ന കരിയറിനൊപ്പം സുചിറിന് ആശങ്കകളും ഉണ്ടായിരുന്നു. ഓപ്പൺഎഐയുടെ സാങ്കേതികവിദ്യ സമൂഹത്തിന് ഗുണത്തേക്കാളേറെ ദോഷം ചെയ്യുമെന്ന് അദ്ദേഹം വിശ്വസിച്ചു. പ്രത്യേകിച്ചും, ഓപ്പൺഎഐ പകർപ്പവകാശമുള്ള ഡാറ്റ എങ്ങനെയാണ് ഉപയോഗിക്കുന്നത് എന്നതായിരുന്നു അവരുടെ പ്രധാന ആശങ്ക. 

ഈ ആശങ്കകൾ അദ്ദേഹം പരസ്യമായി പ്രകടിപ്പിക്കുകയും പിന്നാലെ ഓപ്പൺഎഐക്കെതിരെ നിരവധി കേസുകൾ രജിസ്റ്റർ ചെയ്യപ്പെടുകയും ചെയ്‌തു. കമ്പനി അനധികൃതമായി പകർപ്പവകാശമുള്ള ഉള്ളടക്കങ്ങൾ ഉപയോഗിച്ച് ലാഭമെടുക്കുന്നുവെന്നായിരുന്നു ഈ കേസുകളിലെ പ്രധാന ആരോപണം. സുചിറിന്റെ മരണം ഈ വിവാദങ്ങൾക്ക് കൂടുതൽ ആക്കം കൂട്ടുകയും ചെയ്തു.

സുചിറിന്റെ അപ്രതീക്ഷിതമായ മരണം ടെക് ലോകത്തെ മാത്രമല്ല, പകർപ്പവകാശം, എഐ എതിക്സ് എന്നീ വിഷയങ്ങളിൽ ഗൗരവമായ ചർച്ചകൾക്ക് തുടക്കം കുറിച്ചു. ഓപ്പൺഎഐ പോലുള്ള വലിയ സാങ്കേതിക കമ്പനികൾ തങ്ങളുടെ സാങ്കേതികവിദ്യയുടെ സാമൂഹിക പ്രത്യാഘാതങ്ങൾ കൂടുതൽ ഗൗരവമായി കാണണമെന്ന ആവശ്യം ശക്തമായി ഉയർന്നുവന്നിട്ടുണ്ട്.

സുചിർ ബാലാജിയുടെ മരണം ഒരു വലിയ നഷ്ടമാണ്. എന്നാൽ അദ്ദേഹം ഉയർത്തിക്കാട്ടിയ പ്രശ്നങ്ങൾ ഇനിയും നിലനിൽക്കുന്നു. ഓപ്പൺഎഐ പോലുള്ള കമ്പനികൾ തങ്ങളുടെ സാങ്കേതികവിദ്യയുടെ ഉപയോഗം നിയന്ത്രിക്കുന്നതിനുള്ള കൂടുതൽ കർശന നിയമങ്ങൾ ആവശ്യമാണെന്നാണ് ഇത് സൂചിപ്പിക്കുന്നത്.

#SuchirBalaji, #OpenAI, #AIConcerns, #TechWorld, #IntellectualProperty, #AIethics