മുംബൈ: (KVARTHA) മുംബൈയിലേക്ക് പോകുന്നവർക്ക് സന്തോഷ വാർത്ത. ഇനി മുംബൈയിലെ അഞ്ച് ടോൾ ബൂത്തുകളിലും ചെറു വാഹനങ്ങൾക്ക് ടോൾ നൽകേണ്ടതില്ല. മുഖ്യമന്ത്രി ഏകനാഥ് ഷിൻഡെയാണ് ഈ തീരുമാനം പ്രഖ്യാപിച്ചത്. തിങ്കളാഴ്ച രാത്രി 12 മണി മുതൽ പുതിയ നിയമം പ്രാബല്യത്തിൽ വരും. ദഹിസർ, മുളുന്ദ്, വാഷി, ഐറോളി, ടിൻഹന്ത് നാക എന്നീ സ്ഥലങ്ങളിലുള്ള ടോൾ ബൂത്തുകളിലാണ് ഈ ഇളവ് ബാധകമാകുന്നത്. ഇതുവരെ ഈ ബൂത്തുകളിൽ ലൈറ്റ് മോട്ടോർ വാഹനങ്ങൾക്ക് 45 രൂപയാണ് ടോൾ നൽകേണ്ടിയിരുന്നത്.

സ്കൂട്ടർ, ബൈക്ക്, കാർ, ഓട്ടോ റിക്ഷ, മിനി ബസ് തുടങ്ങിയ പത്തോ അതിൽ താഴെയോ ആളുകൾക്ക് സഞ്ചരിക്കാവുന്ന വാഹനങ്ങൾ ചെറുവാഹനങ്ങളിൽ ഉൾപ്പെടുന്നു. ഈ തീരുമാനം നിയമസഭാ തിരഞ്ഞെടുപ്പ് അടുത്തുവരുന്ന സമയത്താണ് എടുത്തിരിക്കുന്നത്. അതുകൊണ്ട് ചിലർ ഇത് വോട്ട് ബാങ്ക് ലക്ഷ്യമിട്ടുള്ള തന്ത്രമാണെന്ന് പറയുന്നു. വരുന്ന നിയമസഭാ തെരഞ്ഞെടുപ്പിന് മുന്നോടിയായി ചേർന്ന മഹാരാഷ്ട്ര സർക്കാരിൻ്റെ അന്തിമ മന്ത്രിസഭാ യോഗത്തിലാണ് തീരുമാനമുണ്ടായതെന്നാണ് റിപ്പോർട്ടുകൾ. 

മുംബൈയിലെ റോഡുകളുടെ അടിസ്ഥാന സൗകര്യ വികസനത്തിന് ഏറെ പ്രധാനമായ ഒരു ഭാഗമാണ് ടോൾ ബൂത്തുകൾ. ഇവിടെ ദിവസേന ആയിരക്കണക്കിന് വാഹനങ്ങളാണ് സഞ്ചരിക്കുന്നത്. കണക്കുകൾ പ്രകാരം, ദിവസേന ആറ് ലക്ഷത്തിലധികം വാഹനങ്ങളാണ് മുംബൈയിൽ പ്രവേശിക്കുന്നതും പുറപ്പെടുന്നതും. മുംബൈയെ ടോൾ ഫ്രീ ആക്കുമെന്ന വാഗ്ദാനം സർക്കാർ പാലിച്ചില്ലെന്ന് മഹാരാഷ്ട്ര നവനിർമാൺ സേനയുടെ തലവൻ രാജ് താക്കറെ നേരത്തെ ആരോപിച്ചിരുന്നു.

#Mumbai #tollfree #Maharashtra #traffic #goodnews #EknathShinde