Continuous Sleep | കുംഭകര്‍ണ സിന്‍ഡ്രോം: ഉറങ്ങാന്‍ കിടന്ന 26 കാരന്‍ എഴുന്നേറ്റത് എട്ടുദിവസത്തിന് ശേഷം; അസാധാരണ സംഭവത്തില്‍ അമ്പരന്ന് ഡോക്ടര്‍മാര്‍, കാരണമിത്

മുംബൈ: (KVARTHA) തുടര്‍ച്ചയായി എട്ട് ദിവസം കിടന്നുറങ്ങിയ 26 കാരന്റെ അസാധാരണ സംഭവത്തില്‍ അമ്പരന്ന് ഡോക്ടര്‍മാര്‍. യുവാവിന്റെ ഉറക്കം ശ്രദ്ധയില്‍പെട്ട കുടുംബം ആദ്യം പ്രാദേശിക വൈദ്യന്മാരെയും മന്ത്രവാദികളെയും സമീപിച്ചു. എന്നിട്ടും ഉറക്കം തുടര്‍ന്നതോടെ ഇയാളെ മുംബൈയിലെ ആശുപത്രിയില്‍ പ്രവേശിപ്പിച്ചു.

പരിശോധനയില്‍ യുവാവിന് ക്ലെയിന്‍-ലെവിന്‍ സിന്‍ഡ്രോം (കെഎല്‍എസ്) ആണെന്ന് ഡോക്ടര്‍മാര്‍ കണ്ടെത്തി. സങ്കീര്‍ണമായ രോഗാവസ്ഥയാണ് കെഎല്‍എസ്. രോഗത്തിന്റെ കൃത്യമായ കാരണം പൂര്‍ണമായി മെഡികല്‍ സയന്‍സിന് മനസിലായിട്ടില്ലെന്ന് വോക്ഹാര്‍ഡ് ഹോസ്പിറ്റലിലെ ന്യൂറോളജിസ്റ്റായ ഡോ. പ്രശാന്ത് മഖിജ പറഞ്ഞു.

കെഎല്‍എസ് കണ്ടുപിടിക്കാന്‍ പ്രത്യേക പരിശോധനകളൊന്നുമില്ല. അപൂര്‍വമായാണ് ഈ രോഗമുണ്ടാകുകയെന്നും അവര്‍ വ്യക്തമാക്കി. കരിയറില്‍ മൂന്നാമത്തെ കേസാണ് കൈകാര്യം ചെയ്യുന്നതെന്നും പത്ത് വര്‍ഷത്തിന് മുമ്പാണ് രണ്ട് കേസുകള്‍ ഉണ്ടായതെന്നും ഡോക്ടര്‍ പറഞ്ഞു.

സാധാരണയായി 12 നും 25 നും ഇടയില്‍ പ്രായമുള്ള കൗമാരക്കാരിലും യുവാക്കളിലും ഈ അസുഖം കൂടുതലായി കാണപ്പെടുമെന്നും ന്യൂറോളജിസ്റ്റ് ഡോ രാഹുല്‍ ചാക്കോര്‍ പറഞ്ഞു. ഈ രോഗത്തിന് വ്യക്തമായ കാരണങ്ങളൊന്നുമില്ല. വൈറല്‍ അണുബാധ പോലുള്ള കാരണമുണ്ടാകാം. 'കുംഭകര്‍ണ സിന്‍ഡ്രോം' എന്നും ഈ രോഗത്തെ ഡോക്ടര്‍മാര്‍ വിളിക്കാറുണ്ട്.

അതേസമയം, എട്ടുദിവസത്തെ ഉറക്കത്തിനിടയില്‍ ഇയാള്‍ കുറച്ച് തവണ ഭക്ഷണം കഴിക്കാനും പ്രാഥമിക കൃത്യത്തിനും മാത്രമായി എഴുന്നേറ്റിരുന്നുവെന്നും അതും അര്‍ധബോധാവസ്ഥയിലായിരുന്നെന്നും വീട്ടുകാര്‍ പറഞ്ഞു.