വൃദ്ധയെ കൊലപ്പെടുത്തി അറുത്ത തലയുമായി യുവാവ് പോലീസില്‍ കീഴടങ്ങി

ഭോപ്പാല്‍: മദ്ധ്യപ്രദേശിലെ ബുന്ദല്‍ഖണ്ഡില്‍ വിറകിനു വേണ്ടിയുള്ള വഴക്കിനിടയില്‍ യുവാവ് വൃദ്ധയെ കൊലപ്പെടുത്തിയതിനുശേഷം  പോലീസ് സ്‌റ്റേഷനില്‍ കീഴടങ്ങി.

വൃദ്ധയെ കൊലപ്പെടുത്തി അവരുടെ തലയുമായാണ് യുവാവ്  പോലീസ് സ്‌റ്റേഷനില്‍ കീഴടങ്ങാനെത്തിയത്. കൊല്ലപ്പെട്ട വൃദ്ധ ദുര്‍മന്ത്രവാദത്തിലൂടെ തന്നെ കൊലപ്പെടുത്താതിരിക്കാന്‍ വേണ്ടിയാണ് അവരെ വധിച്ചതെന്ന്  യുവാവ് പോലീസിനോട് പറഞ്ഞു.

പാന്ത് വില്ലേജില്‍ വെള്ളിയാഴ്ചയാണ് കേസിനാസ്പദമായ സംഭവം നടന്നത്.  ഹരിശങ്ക് ഗോന്ദ് (30) എന്ന യുവാവും  അറുപത്തിരണ്ടുകാരിയായ വൃദ്ധയും വിറകിനു വേണ്ടി വഴക്കിട്ടിരുന്നു. ഹരിശങ്ക് ഗോന്ദിന്റെ വീട്ടുവളപ്പില്‍  മുറിച്ചിട്ട മരത്തിലെ വിറക് വൃദ്ധ എടുത്തുകൊണ്ടുപോയതിനെ തുടര്‍ന്നാണ് വഴക്ക്.

എന്നാല്‍  വൃദ്ധ ദുര്‍മന്ത്രവാദിനിയാണെന്നും മുമ്പ് തന്റെ കുടുംബാംഗങ്ങളെ ദുര്‍മന്ത്രവാദത്തിലൂടെ ഇവര്‍ കൊലപ്പെടുത്തിയിട്ടുണ്ടെന്നും ഹരിശങ്ക് ഗോന്ദ പറയുന്നു.

വൃദ്ധയുമായി വഴക്കിട്ടതിനെ തുടര്‍ന്ന്  തന്നെയും അവര്‍ കൊലപ്പെടുത്തുമെന്ന് ഭയന്നാണ് തല വെട്ടിയെടുത്തതെന്നും ഹരിശങ്ക് ഗോന്ദ വ്യക്തമാക്കി.

തുടര്‍ന്ന് വെട്ടിയെടുത്ത തലയും കോടാലിയുമായി നാലു കിലോമീറ്റര്‍ നടന്ന് സ്‌റ്റേഷനിലെത്തി കീഴടങ്ങുകയായിരുന്നു. അതേസമയം പ്രതിക്ക് മാനസികമായിട്ടുള്ള  പ്രശ്‌നമൊന്നുമില്ലെന്നാണ് പോലീസ് പറയുന്നത്.

വിദ്യാര്‍ത്ഥിപക്ഷ പ്രവര്‍ത്തനങ്ങള്‍ക്കുളള അംഗീകാരം: എം.എസ്.എഫ്