വിവാഹ നിശ്ചയത്തിന് 3 ദിവസം മുമ്പ് കാണാതായ യുവതിയുടെ മൃതദേഹം വീട്ടിലെ വാടെര്‍ ടാങ്കിനുള്ളില്‍ നിന്നും കണ്ടെത്തി; കൊലപാതകമെന്ന് സംശയിക്കുന്നതായി പൊലീസ്

മൂര്‍ചയുള്ള ആയുധം ഉപയോഗിച്ച് കൊലപ്പെടുത്തിയതിനു ശേഷം മൃതദേഹം ടാങ്കില്‍ ഉപേക്ഷിച്ചതാകാമെന്നാണ് പൊലീസിന്റെ പ്രാഥമിക വിവരം. ഖണ്ഡ്വ ജില്ലയിലെ പാണ്ഡാന സ്വദേശിനി രജനി മസാരയാണ് കൊല്ലപ്പെട്ടത്. ഖണ്ഡ്വ മുന്‍സിപല്‍ കോര്‍പറേഷനിലെ അസിസ്റ്റന്റ് ക്ലാസ് 3 ക്ലാര്‍ക്കായി ജോലി ചെയ്തുവരികയായിരുന്നു ഇവര്‍.

വാടക വീട്ടില്‍ തനിച്ചായിരുന്നു യുവതി താമസിച്ചിരുന്നത്. വിവാഹ നിശ്ചയത്തിന് മൂന്ന് നാള്‍ ബാക്കി നില്‍ക്കേയാണ് യുവതിയുടെ മൃതദേഹം കണ്ടെത്തിയത്. പ്രണയ നൈരാശ്യമാകാം കൊലപാതകത്തിന് കാരണം എന്ന് സംശയിക്കുന്നതായി പൊലീസ് പറഞ്ഞു.

വെള്ളിയാഴ്ച രജനിയെ അമ്മ മൊബൈലില്‍ വിളിച്ചെങ്കിലും കിട്ടിയിരുന്നില്ല. ഫോണ്‍ സ്വിച് ഓഫ് ആയിരുന്നു. തുടര്‍ന്ന് അടുത്ത ദിവസം രാവിലെ മകളെ അന്വേഷിച്ച് അമ്മ വീട്ടിലെത്തി. ഏറെ തവണ വാതില്‍ മുട്ടിയെങ്കിലും തുറക്കാതിരുന്നതിനെ തുടര്‍ന്ന് സംശയം തോന്നി പുറകുവശത്തു കൂടി വീടിനുള്ളില്‍ കയറുകയായിരുന്നു.

വീട്ടിനകത്ത് രക്തക്കറ കണ്ടതിനെ തുടര്‍ന്ന് പൊലീസിനെ വിവരം അറിയിച്ചു. വീട് മുഴുവന്‍ പരിശോധിച്ചെങ്കിലും രജനിയെ കണ്ടെത്താനായില്ല. ഇതിനിടയിലാണ് വാടെര്‍ ടാങ്കിനുള്ളില്‍ നിന്നും മൃതദേഹം ലഭിച്ചത്.

മൂര്‍ചയേറിയ ആയുധം കൊണ്ടുള്ള ആഴത്തിലുള്ള മുറിവുകള്‍ ശരീരത്തിലുണ്ടായിരുന്നു. പ്രഥമദൃഷ്ട്യാ സംഭവം കൊലപാതകമാണെന്നും കൂടുതല്‍ അന്വേഷണം നടത്തി വരികയാണെന്നും പൊലീസ് അറിയിച്ചു.

വിവാഹം നിശ്ചയിച്ചിരുന്നെങ്കിലും രജനി മറ്റൊരു യുവാവുമായി പ്രണയത്തിലായിരുന്നുവെന്നാണ് സംശയിക്കുന്നത്. ഇയാള്‍ നിരന്തരം രജനിയുടെ വീട്ടില്‍ എത്തിയിരുന്നതായും പ്രദേശവാസികള്‍ പൊലീസിന് മൊഴി നല്‍കിയിട്ടുണ്ട്.