ക്രിക്കറ്റ് താരം മുഹമ്മദ് ഷമിയിൽ നിന്ന് പ്രതിമാസ ജീവനാംശം 10 ലക്ഷം രൂപയാക്കി ഉയർത്തണമെന്ന് ആവശ്യപ്പെട്ട് മുൻ ഭാര്യ സുപ്രീം കോടതിയിൽ

ന്യൂഡൽഹി: (KVARTHA) ഇന്ത്യൻ ക്രിക്കറ്റ് താരം മുഹമ്മദ് ഷമിയുമായുള്ള നിയമപോരാട്ടം കടുപ്പിച്ച് മുൻ ഭാര്യ ഹസിൻ ജഹാൻ സുപ്രീം കോടതിയെ സമീപിച്ചു. കൊൽക്കത്ത ഹൈക്കോടതി അനുവദിച്ച പ്രതിമാസ ജീവനാംശ തുക ഉയർത്തണമെന്നാണ് ഹസിൻ ജഹാൻ്റെ ആവശ്യം. തനിക്കും മകൾ ഐറയ്ക്കും ചെലവിനായി അനുവദിച്ച നിലവിലെ തുക അപര്യാപ്തമാണെന്ന് ചൂണ്ടിക്കാട്ടിയാണ് മുൻ ഭാര്യയുടെ നീക്കം. ഹർജിയിൽ മുഹമ്മദ് ഷമിക്കും പശ്ചിമ ബംഗാൾ സർക്കാരിനും സുപ്രീം കോടതി നോട്ടീസ് അയച്ചു.

നിലവിൽ പ്രതിമാസം നാല് ലക്ഷം രൂപ വീതമാണ് ഷമി നൽകുന്നത്. ഇതിൽ ഒന്നര ലക്ഷം രൂപ ഹസിൻ ജഹാനും രണ്ടര ലക്ഷം രൂപ മകൾക്കുവേണ്ടിയുമാണ്. എന്നാൽ തനിക്ക് ഏഴ് ലക്ഷം രൂപയും മകൾക്ക് മൂന്ന് ലക്ഷം രൂപയും ഉൾപ്പെടെ മാസം 10 ലക്ഷം രൂപ ജീവനാംശം വേണമെന്നാണ് ഹസിൻ ജഹാൻ്റെ പുതിയ ആവശ്യം.

'നാല് ലക്ഷം വലിയ തുകയല്ലേ' കോടതിയുടെ നിരീക്ഷണം

ഹസിൻ ജഹാൻ്റെ ഹർജി ജഡ്ജിമാരായ മനോജ് മിശ്ര, ഉജജയ്ല്‍ ഭുവിയാൻ എന്നിവരടങ്ങിയ ബെഞ്ചാണ് പരിഗണിച്ചത്. വാദം കേൾക്കുന്നതിനിടെ, 'മാസം നാല് ലക്ഷം എന്നത് വലിയ തുകയല്ലേ' എന്ന് കോടതി നിരീക്ഷിച്ചത് ശ്രദ്ധേയമായി. എന്നാൽ, ഷമിയുടെ സമ്പാദ്യം കണക്കിലെടുക്കുമ്പോൾ ഈ തുക തീരെ കുറഞ്ഞുപോയെന്നാണ് ഹസിൻ ജഹാൻ്റെ അഭിഭാഷകൻ ശോഭ ഗുപ്ത കോടതിയിൽ വാദിച്ചത്. ഹസിൻ്റെ ഹർജിയിൽ നാലാഴ്ചയ്ക്കകം മറുപടി നൽകണമെന്ന് സുപ്രീം കോടതി നിർദേശിച്ചിട്ടുണ്ട്. അതിനു ശേഷം കേസ് വീണ്ടും ഡിസംബറിലാണ് പരിഗണിക്കുക.

ആഡംബര ജീവിതം ചൂണ്ടിക്കാട്ടി അഭിഭാഷകൻ

ഷമിയുടെ വരുമാനവും ജീവിതശൈലിയും പരിഗണിക്കുമ്പോൾ തങ്ങൾക്ക് ലഭിക്കുന്ന തുക കുറവാണെന്ന വാദത്തിന് ഉപോദ്ബലകമായി പല വിവരങ്ങളും ഹസിൻ ജഹാൻ്റെ അഭിഭാഷകൻ കോടതിയിൽ സമർപ്പിച്ചു. 'ഭർത്താവ് ഒരുപാട് പണം സമ്പാദിക്കുന്നുണ്ട്. കോടികൾ മൂല്യമുള്ള ഒരുപാട് സ്വത്തുക്കൾ ഷമിക്കുണ്ട്. ആഡംബര കാറുകളുണ്ട്. ഇടയ്ക്കിടെ വിദേശ യാത്രകൾ നടത്തുന്നുണ്ട്. അദ്ദേഹം ആഡംബരം നിറഞ്ഞ ജീവിതശൈലിയാണ് പിന്തുടരുന്നത്. അതിൻ്റെയെല്ലാം സത്യവാങ്മൂലങ്ങൾ സമർപ്പിച്ചിട്ടുണ്ട്' എന്ന് ഹസിൻ ജഹാൻ്റെ അഭിഭാഷകൻ കോടതിയിൽ വാദിച്ചു. തൻ്റെ ഒപ്പമുള്ള ഷമിയുടെ മകൾ, പിതാവിൻ്റെ അതേ നിലവാരമുള്ള ജീവിതം അർഹിക്കുന്നുണ്ടെന്നും അഭിഭാഷകൻ കൂട്ടിച്ചേർത്തു.

വിവാഹബന്ധം വേർപെടുത്തിയത് പീഡനാരോപണത്തിന് പിന്നാലെ

നിർദ്ദേശങ്ങൾ ഉണ്ടായിട്ടും ഷമി പല മാസങ്ങളിലും പണം നൽകുന്നതിൽ വീഴ്ച വരുത്തിയെന്നും ഹസിൻ ജഹാൻ്റെ ഹർജിയിൽ ആരോപണമുണ്ട്. ഷമിക്ക് വിവാഹേതര ബന്ധമുണ്ടെന്ന് ആരോപിച്ചാണ് ഹസിൻ ജഹാൻ 2018ൽ നിയമപോരാട്ടം തുടങ്ങിയത്. ആദ്യം ഗാർഹിക പീഡനക്കേസ് നൽകിയ അവർ പിന്നീട് ജീവനാംശമായി വൻതുക ആവശ്യപ്പെടുകയായിരുന്നു. 2014 ജൂണിലാണ് മുഹമ്മദ് ഷമിയും ഹസിൻ ജഹാനും വിവാഹിതരായത്. അവർക്ക് ഐറയെന്ന മകളുണ്ട്. ഹസിൻ ജഹാന് മുൻ വിവാഹത്തിൽ വേറെയും മക്കളുണ്ട്. മോഡലിങ് വഴി ഹസിൻ ജഹാൻ പണം സമ്പാദിക്കുന്നുണ്ടെന്ന് ചൂണ്ടിക്കാട്ടി നേരത്തെ ഹസിൻ ജഹാൻ്റെ ജീവനാംശം ആവശ്യപ്പെട്ടുള്ള ഹർജി കോടതി തള്ളിയിരുന്നു.

മുഹമ്മദ് ഷമിയുമായുള്ള കേസിൽ ഹസിൻ ജഹാൻ്റെ ആവശ്യം ന്യായമാണോ? നിങ്ങളുടെ അഭിപ്രായം കമൻ്റ് ചെയ്യുക.

Article Summary: Mohammad Shami's ex-wife Hasin Jahan moves SC demanding Rs 10 lakh monthly alimony.

#MohammedShami #HasinJahan #AlimonyCase #SupremeCourt #CricketIndia #LegalBattle