കസാൻ: (KVARTHA) പ്രധാനമന്ത്രി നരേന്ദ്ര മോദി ബ്രിക്സ് ഉച്ചകോടിയിൽ ചൈനീസ് പ്രസിഡണ്ട് ഷി ജിൻപിങ്ങുമായി കൂടിക്കാഴ്ച നടത്തി. 2019-നു ശേഷം ഇരു നേതാക്കളും ആദ്യമായാണ് ഉഭയകക്ഷി ബന്ധം ശക്തിപ്പെടുത്തുന്നതിനായി കൂടിക്കാഴ്ച നടത്തുന്നത്. ഇന്ത്യയും ചൈനയും തമ്മിലുള്ള അതിർത്തി പ്രശ്‌നം പരിഹരിക്കുന്നതിനായി നടന്ന ചർച്ചകളിൽ പ്രധാന തീരുമാനം ഉണ്ടായെന്ന റിപ്പോർട്ടിനെ തുടർന്നാണ് ഇരു രാജ്യങ്ങളുടെയും നേതാക്കൾ തമ്മിൽ കൂടിക്കാഴ്ച നടന്നത്. 

അതിർത്തിയിലെ സമാധാനം നിലനിർത്തുന്നതിന് പ്രാധാന്യം നൽകണമെന്ന് മോദി അഭിപ്രായപ്പെട്ടു. 2020-ൽ ലഡാക്കിലെ ഗാൽവൻ താഴ്‌വരയിലുണ്ടായ അതിർത്തി സംഘർഷത്തിനു ശേഷമാണ് ഇന്ത്യ-ചൈന നയതന്ത്രബന്ധം വഷളായത്. 2020-ൽ ഗാൽവൻ താഴ്‌വരയിൽ ഉണ്ടായ സംഘർഷത്തിനു മുൻപുള്ള അവസ്ഥയിലേക്ക് സൈന്യത്തെ പിൻവലിക്കാൻ ഇരു രാജ്യങ്ങളും നടത്തിയ ചർച്ചയെ തുടർന്ന് തീരുമാനിച്ചു. അതിർത്തിയിലെ സൈന്യത്തിന്റെ സ്ഥാനം ശക്തമാക്കിയതിനു ശേഷമാണ് ഈ ചർച്ചകൾ നടന്നത്. അതിർത്തിയിൽ നടത്തുന്ന പരിശോധനകളും പഴയ രീതിയിലേക്ക് മാറ്റും.

Met President Xi Jinping on the sidelines of the Kazan BRICS Summit.

India-China relations are important for the people of our countries, and for regional and global peace and stability.

Mutual trust, mutual respect and mutual sensitivity will guide bilateral relations. pic.twitter.com/tXfudhAU4b

— Narendra Modi (@narendramodi) October 23, 2024

അഞ്ചു വർഷത്തെ ഇടവേളയ്ക്ക് ശേഷമാണ് നാം ഔദ്യോഗിക യോഗം ചേരുന്നതെന്നും ഇന്ത്യയും ചൈനയും തമ്മിലുള്ള ബന്ധം നമ്മുടെ ജനങ്ങളുടെ ക്ഷേമത്തിനു മാത്രമല്ല, ലോകത്തെ മുഴുവൻ സമാധാനത്തിനും പുരോഗതിക്കും സുപ്രധാനമാണെന്നും മോദി പറഞ്ഞു. കഴിഞ്ഞ കാലങ്ങളിൽ നേരിട്ട അതിർത്തി പ്രശ്‌നങ്ങളിൽ ഒരു സമവായത്തിൽ എത്താൻ കഴിഞ്ഞത് സ്വാഗതം ചെയ്യുന്നതായും ഇനി മുതൽ, പരസ്പര വിശ്വാസം, ബഹുമാനം, മനസ്സിലാക്കൽ എന്നിവയെ അടിസ്ഥാനമാക്കി ഇന്ത്യ-ചൈന ബന്ധം കൂടുതൽ ശക്തമാക്കാൻ നമുക്ക് കഴിയുമെന്നും മോദി കൂട്ടിച്ചേർത്തു.

2022-ൽ ഇന്തോനേഷ്യയിലെ ബാലിയിലും ദക്ഷിണാഫ്രിക്കയിലെ ജൊഹാനസ്ബർഗിലും നടന്ന പ്രധാന സമ്മേളനങ്ങളിൽ മോദിയും ഷിയും തമ്മിൽ കൂടിക്കാഴ്ച നടന്നിരുന്നു. എന്നാൽ ഈ കൂടിക്കാഴ്ചകൾ വ്യാപാര ബന്ധം മെച്ചപ്പെടുത്തുന്നതിനായിരുന്നു. ഗാൽവൻ താഴ്‌വരയിൽ ഉണ്ടായ സംഘർഷത്തിനു ശേഷം ഇരു രാജ്യങ്ങൾക്കും ഇടയിൽ നേരിട്ടുള്ള വിമാന സർവീസുകൾ നിലച്ചിരിക്കുകയാണ്. കൂടുതൽ സുരക്ഷാ പരിശോധനകൾ  നടത്തിയ ശേഷമാണ്  ചൈനയിൽ നിന്നുള്ള സാങ്കേതിക വിദഗ്ധർക്കും മറ്റും ഇന്ത്യയിലേക്ക് പ്രവേശനം അനുവദിക്കുന്നത്. എന്നാൽ ഈ കൂടിക്കാഴ്ചയോടെ ഇരു രാജ്യങ്ങളും തമ്മിലുള്ള ബന്ധം കൂടുതൽ മെച്ചപ്പെടുമെന്നാണ് പ്രതീക്ഷ.

#ModiXiMeet #IndiaChina #BRICS2024 #BorderPeace #DiplomaticRelations #Galwan