Job Opportunitie | വികലാംഗർക്ക് 1 ലക്ഷം തൊഴിലവസരങ്ങളും ഇന്റേൺഷിപുകളും സാങ്കേതിക വൈദഗ്ധ്യവും ഒരുക്കും; നന്മയാർന്ന പ്രഖ്യാപനവുമായി മൈക്രോസോഫ്റ്റ്

ന്യൂഡെൽഹി: (www.kvartha.com) ലോകമെമ്പാടുമുള്ള നിരവധി കംപനികൾ തൊഴിൽ വെട്ടിക്കുറവുകളും നഷ്‌ടങ്ങളും പ്രഖ്യാപിച്ചിരിക്കുന്ന സമയത്ത്, വികലാംഗരെ (PwDs) ശാക്തീകരിക്കുന്നതിനുള്ള പുതിയ സംരംഭം മൈക്രോസോഫ്റ്റ് പ്രഖ്യാപിച്ചു. വികലാംഗർക്ക് 1,00,000 തൊഴിലവസരങ്ങൾ നൽകുന്നതിന്, ലാഭേച്ഛയില്ലാതെ പ്രവർത്തിക്കുന്ന സ്ഥാപനമായ എനേബിൾ ഇൻഡ്യയുമായി മൈക്രോസോഫ്റ്റ് സഹകരിക്കും. 'ഇൻക്ലൂഷൻ ടു ആക്ഷൻ' എന്നാണ് ഈ സംരംഭത്തിന് എന്ന് പേരിട്ടിരിക്കുന്നത്.
                                   
വിവിധ സാങ്കേതിക വൈദഗ്ധ്യം, മാർഗനിർദേശം, ഇന്റേൺഷിപ്, തൊഴിൽ സംരംഭങ്ങൾ എന്നിവയിൽ ഒരുമിച്ച് പ്രവർത്തിക്കാൻ രാജ്യത്തെ ധനകാര്യ സേവനങ്ങൾ, നിർമാണം, റീടെയിൽ, ടെക്നോളജി മേഖലകളിലെ നൂറിലധികം സ്ഥാപനങ്ങളെ ഈ പദ്ധതിയിലൂടെ പ്രാപ്തരാക്കും. പിഡബ്ല്യുഡികൾക്കുള്ള സാങ്കേതിക വൈദഗ്ധ്യവും പരിശീലന പരിപാടികളും മൈക്രോസോഫ്റ്റ് ഒരുക്കും.

വികലാംഗ സമൂഹത്തിലെ വ്യാപാരികൾ, അഭിഭാഷകർ, വിദഗ്ധർ, നയ നിർമാതാക്കൾ തുടങ്ങിയവരുമായി ഇടപഴകുന്നതിനും തൊഴിലവസരങ്ങൾ ഒരുക്കുന്നതിനുമുള്ള ശ്രമത്തിന്റെ തുടക്കമാണ് എനേബിൾ ഇൻഡ്യയും മൈക്രോസോഫ്റ്റും തമ്മിലുള്ള ഈ അതുല്യമായ സഹകരണമെന്ന് മൈക്രോസോഫ്റ്റ് ഇൻഡ്യ പ്രസിഡന്റ് അനന്ത് മഹേശ്വരി പറഞ്ഞു. 85 ശതമാനം ജോലികളും നെറ്റ്‌വർകിംഗ് വഴി നികത്തപ്പെടുന്ന ഒരു കാലഘട്ടത്തിൽ, 10 ശതമാനം വരുന്ന വികലാംഗർക്ക് അവസരങ്ങൾ തുറക്കേണ്ടത് അടിയന്തിര ആവശ്യമാണെന്ന് എനേബിൾ ഇൻഡ്യയുടെ സഹസ്ഥാപകൻ ദിപേഷ് സുതാരിയ വ്യക്തമാക്കി.