Arrested | പെണ്‍സുഹൃത്തിന്റെ സ്വകാര്യ ചിത്രങ്ങള്‍ ടെലഗ്രാം ഗ്രൂപ് വഴി പ്രചരിപ്പിച്ചെന്ന പരാതിയില്‍ 26കാരന്‍ അറസ്റ്റില്‍; പിടിക്കപ്പെട്ടത് ഇരുവരുടേയും വിവാഹം നടത്താനുള്ള തയാറെടുപ്പിനിടെ

സംഭവത്തെ കുറിച്ച് പൊലീസ് പറയുന്നത്:

സഞ്ജയും പെണ്‍സുഹൃത്തും ബംഗ്ലൂരുവില്‍ ലിവ് ഇന്‍ റിലേഷന്‍ഷിപിലാണ് കഴിഞ്ഞിരുന്നത്. പത്താം ക്ലാസ് മുതല്‍ സുഹൃത്തുക്കളായിരുന്ന ഇരുവരുടെയും ബന്ധം രണ്ട് കുടുംബങ്ങള്‍ക്കും അറിയാമായിരുന്നു. വൈകാതെ തന്നെ ഇരുവരുടെയും വിവാഹം നടത്താനുള്ള ഒരുക്കത്തിലായിരുന്നു കുടുംബാംഗങ്ങള്‍. ഇതിനിടയിലാണ് എല്ലാവരേയും ഞെട്ടിച്ച് സഞ്ജയ് അറസ്റ്റിലാകുന്നത്.

2021ല്‍ ആണ് യുവതിയുടെ മോര്‍ഫ് ചെയ്ത ചിത്രം ആദ്യമായി ഇന്‍സ്റ്റഗ്രാമില്‍ പ്രത്യക്ഷപ്പെട്ടത്. ഇത് ശ്രദ്ധയില്‍പെട്ടതോടെ യുവതി പരാതിപ്പെട്ടിരുന്നു. ഉടന്‍ തന്നെ ചിത്രങ്ങള്‍ നീക്കം ചെയ്യപ്പെടുകയും ചെയ്തു. എന്നാല്‍, ഈ വര്‍ഷം ജൂണില്‍ വീണ്ടും ഇത്തരത്തിലുള്ള ചിത്രം സമൂഹമാധ്യമങ്ങളില്‍ കണ്ടെത്തുകയായിരുന്നു. ഇതോടെ, യുവതിയും സഞ്ജയും പൊലീസില്‍ പരാതി നല്‍കി.

അന്വേഷണത്തില്‍ സഞ്ജയ് തന്നെയാണ് ചിത്രങ്ങള്‍ പ്രചരിപ്പിക്കുന്നതെന്ന് പൊലീസ് കണ്ടെത്തി. 12 പേരുള്ള ടെലഗ്രാം ഗ്രൂപിലാണ് സഞ്ജയ് കൂട്ടുകാരിയുടെ ചിത്രം അപ്ലോഡ് ചെയ്തിരുന്നത്. മറ്റു അംഗങ്ങളും തങ്ങളുടെ പെണ്‍സുഹൃത്തുക്കളുടെയും ബന്ധുക്കളുടെയും സുഹൃത്തുക്കളുടെയുമെല്ലാം സ്വകാര്യ ചിത്രങ്ങള്‍ ഗ്രൂപില്‍ ഷെയര്‍ ചെയ്തിരുന്നുവെന്നും പൊലീസ് കണ്ടെത്തി. ഇത്തരത്തില്‍ നൂറുകണക്കിന് യുവതികളുടെ ചിത്രങ്ങള്‍ ഈ ഗ്രൂപ് വഴി പ്രചരിക്കപ്പെട്ടിട്ടുണ്ടെന്നാണ് കണ്ടെത്തിയിരിക്കുന്നത്.