മുംബൈ: (KVARTHA) മഹാരാഷ്ട്രയിലെ ഗോന്ദിയ ജില്ലയിലെ ബിന്ദ്രവന ടോലയിൽ ബസ് മറിഞ്ഞ് 12 പേർ ദാരുണമായി മരിച്ചു. ഇരുപതോളം പേർക്ക് ഗുരുതരമായി പരിക്കേറ്റു. ഭണ്ടാരയിൽനിന്ന് ഗോന്ദിയയിലേക്ക് പോകുകയായിരുന്ന മഹാരാഷ്ട്ര സ്റ്റേറ്റ് ട്രാൻസ്പോർട്ട് ബസ് ആണ് അപകടത്തിൽപ്പെട്ടത്.

വെള്ളിയാഴ്ച 12.30 ഓടെയാണ് അപകടം. ഭണ്ഡാരയിൽ നിന്ന് സകോലി വഴി ഗോണ്ടിയയിലേക്ക് പുറപ്പെട്ടതായിരുന്നു ബസ്. ബൈക്ക് യാത്രികനെ ഇടിക്കാതിരിക്കാൻ ശ്രമിക്കുന്നതിനിടെ ബസിന്റെ നിയന്ത്രണം വിട്ട് അപകടത്തിലേക്ക് നയിച്ചുവെന്നാണ് പ്രാഥമിക അന്വേഷണത്തിൽ നിന്ന് വ്യക്തമാകുന്നത്. 35-ഓളം യാത്രക്കാർ ബസിൽ ഉണ്ടായിരുന്നു. അപകടത്തിന്റെ ഗൗരവം മനസ്സിലാക്കി ഉടൻ തന്നെ രക്ഷാപ്രവർത്തനം ആരംഭിച്ചു. പരിക്കേറ്റവരെ ഗോന്ദിയ ജില്ല ആശുപത്രിയിൽ പ്രവേശിപ്പിച്ചു. മരിച്ചവരുടെ മൃതദേഹങ്ങൾ പോസ്റ്റ്‌മോർട്ടത്തിനായി അയച്ചു.

ഈ ദുരന്തത്തിൽ മുഖ്യമന്ത്രി ഏക്‌നാഥ് ഷിന്ദെ ദുഃഖം പ്രകടിപ്പിച്ചു. മരിച്ചവരുടെ കുടുംബങ്ങൾക്ക് 10 ലക്ഷം രൂപയുടെ അടിയന്തര സഹായം നൽകാൻ ഗതാഗത വകുപ്പിനോട് നിർദ്ദേശിച്ചു.

അപകടത്തിന്റെ കാരണം കണ്ടെത്തുന്നതിനായി വിശദമായ അന്വേഷണം നടത്താൻ പൊലീസിന് നിർദേശം നൽകി. 

#MaharashtraAccident, #BusCrash, #Gondia, #FatalAccident, #MaharashtraNews, #BusMishap