Child Death | കുഞ്ഞിന്റെ നില അതീവ ഗുരുതരാവസ്ഥയിലാണെന്ന് പറഞ്ഞിട്ടും ചികിത്സ നല്‍കാന്‍ ഡോക്ടര്‍മാര്‍ തയാറായില്ലെന്ന് ആരോപണം; 5 വയസുകാരന് ദാരുണാന്ത്യം; അമ്മയുടെ മടിയില്‍ മരിച്ചു കിടക്കുന്ന ഋഷിയുടെ ചിത്രം സമൂഹമാധ്യമങ്ങളിലും നൊമ്പരമായി

മധ്യപ്രദേശിലെ ജബല്‍പുരിലാണ് രാജ്യത്തെ നടുക്കിയ സംഭവം റിപോര്‍ട് ചെയ്തിരിക്കുന്നത്. അമ്മയുടെ മടിയില്‍ മരിച്ചു കിടക്കുന്ന അഞ്ചു വയസ്സുകാരന്‍ ഋഷിയുടെ ചിത്രം സമൂഹമാധ്യമങ്ങളിലും നൊമ്പരമായി.

സംഭവത്തെ കുറിച്ച് കുഞ്ഞിന്റെ കുടുംബം പറയുന്നത്;

ജബല്‍പുരിലെ പ്രാഥമിക ആരോഗ്യ കേന്ദ്രത്തില്‍ അതീവ ഗുരുതരാവസ്ഥയിലുള്ള കുട്ടിയെ എത്തിച്ചിട്ട് മണിക്കൂറുകളോളം കാത്തിരുന്നിട്ടും ഡോക്ടര്‍മാരുടെയോ ആരോഗ്യ പ്രവര്‍ത്തകരുടെയോ സേവനം ലഭിച്ചില്ലെന്നു മരിച്ച കുട്ടിയുടെ പിതാവ് സഞ്ജയ് പാന്ദ്രെ പറയുന്നു.

മരണാസന്നനായ കുട്ടിയെ മാതാവിന്റെ മടിയില്‍ കിടത്തി മണിക്കൂറുകളോളം കുടുംബം ആരോഗ്യ കേന്ദ്രത്തിനു പുറത്ത് ഡോക്ടര്‍മാര്‍ വരുന്നതും കാത്തുനിന്നു. ഒടുവില്‍ ചികിത്സ കിട്ടാതെ മാതാപിതാക്കളുടെ കണ്‍മുന്നിലാണ് കുട്ടി മരിച്ചത്. കുട്ടിയുടെ മരണം സ്ഥിരീകരിക്കാന്‍ ഡോക്ടര്‍ എത്തിചേരാത്ത അവസ്ഥ പോലുമുണ്ടായി.

ഭാര്യ വ്രതം അനുഷ്ഠിക്കുന്നതിനാലാണ് കൃത്യസമയത്ത് എത്തിച്ചേരാന്‍ സാധിക്കാതിരുന്നതെന്നാണു പ്രാഥമിക ആരോഗ്യ കേന്ദ്രത്തിന്റെ ചുമതലയുള്ള ഡോക്ടര്‍ നല്‍കിയ വിശദീകരണമെന്ന് പ്രാദേശിക മാധ്യമങ്ങള്‍ റിപോര്‍ട് ചെയ്തു.

ജബല്‍പുരിലെ ആരോഗ്യ സംവിധാനങ്ങളെയും ആശുപത്രികളെയും കുറിച്ച് അടുത്തിടെ നിരവധി പരാതികള്‍ ഉയര്‍ന്നിരുന്നുവെങ്കിലും നടപടിയെടുക്കാന്‍ അധികൃതര്‍ ഇതുവരെയും തയാറായിരുന്നില്ല. പാവപ്പെട്ട രോഗികള്‍ക്കുള്ള സര്‍കാരിന്റെ സൗജന്യ ചികിത്സ ലഭ്യമാക്കുന്നതിനുള്ള ആയുഷ്മാന്‍ ഭാരത് ആരോഗ്യ ചികിത്സാ കാര്‍ഡ് ഉപയോഗിച്ച് തട്ടിപ്പ് നടത്തിയതിനു ജബല്‍പൂരിലെ ഡോക്ടര്‍ ദമ്പതികള്‍ക്കെതിരെ കഴിഞ്ഞ ദിവസം പൊലീസ് കേസെടുത്തിരുന്നു.