മഅദനി ആശുപത്രിയിലേക്ക്; തെരഞ്ഞെടുപ്പ് വിഷയമാക്കാന്‍ BJP യും യെദിയൂരപ്പയും
Dec 8, 2012, 10:49 IST
ബംഗളൂരുവിലെ അഗര്‍വാള്‍ സൂപ്പര്‍ സ്‌പെഷ്യാലിറ്റി ആശുപത്രിയിലാണു പ്രവേശിപ്പിക്കുക. ആവശ്യമെങ്കില്‍ ശസ്ത്രക്രിയ നടത്തും. ചികില്‍സയ്ക്ക് വേണ്ടി ജാമ്യം ലഭിക്കുന്നതിന് കര്‍ണാടക ഹൈക്കോടതിയില്‍ നല്‍കിയ ജാമ്യാപേക്ഷ കഴിഞ്ഞയാഴ്ച തള്ളിയിരുന്നു. സ്വന്തം ചെലവില്‍ ചികില്‍സ നടത്താനെങ്കിലും അനുവദിക്കണമെന്ന് ജാമ്യാപേക്ഷയില്‍ മഅ്ദനി അഭ്യര്‍ഥിച്ചിരുന്നു.
എന്നാല്‍ ജാമ്യം നേടി ചികില്‍സിക്കുന്നതിനു പകരം പോലീസ് കസ്റ്റഡിയില്‍ സ്വന്തം ചെലവില്‍ ചികില്‍സിക്കാനാണ് കോടതി നിര്‍ദേശിച്ചത്. അതിനെതിരേ സുപ്രീംകോടതിയില്‍ അപ്പീല്‍ നല്‍കുകയും സമാന്തരമായി ചികില്‍സ ആരംഭിക്കുകയും ചെയ്യാനാണ് പിഡിപി നേതൃത്വവും മഅ്ദനിയും തീരുമാനിച്ചിരിക്കുന്നത് എന്ന് അറിയുന്നു. ഡയബറ്റിക് റെറ്റിനോപ്പതി ബാധിച്ചാണ് അദ്ദേഹത്തിന്റെ കാഴ്ച നഷ്ടപ്പെട്ടത്. രണ്ടു വര്‍ഷത്തിലധികമായി ജയിലില്‍ കഴിയുന്ന അദ്ദേഹത്തിന് ശരിയായ ചികില്‍സ കിട്ടിയിരുന്നില്ലെന്ന് ചൂണ്ടിക്കാട്ടിയാണ് ജാമ്യത്തിനു ശ്രമിച്ചത്.
അതേസമയം, ആറു മാസം കഴിഞ്ഞു നടക്കാനിരിക്കുന്ന കര്‍ണാടക നിയമസഭാ തെരഞ്ഞെടുപ്പില്‍, മഅ്ദനിയെ ബംഗളൂരു സ്‌ഫോടന പരമ്പര കേസില്‍ അറസ്റ്റു ചെയ്യാന്‍ കഴിഞ്ഞത് ഏറ്റവും വലിയ ഭരണ നേട്ടമായി അവതരിപ്പിക്കാനാണ് ബിജെപി ഉദ്ദേശിക്കുന്നത്. ഇക്കാര്യത്തില്‍ പാര്‍ട്ടി കര്‍ണാടക ഘടകത്തിന് ദേശീയ നേതൃത്വത്തിന്റെ പച്ചക്കൊടിയും കിട്ടിക്കഴിഞ്ഞതായാണു വിവരം.
കേസില്‍ മഅ്ദനി 37-ാം പ്രതി മാത്രമാണെങ്കിലും അദ്ദേഹത്തിന്റെ അറസ്റ്റിനു ലഭിച്ച ദേശീയ മാധ്യമ ശ്രദ്ധയും ബിജെപിയുടെ വോട്ടുബാങ്കിനെ അത് സന്തോഷിപ്പിച്ചതും ഇനിയും മുതലെടുക്കാനാണ് തീരുമാനം. 2010 ആഗസ്റ്റ് 17ന് അറസ്റ്റു ചെയ്യപ്പെട്ട ശേഷം മഅ്ദനി നല്‍കിയ ജാമ്യാപേക്ഷകളെ പ്രത്യേക അന്വേഷണ സംഘം ശക്തമായി എതിര്‍ത്തിരുന്നു. ഇത്തവണയും പ്രോസിക്യൂഷന്‍ ശക്തമായി ജാമ്യാപേക്ഷയെ എതിര്‍ത്തെങ്കിലും, ചികില്‍സയ്ക്കു മാത്രമായി ഇടക്കാല ജാമ്യമെങ്കിലും അനുവദിക്കണം എന്നാണ് മഅ്ദനിയുടെ അഭിഭാഷകന്‍ ആവശ്യപ്പെട്ടത്.
ശസ്ത്രക്രിയയിലൂടെ മാത്രമേ കാഴ്ചശക്തി തിരിച്ചുകൊണ്ടുവരാന്‍ കഴിയുകയുളളു. അതിന് ജാമ്യം വേണമെന്നാണ് ആവശ്യപ്പെട്ടത്. ഇതിനെയും പ്രോസിക്യൂഷന്‍ എതിര്‍ത്തു. എന്നാല്‍ മഅ്ദനിയുടെ ചികില്‍സയ്ക്കു നിര്‍ദേശിക്കുന്ന ആശുപത്രികളോ ആശുപത്രിയോ ഏതാണെന്ന് അറിയിക്കാന്‍ കോടതി അദ്ദേഹത്തിന്റെ അഭിഭാഷകനോടു നിര്‍ദേശിച്ചിരുന്നു. അതിന്റെ അടിസ്ഥാനത്തില്‍ പിഡിപി സംസ്ഥാന ജനറല്‍ സെക്രട്ടറിയും മഅ്ദനിയുടെ ബന്്ധുവുമായ മുഹമ്മദ് റജീബ് കോടതിയില്‍ വിശദമായ സത്യവാങ്മൂലം നല്‍കിയിരുന്നു.
ജാമ്യം ലഭിച്ചാല്‍ അധികാര പരിധി വിട്ടുപോകില്ലെന്നും സ്വന്തം ചെലവില്‍ ചികില്‍സിച്ചുകൊള്ളാമെന്നും ജസ്റ്റിസ് നാഗ്് മോഹന്‍ദാസിനു നല്‍കിയ സത്യവാങ്മൂലത്തില്‍ വ്യക്തമാക്കിയിരുന്നു. ആയുര്‍വേദ പഞ്ചകര്‍മ ചികില്‍സയ്ക്കായി ബംഗളൂരുവിലെ സൗഖ്യ ആശുപത്രി, കണ്ണിന്റെ ചികില്‍സയ്ക്ക് അഗര്‍വാള്‍ സൂപ്പര്‍സ്‌പെഷ്യാലിറ്റി ആശുപത്രി എന്നിവിടങ്ങളില്‍ പ്രവേശിപ്പിക്കണം എന്നും ഭാര്യയെയും മക്കളെയും കൂടെ നില്‍ക്കാന്‍ അനുവദിക്കണം എന്നുമാണ് ആവശ്യപ്പെട്ടത്. എന്നാല്‍ ഭാര്യയെയും മക്കളെയും കൂടെ നിര്‍ത്താന്‍ അനുമതി ലഭിച്ചിട്ടില്ല.
ബംഗളൂരു സ്‌ഫോടനക്കേസിലെ പ്രതിയായ കേരളത്തിലെ പ്രമുഖ മുസ്ലിം നേതാവിനെ അദ്ദേഹത്തിന്റെ ആസ്ഥാനത്തുനിന്ന് കേരള പോലീസിനെക്കൊണ്ടുതന്നെ അറസ്റ്റു ചെയ്യിച്ച് ഏറ്റെടുക്കാന്‍ കഴിഞ്ഞതാണ് ബിജെപിയുടെ മുഖ്യ അവകാശ വാദം. തെരഞ്ഞെടുപ്പിനു മുമ്പ് അദ്ദേഹംജാമ്യംനേടി പുറത്തുപോയാല്‍ തെരഞ്ഞെടുപ്പു പ്രചാരണ രംഗത്ത് ഈ അവകാശവാദത്തിനു പ്രസക്തിയില്ലാതാകുമെന്ന് ബിജെപി നേതൃത്വത്തിനു ഭയമുണ്ട്. അതുകൊണ്ടാണ് സര്‍ക്കാര്‍ നിര്‍ദേശ പ്രകാരം പ്രത്യേക അന്വേഷണ സംഘത്തിനു വേണ്ടി പ്രോസിക്യൂഷന്‍ കടുത്ത നിലപാട് ആവര്‍ത്തിച്ചു സ്വീകരിക്കുന്നത്.
കര്‍ണാടക ബിജെപി സര്‍്ക്കാരിലെ ആദ്യ മുഖ്യമന്ത്രി ബി എസ് യെദിയൂരപ്പയുടെ കാലത്താണ് മഅ്ദനിയെ അറസ്റ്റു ചെയ്തത്. പിന്നീട് അഴിമതിക്കേസില്‍ യെദിയൂരപ്പയ്ക്ക് മുഖ്യമന്ത്രി കസേര നഷ്ടപ്പെട്ടു. പി്ന്നീടുവന്ന സദാനന്ദ ഗൗഡയുടെ സര്‍ക്കാരും അതിനു ശേഷം അധികാരമേറ്റ ജഗ്ദീഷ് ഷെട്ടാറിന്റെ സര്‍ക്കാരും മഅ്ദനിയുടെ കാര്യത്തില്‍ കടുകിട വ്യത്യാസമില്ലാത്ത നിലപാടാണ് സ്വീകരിച്ചതും സ്വീകരിക്കുന്നതും. ഇതാകട്ടെ ബിജെപിയുടെ ആലോചിച്ചുറച്ച നയത്തിന്റെ ഭാഗമാണത്രേ. അതിന്റെ തുടര്‍ച്ചയാണ് അടുത്ത തെരഞ്ഞെടുപ്പിലെ പ്രചാരണ തന്ത്രത്തില്‍ മഅ്ദനി വിഷയം മുഖ്യ വിഷയമാക്കുന്നത്.
ദക്ഷിണേന്ത്യയിലെ ആദ്യ ബിജെപി സര്‍ക്കാര്‍ അഴിമതി ആരോപണത്തില്‍ മുങ്ങുകയും മൂന്നു മുഖ്യമന്ത്രിമാര്‍ വരികയും വേണ്ടിവന്നത് കോണ്‍ഗ്രസും മറ്റും പ്രചാരണായുധമാക്കുമെന്ന് ബിജെപി കണക്കുകൂട്ടുന്നു. അതിനെ മറികടക്കാനുള്ള ആയുധമാണ് മഅ്ദനി. ബിജെപി വി്ട്ട് മറ്റൊരു രാഷ്ട്രീയ കക്ഷി രൂപീകരിച്ച് ബിജെപിക്ക് ബദലാകാന്‍ ശ്രമിക്കുന്ന യെദിയൂരപ്പക്ക് രാഷ്ട്രീയമായി മറുപടി കൊടുക്കാനും മഅ്ദനി വിഷയം മുന്നില്‍ നിര്‍ത്തണം. താനാണ് മഅ്ദനിയെ പിടിച്ചുകൊണ്ടുവന്നത് എന്നതായിരിക്കും യെദിയൂരപ്പയുടെ പ്രചാരണമെന്ന് ബിജെപി മണത്തറിഞ്ഞിട്ടുണ്ട്.
Keywords: Bangalore, Article, Election, Abdul Nasar Madani, Hospital, Karnataka, High Court, Bail, Malayalam News.
ഇവിടെ വായനക്കാർക്ക് അഭിപ്രായങ്ങൾ
രേഖപ്പെടുത്താം. സ്വതന്ത്രമായ
ചിന്തയും അഭിപ്രായ പ്രകടനവും
പ്രോത്സാഹിപ്പിക്കുന്നു. എന്നാൽ
ഇവ കെവാർത്തയുടെ അഭിപ്രായങ്ങളായി
കണക്കാക്കരുത്. അധിക്ഷേപങ്ങളും
വിദ്വേഷ - അശ്ലീല പരാമർശങ്ങളും
പാടുള്ളതല്ല. ലംഘിക്കുന്നവർക്ക്
ശക്തമായ നിയമനടപടി നേരിടേണ്ടി
വന്നേക്കാം.
