ലക്ഷദ്വീപിൽ ബുധനാഴ്ചകളിൽ 'വാഹന നിരോധനം'; 'ഇവിടെ എവിടെയാണ് മലിനീകരണം?' ഐഷ സുൽത്താനയുടെ വിമർശനം

കവരത്തി: (KVARTHA) ലക്ഷദ്വീപിൽ ആഴ്ചയിൽ ഒരു ദിവസം വാഹന ഉപയോഗം നിരോധിച്ചുകൊണ്ട് അഡ്മിനിസ്ട്രേഷൻ പുറത്തിറക്കിയ ഉത്തരവിനെതിരെ പ്രതിഷേധം പുകയുന്നു. 2026 ഫെബ്രുവരി 25 മുതൽ പ്രാബല്യത്തിൽ വരുന്ന ഉത്തരവ് പ്രകാരം എല്ലാ ബുധനാഴ്ചയും ദ്വീപുകളിൽ 'നോ വെഹിക്കിൾ ഡേ' (No Vehicle Day) ആയിരിക്കും. ഈ ദിവസങ്ങളിൽ സ്വകാര്യ വാഹനങ്ങൾ നിരത്തിലിറക്കിയാൽ 500 രൂപ പിഴ ഈടാക്കുമെന്ന് ഉത്തരവിൽ പറയുന്നു.

ഉത്തരവിലെ വിചിത്ര നിർദ്ദേശങ്ങൾ 

ലക്ഷദ്വീപ് ജനറൽ അഡ്മിനിസ്ട്രേഷൻ ആൻഡ് പ്രോട്ടോക്കോൾ വകുപ്പ് ഫെബ്രുവരി 17-ന് പുറത്തിറക്കിയ ഉത്തരവ് (F.No.LD-23008/3/2026-GENL-GA-P) പ്രകാരം:

എല്ലാ ബുധനാഴ്ചയും മോട്ടോർ വാഹനങ്ങൾക്ക് പൂർണ്ണ നിരോധനമായിരിക്കും.

ഭിന്നശേഷിക്കാർക്കുള്ള വാഹനങ്ങൾ, സുരക്ഷാ ഉദ്യോഗസ്ഥരുടെ വാഹനങ്ങൾ, അടിയന്തിര മെഡിക്കൽ ആവശ്യങ്ങൾക്കുള്ള വാഹനങ്ങൾ എന്നിവയ്ക്ക് മാത്രമേ ഇളവ് ലഭിക്കൂ.

ദ്വീപ് നിവാസികളുടെ ആരോഗ്യം മെച്ചപ്പെടുത്തുന്നതിനായി നടത്തം, സൈക്ലിംഗ് എന്നിവ പ്രോത്സാഹിപ്പിക്കുക, വാഹനങ്ങളിൽ നിന്നുള്ള മലിനീകരണം കുറയ്ക്കുക എന്നിവയാണ് ലക്ഷ്യമെന്ന് ജില്ലാ കളക്ടർ ഡോ. ആർ. ഗിരി ശങ്കർ ഐ.എ.എസ് ഒപ്പിട്ട ഉത്തരവിൽ വ്യക്തമാക്കുന്നു.

ഐഷ സുൽത്താനയുടെ വിമർശനം 

ശുദ്ധവായുവിന് പേരുകേട്ട ലക്ഷദ്വീപിൽ മലിനീകരണം നിയന്ത്രിക്കാനെന്ന പേരിൽ വാഹന നിരോധനം ഏർപ്പെടുത്തിയതിനെതിരെ സിനിമാ പ്രവർത്തകയും ആക്ടിവിസ്റ്റുമായ ഐഷ സുൽത്താന (Aisha Sultana) രംഗത്തെത്തി. 'ആയിഷ ലക്ഷദ്വീപ്' എന്ന ഫേസ്‌ബുക്ക് പേജിലൂടെ അവർ ഉത്തരവിനെതിരെ രൂക്ഷമായ പരിഹാസമാണ് ഉയർത്തിയത്.

ഐഷയുടെ ഫേസ്‌ബുക്ക് പോസ്റ്റിലെ പ്രധാന ഭാഗങ്ങൾ:

മലിനീകരണം എവിടെ?: ‘ഇത്രയും നല്ല ശുദ്ധവായു ഉള്ള ലക്ഷദ്വീപിൽ എവിടെയാണ് പൊല്യൂഷൻ? ഇന്ത്യയുടെ തലസ്ഥാനമായ ഡൽഹിയിലെ പൊല്യൂഷൻ വല്ല ജെഫ്രി എപ്സ്റ്റിൻ കാറ്റടിച്ചപ്പോൾ എങ്ങാനും ലക്ഷദ്വീപിലേക്ക് വഴി മാറി വീശിയതാണോ?’ അവർ ചോദിക്കുന്നു.

ഉദ്യോഗസ്ഥർക്ക് ബാധകമോ?: ‘ഈ നിയമപ്രകാരം ഇനി വരുന്ന ബുധനാഴ്ച ദിവസങ്ങളിൽ എല്ലാ ഗവൺമെന്റ് ഉദ്യോഗസ്ഥരും അവരവരുടെ ഓഫീസുകളിലേക്കും മറ്റുമായി നടന്നും സൈക്കിൾ ചവിട്ടിയും പോകുന്നതായിരിക്കും അല്ലെ?’ എന്ന് ചോദിക്കുന്ന അവർ, ഉദ്യോഗസ്ഥർ ഈ നിയമം പാലിച്ച് ജനങ്ങൾക്ക് മാതൃകയാകണമെന്നും ആവശ്യപ്പെടുന്നു.

ആരാണ് ഐഷ സുൽത്താന? 

ലക്ഷദ്വീപ് ചെത്‌ലാത്ത് ദ്വീപ് സ്വദേശിനിയായ ഐഷ സുൽത്താന പ്രമുഖ സിനിമാ സംവിധായികയും മോഡലും സാമൂഹിക പ്രവർത്തകയുമാണ്.

പോരാട്ട ചരിത്രം: ലക്ഷദ്വീപ് അഡ്മിനിസ്‌ട്രേറ്റർ പ്രഫുൽ ഖോഡ പട്ടേലിന്റെ ഭരണപരിഷ്കാരങ്ങൾക്കെതിരെ ശക്തമായി ശബ്ദമുയർത്തിയ വ്യക്തിയാണ് ഐഷ. അഡ്മിനിസ്‌ട്രേറ്ററെ 'ബയോ വെപ്പൺ' (ജൈവായുധം) എന്ന് വിശേഷിപ്പിച്ചതിന്റെ പേരിൽ അവർക്കെതിരെ മുൻപ് രാജ്യദ്രോഹക്കുറ്റം ചുമത്തിയിരുന്നു. ഇത് ദേശീയ തലത്തിൽ തന്നെ വലിയ ചർച്ചയായിരുന്നു.

സിനിമ: 'ഫ്ലഷ്' (Flush) എന്ന സിനിമയിലൂടെ സ്വതന്ത്ര സംവിധായികയായി അരങ്ങേറ്റം കുറിച്ച ഐഷ, ദ്വീപിന്റെ തനതായ പ്രശ്നങ്ങളും സൗന്ദര്യവും കലയിലൂടെയും പുറംലോകത്തെത്തിക്കാൻ ശ്രമിക്കുന്നു.

വാഹന നിരോധനം നടപ്പിലാക്കുന്നതിലൂടെ ദ്വീപ് നിവാസികളുടെ സഞ്ചാരസ്വാതന്ത്ര്യത്തെ തടയുകയാണെന്നും, അശാസ്ത്രീയമായ പരിഷ്കാരമാണിതെന്നും വിമർശകർ ചൂണ്ടിക്കാട്ടുന്നു. ഫെബ്രുവരി 25 മുതൽ നിയമം കർശനമാക്കാനാണ് അധികൃതരുടെ തീരുമാനം.

ഐഷ സുൽത്താനയുടെ ഫൈസ്ബുക്ക് പോസ്റ്റിൻ്റെ പൂർണ്ണ രൂപം:

പ്രിയ സുഹൃത്തുക്കളെ ലക്ഷദ്വീപ് ഗവർമെന്റ് വീണ്ടും അതി വിചിത്രമായൊരു ഓഡർ പുറപ്പെടുവിച്ചിരിക്കുകയാണ്... ഈ ഓഡർ പ്രകാരം ലക്ഷദ്വീപിൽ ബുധനാഴ്ച്ച ദിവസം ആരും ബൈക്കോ മറ്റു വാഹനങ്ങളൊ ഉപയോഗിക്കരുത് എന്നാണ്. ഇതൊക്കെ ലക്ഷദ്വീപിലെ പൊല്യൂഷൻ കണ്ട്രോൾ ചെയ്യാൻ ആണെന്നാണ് മുതലാളിമാർ പറയുന്നത്... എന്നാൽ എനിക്ക് മനസ്സിലാവാത്ത കാര്യം

: ലക്ഷദ്വീപിൽ എവിടെയാണ് പൊല്യൂഷൻ?

ഇത്രയും നല്ല ശുദ്ധവായു ഉള്ള ലക്ഷദ്വീപിൽ പൊല്യൂഷനോ?

ഇനിയെങ്ങാനും ഇന്ത്യയുടെ തലസ്ഥാനമായ ഡൽഹിയിലെ പൊല്യൂഷൻ വല്ല ജെഫ്രി എപ്സ്റ്റിൻ കാറ്റടിച്ചപ്പോൾ എങ്ങാനും ലക്ഷദ്വീപിലേക്ക് വഴി മാറി വീശിയതാണോ? ആവാം... ബിജെപി നേതാക്കന്മാർ ഇങ്ങനെയാണല്ലോ വ്യാഖ്യാനിക്കുക  സ്വാഭാവികം  അപ്പൊ ഈ ഓഡർ പ്രകാരം ഇനിയുള്ള ബുധനാഴ്ച്ച ദിവസങ്ങളിൽ ആരും വാഹനം ഉപയോഗിക്കരുത് എന്നാണ് അല്ലെ? അങ്ങനെയെങ്കിൽ ലക്ഷദ്വീപിലെ ഗവർമെന്റ് ഉദ്യോഗസ്ഥർക്കും ഈ നിയമം ബാധകമാണലല്ല.. ല്ല.. ല്ല ല്ലോ അല്ലെ... ഈ നിയമപ്രകാരം ഇനി വരുന്ന ബുധനാഴ്ച ദിവസങ്ങളിൽ എല്ലാ ഗവർമെന്റ് ഉദ്യോഗസ്ഥരും അവരവരുടെ ഓഫീസുകളിലേക്കും മറ്റുമായി നടന്നും സൈക്കിൾ ചെവിട്ടിയും പോകുന്നതായിരിക്കും അല്ലെ... ലക്ഷദ്വീപ് ഉദ്യോഗസ്ഥർ ഈ നിയമം പാലിച്ചു കൊണ്ട് ജനങ്ങൾക്ക് മാതൃകയാവാണമെന്നാണ് എന്റെയൊരു ചെറിയ അഭിപ്രായം... നിങ്ങളുടെയോ?

‘ഡൽഹിയിലെ പൊല്യൂഷൻ ലക്ഷദ്വീപിനേ ചതിച്ചതാ’

പുതിയ വാർത്തകൾ സമയബന്ധിതമായി അറിയാൻ ഞങ്ങളുടെ വാട്സ്ആപ്പ് ചാനൽ ഫോളോ ചെയ്യുക. ഈ വാർത്ത ഷെയർ ചെയ്യൂ. അഭിപ്രായം കമന്റായി രേഖപ്പെടുത്താനും മറക്കരുത്.

Article Summary: The Lakshadweep administration has declared Wednesdays as 'No Vehicle Day' starting February 25, 2026. Activist Aisha Sultana has criticized the move, questioning the logic of pollution control in an area known for pure air.

#Lakshadweep #AishaSultana #NoVehicleDay #PollutionControl #LakshadweepAdministration #Protest #Environment #KVARTHA