ലഡാക്കിൽ സംസ്ഥാന പദവി ആവശ്യപ്പെട്ടുള്ള പ്രക്ഷോഭം അക്രമാസക്തം; നാലുപേർ കൊല്ലപ്പെട്ടു; നിരവധി പേർക്ക് പരിക്ക്

ലേ: (KVARTHA) സംസ്ഥാന പദവി ആവശ്യപ്പെട്ട് ലഡാക്കിൽ നടക്കുന്ന പ്രതിഷേധം അക്രമാസക്തമായതോടെ നടന്ന ഏറ്റുമുട്ടലിൽ നാലുപേർ കൊല്ലപ്പെട്ടു. എഴുപതോളം പേർക്ക് പരിക്കേറ്റതായും റിപ്പോർട്ടുകളുണ്ട്. കേന്ദ്ര ഭരണ പ്രദേശത്ത് സംഘർഷം രൂക്ഷമായതിനെ തുടർന്ന് നിരോധനാജ്ഞ ഏർപ്പെടുത്തി. ബന്ധപ്പെട്ട അതോറിറ്റിയുടെ മുൻകൂർ അനുമതിയില്ലാതെ ഘോഷയാത്രയോ റാലിയോ നടത്താൻ പാടില്ലെന്ന് ലേ ജില്ലാ മജിസ്ട്രേറ്റ് റോമിൽ സിങ് ഡോങ്ക് പറഞ്ഞു.

സംസ്ഥാന പദവി, ഭരണഘടനയുടെ ആറാം ഷെഡ്യൂളിൽ (Sixth Schedule) ഉൾപ്പെടുത്തുക എന്നീ ആവശ്യങ്ങൾ കേന്ദ്രസർക്കാർ അംഗീകരിക്കുന്നതിൽ പരാജയപ്പെട്ടുവെന്ന് ആരോപിച്ചാണ് യുവാക്കൾ തെരുവിലിറങ്ങിയത്. പ്രതിഷേധ പ്രകടനങ്ങൾക്കിടെ ഒരു വിഭാഗം യുവാക്കൾ പോലീസിന് നേരെ കല്ലെറിയുകയും ലേയിലെ ബി.ജെ.പി ഓഫീസിന് തീയിടുകയും ചെയ്തു. സ്ഥിതിഗതികൾ വഷളായതോടെ പോലീസും അർധസൈനിക വിഭാഗവും കണ്ണീർ വാതകം പ്രയോഗിക്കുകയും ലാത്തിവീശുകയും ചെയ്തു.

സെപ്റ്റംബർ പത്തിന് സംസ്ഥാന പദവി ആവശ്യപ്പെട്ട് ആക്ടിവിസ്റ്റും വിദ്യാഭ്യാസ പ്രവർത്തകനുമായ സോനം വാങ്ചുക് ഉൾപ്പെടെ പതിനഞ്ച് പേർ നിരാഹാര സമരം ആരംഭിച്ചിരുന്നു. സമരത്തിൽ പങ്കെടുത്ത രണ്ട് പേരുടെ ആരോഗ്യനില വഷളായതിനെ തുടർന്ന് ആശുപത്രിയിലേക്ക് മാറ്റിയതോടെയാണ് പ്രതിഷേധക്കാർക്ക് ആവേശം വർധിച്ചത്. ഇതിന് പിന്നാലെ ലേ നഗരം പൂർണമായി അടച്ചിടാൻ ലെ അപെക്സ് ബോഡി (എൽഎബി) ആഹ്വാനം ചെയ്തു. അതേസമയം, പ്രതിഷേധം അക്രമാസക്തമായതോടെ അക്രമം അവസാനിപ്പിക്കണമെന്ന് ആവശ്യപ്പെട്ട് സോനം വാങ്ചുക് നിരാഹാരം അവസാനിപ്പിച്ചു. 'ഇത്തരം അസംബന്ധപരമായ കാര്യങ്ങൾ ഒഴിവാക്കണമെന്ന് യുവജനതയോട് അഭ്യർത്ഥിക്കുകയാണ്. ഇത് നമ്മുടെ ആവശ്യത്തിന്മേൽ നഷ്ടങ്ങൾ വരുത്തും,'- വാങ്ചുക് സമൂഹമാധ്യമമായ എക്സിൽ കുറിച്ചു.

അക്രമം അവസാനിപ്പിക്കാൻ ആഹ്വാനം ചെയ്‌ത സോനം വാങ്ചുക് നിരാഹാരം അവസാനിപ്പിക്കുകയാണെന്നും അറിയിച്ചു. അതേസമയം കോൺഗ്രസാണ് സംഘർഷത്തിന് പിന്നിലെന്ന് ബി.ജെ.പി. ആരോപിച്ചു. ഒരു കോൺഗ്രസ് നേതാവ് കലാപത്തിന് ആഹ്വാനം ചെയ്യുന്നെന്ന് അവകാശപ്പെട്ട് ബിജെപി വീഡിയോയും പുറത്തുവിട്ടു. ലഡാക്കിലെ വിവിധ സംഘടനകളുമായി ഒക്ടോബർ ആറിന് കേന്ദ്രസർക്കാർ ചർച്ച നടത്താനിരിക്കെയാണ് സംഘർഷം നടന്നത്.

ഈ വിഷയത്തെക്കുറിച്ച് നിങ്ങളുടെ അഭിപ്രായം എന്താണ്? കമന്റ് ചെയ്യൂ.

Article Summary: Four people killed in violent protests in Ladakh; curfew imposed.

#LadakhProtest #Statehood #SixthSchedule #SonamWangchuk #Leh #IndianPolitics