എം.കെ. അഴഗിരിയെ ഡിഎംകെയില്‍ നിന്നും പുറത്താക്കി

ചെന്നൈ: പാര്‍ട്ടി വിരുദ്ധ പ്രവര്‍ത്തനങ്ങള്‍ നടത്തിയെന്നാരോപിച്ച് മുന്‍ കേന്ദ്രമന്ത്രിയും ഡിഎംകെ അധ്യക്ഷന്‍ എം. കരുണാനിധിയുടെ മകനുമായ എം.കെ. അഴഗിരിയെ ഡിഎംകെയില്‍ നിന്നും പുറത്താക്കി. താല്‍ക്കാലികമായാണ് പുറത്താക്കിയതെന്നാണ് പാര്‍ട്ടിയോട് അടുത്ത വൃത്തങ്ങള്‍ പറയുന്നത്.

ജനുവരി  ആദ്യം അഴഗിരിയുടെ അഞ്ച് അനുയായികളെ പാര്‍ട്ടിയില്‍ നിന്നും സസ്‌പെന്‍ഡ് ചെയ്തിരുന്നു. മധുരയിലെ വിവാദ പോസ്റ്ററിനു പിന്നില്‍ പ്രവര്‍ത്തിച്ചവരെന്ന് ആരോപിച്ചാണ് സസ്‌പെന്‍ഡ് ചെയ്തത്. പി.എം. മന്നന്‍, എസ്. ഏഴില്‍ മന്നന്‍, മുബാറക് , അന്‍പരസ് ഇളങ്കോ, എം. ബാലാജി എന്നിവരാണു സസ്‌പെന്‍ഡ് ചെയ്യപ്പെട്ട അംഗങ്ങള്‍. പി.എം. മന്നനും എസ്.ഏഴില്‍മന്നനും പാര്‍ട്ടിയുടെ നിര്‍വാഹക സമിതി, ജനറല്‍ കൗണ്‍സില്‍ അംഗങ്ങളാണ്.

അഴഗിരിയുടെ ശക്തികേന്ദ്രമായി മധുരയെ മാറ്റിയെടുക്കാന്‍ കഠിനാധ്വാനം ചെയ്തവരാണു മന്നനും ഏഴില്‍ മന്നനും.  ജനുവരി 30നു നടക്കുന്ന അഴഗിരിയുടെ പിറന്നാളാഘോഷമാണു പാര്‍ട്ടിയുടെ യഥാര്‍ത്ഥ ജനറല്‍ കൗണ്‍സില്‍ യോഗമെന്ന തരത്തിലുള്ള  പോസ്റ്ററുകള്‍ കുറച്ചു ദിവസങ്ങള്‍ക്കു മുന്‍പു മധുരയിലെ ചുമരുകളില്‍ പ്രത്യക്ഷപ്പെട്ടിരുന്നു.

എന്നാല്‍ പോസ്റ്ററുകള്‍ ചുമരുകളില്‍ ഒട്ടിച്ചവര്‍ അവ നീക്കി മാപ്പു പറയണമെന്നു കരുണാനിധി കര്‍ശന നിര്‍ദേശം നല്‍കിയിരുന്നു. എന്നാല്‍ പോസ്റ്ററുകള്‍ നീക്കാന്‍ തയ്യാറാകാത്ത സ്ഥിതിക്കാണ് അംഗങ്ങളുടെ സസ്‌പെന്‍ഷന്‍ എന്ന് ഡിഎംകെ ജനറല്‍ സെക്രട്ടറി കെ. അന്‍പഴകന്‍ അറിയിച്ചു.

അഴഗിരിക്കും സ്റ്റാലിനും ഇടയിലുള്ള പ്രശ്‌നങ്ങള്‍ പരിഹരിക്കാന്‍ പാര്‍ട്ടി
നേതൃത്വവും അടുത്ത കുടുംബാംഗങ്ങളും ശ്രമിച്ചിരുന്നുവെങ്കിലും ഫലമുണ്ടായില്ല.
എസ്.വൈ.എസ് കാസര്‍കോട് ജില്ല ത്വൈബ സ്‌പെഷല്‍മീറ്റ് വെള്ളിയാഴ്ച വിദ്യാനഗറില്‍