Court Verdict | ഒരു സ്ത്രീ കുറ്റാരോപിതയായത് കൊണ്ടുമാത്രം വിചാരണ നടക്കാതെ അവർ അപമാനവും അനാദരവും അർഹിക്കുന്നവരാണ് എന്നർഥമാക്കേണ്ടതില്ലെന്ന് കോടതി

ന്യൂഡെൽഹി: (www.kvartha.com) ഒരു സ്ത്രീ കുറ്റാരോപിതയാണെങ്കിലും കോടതിവിചാരണ നടക്കാതെ അവർ സമൂഹത്തിൽ

അപമാനവും അനാദരവും അർഹിക്കുന്നവരാണ് എന്നർഥമാക്കേണ്ടതില്ലെന്ന് ഡെൽഹി കർകർദൂമ കോടതി നിരീക്ഷിച്ചു. 2002ൽ ഡെൽഹി നോർത്ത് ജില്ലയിലെ സൈബർ പൊലീസ് സ്റ്റേഷനിൽ രജിസ്റ്റർ ചെയ്ത കേസിൽ ഐപിസി സെക്ഷൻ 507, 509, ഐടി നിയമത്തിലെ വകുപ്പുകൾ എന്നിവ പ്രകാരം കുറ്റാരോപിതയായ നീലം ശർമ എന്ന യുവതി നൽകിയ ഹർജി പരിഗണിക്കുകയായിരുന്നു കോടതി
                       
                


ഒരു ഇംഗ്ലീഷ് ദിനപത്രത്തിൽ പ്രസിദ്ധീകരിച്ച ലേഖനം തന്റെ പ്രശസ്തി അപകീർത്തിപ്പെടുത്തുകയും ദ്രോഹിക്കുകയും ചെയ്തുവെന്ന് ചൂണ്ടിക്കാട്ടിയാണ് നീലം ശർമ കോടതിയെ സമീപിച്ചത്. ഭരണഘടനയുടെ ആർട്ടിക്കിൾ 21 പ്രകാരം വിഭാവനം ചെയ്തിട്ടുള്ള ‘വ്യക്തി സ്വാതന്ത്ര്യം’ ലംഘിക്കപ്പെട്ടതായും കോടതി അഭിപ്രായപ്പെട്ടു.

'ഒരു കോടതിയിൽ ന്യായമായ വിചാരണ നേരിടുന്ന സാഹചര്യത്തിൽ ഒരാളെ തൂക്കിലേറ്റാൻ കഴിയുമോ ഇല്ലയോ എന്ന് വിധിക്കരുത്. അത്തരമൊരു വ്യക്തിയെ വിചാരണയ്ക്ക് മുമ്പ് തൂക്കിലേറ്റുന്നത് അഭികാമ്യമല്ല, നിയമ തത്വങ്ങളുടെ ലംഘനവുമാണ്. ചിലപ്പോൾ, മാധ്യമങ്ങൾ പരിധി ലംഘിക്കുകയും അതിന്റെ യാഥാർഥ്യത്തിൽ നിന്ന് വ്യത്യസ്തമായ രീതിയിൽ കാര്യങ്ങൾ അവതരിപ്പിക്കുകയും ചെയ്‌തേക്കാം. കോടതി ശിക്ഷിക്കുന്നതിന് മുമ്പ് ഒരു വ്യക്തിയെയും സമൂഹത്തിലെ അവരുടെ പ്രശസ്തിയെയും സംരക്ഷിക്കുക എന്നതാണ് കോടതിയുടെ കടമ എന്നതിൽ രണ്ട് അഭിപ്രായങ്ങളില്ല', പ്രിൻസിപൽ ഡിസ്ട്രിക്ട് ആൻഡ് സെഷൻസ് ജഡ്‌ജ്‌ ദീപക് ജഗോത്ര നിരീക്ഷിച്ചു.

നീലം ശർമ സ്ത്രീയായതിനാലും ഏത് സാഹചര്യത്തിലും സമൂഹത്തിൽ അവരുടെ അന്തസ് സംരക്ഷിക്കണമെന്നും അവർക്ക് അനുകൂലമായ സാഹചര്യമുണ്ടെന്നും കോടതി വ്യക്തമാക്കി. ഏതെങ്കിലും ലേഖനം പ്രസിദ്ധീകരിക്കുന്നതിനും പുനഃപ്രസിദ്ധീകരിക്കുന്നതിനും പ്രചരിക്കുന്നതിനും കോടതി ഇടക്കാല നിരോധനം ഏർപെടുത്തി ഉത്തരവിട്ടു.