ന്യൂഡൽഹി: (KVARTHA) രാജ്യസഭയിൽ നടന്ന വഖഫ് ബോർഡ് ബിൽ ചർച്ചയിൽ സി.പി.എം എം.പി ജോൺ ബ്രിട്ടാസ് നടത്തിയ പ്രസംഗം സാമൂഹ്യ മാധ്യമങ്ങളിൽ തരംഗമായി. രാഷ്ട്രീയപരമായ ഭിന്നതകൾ മറന്ന് നിരവധി പേരാണ് ബ്രിട്ടാസിന്റെ വാക്ചാതുര്യത്തെയും വിഷയത്തിലുള്ള അദ്ദേഹത്തിന്റെ ആഴത്തിലുള്ള അറിവിനെയും പ്രശംസിച്ചത്. പ്രസംഗത്തിനിടെ കേന്ദ്രമന്ത്രി സുരേഷ് ഗോപിക്കെതിരെ ബ്രിട്ടാസ് നടത്തിയ പരാമർശങ്ങളും  ശ്രദ്ധ നേടി.

പുറത്തിറങ്ങിയ സൂപ്പർഹിറ്റ് സിനിമയായ എമ്പുരാനിലെ 'മുന്ന' എന്ന കഥാപാത്രത്തെ പേരെടുത്തു പറയാതെ ബ്രിട്ടാസ് സുരേഷ് ഗോപിയുമായി ഉപമിച്ചത് സഭയിൽ ചിരി പടർത്തി. കേരളത്തിലെ മുനമ്പം ഉൾപ്പെടെയുള്ള വിഷയങ്ങളിൽ ബി.ജെ.പി നടത്തുന്ന  പ്രചാരണങ്ങളെയും, മധ്യപ്രദേശിലെ ജബൽപൂരിൽ ക്രിസ്ത്യാനികൾക്കെതിരെ നടന്ന അക്രമണങ്ങളെയും പരാമർശിക്കുന്നതിനിടയിലാണ് ബ്രിട്ടാസ് സുരേഷ് ഗോപിയെ രൂക്ഷമായി വിമർശിച്ചത്. എമ്പുരാനിലെ മുന്നയെപ്പോലെ ഒരാൾ ഇവിടെയുമുണ്ടെന്നും, കേരളത്തിലെ ജനങ്ങൾക്ക് ആ മുന്നയെ തിരിച്ചറിയാൻ സാധിക്കുമെന്നും ബ്രിട്ടാസ് പറഞ്ഞു. മലയാളികൾക്ക് ഒരു തെറ്റ് സംഭവിച്ചിട്ടുണ്ട്, അത് അവർ വൈകാതെ തിരുത്തും. നേമത്തെ ബി.ജെ.പി അക്കൗണ്ട് പൂട്ടിച്ചതുപോലെ തൃശൂരിലെ അക്കൗണ്ടും പൂട്ടിക്കുമെന്നും അദ്ദേഹം പറഞ്ഞു. 

ചർച്ചയ്ക്കിടെ ഓസ്ട്രേലിയൻ മിഷനറി ഗ്രഹാം സ്റ്റെയിനെയും ഫാദർ സ്റ്റാൻ സ്വാമിയെയും ബ്രിട്ടാസ് അനുസ്മരിച്ചു. നിങ്ങൾ രണ്ട്, മൂന്ന് ദിവസമായി ക്രിസ്ത്യാനി, കേരള, മുനമ്പം എന്നൊക്കെ പറയുന്നുണ്ടല്ലോ. സ്റ്റാൻ സ്വാമിയെ മറക്കാൻ പറ്റുമോ?
പാർക്കിൻസൺസ് രോഗം വന്ന് ഒരു തുള്ളി വെള്ളം കുടിക്കാൻ കഴിയാതെ ഒരു സ്‌ട്രോയ്ക്ക് വേണ്ടി കരഞ്ഞ മനുഷ്യൻ. അദ്ദേഹത്തെ നിങ്ങൾ ജയിലിലിട്ട് കൊന്നില്ലേ? ഗ്രഹാം സ്‌റ്റെയിനെ മറക്കാൻ പറ്റുമോ? മക്കളോടൊപ്പം ചുട്ടുകൊന്നില്ലേയെന്നും അദ്ദേഹം ചോദിച്ചു.

ഉത്തരേന്ത്യയിൽ ഓരോ ദിവസവും ക്രിസ്ത്യാനികൾക്കെതിരെ അക്രമങ്ങൾ വർധിച്ചു വരികയാണ്. ഇന്നും ജബൽപൂരിൽ അക്രമം നടന്നു. കഴിഞ്ഞ വർഷം മാത്രം 700-ൽ അധികം അക്രമണങ്ങളാണ് ക്രിസ്ത്യാനികൾക്കെതിരെ നടന്നത്. മണിപ്പൂരിൽ 200-ൽ അധികം പള്ളികൾ തീയിട്ട് നശിപ്പിക്കപ്പെട്ടു. എന്നിട്ടും ബി.ജെ.പി അംഗങ്ങൾ ക്രിസ്ത്യാനികളുടെ പേരിൽ മുതലക്കണ്ണീരൊഴുക്കുകയാണെന്ന് ബ്രിട്ടാസ് കുറ്റപ്പെടുത്തി. 

30 വെള്ളിക്കാശിന് യേശുവിനെ ഒറ്റിക്കൊടുത്ത യൂദാസിനെപ്പോലുള്ള ചിലരാണ് ഇവിടെ ഇരിക്കുന്നത്. മുനമ്പത്ത് ഒരാൾക്കും വീട് നഷ്ടപ്പെടില്ല. ഉത്തരേന്ത്യയിലെ പോലെ ഒരു ആരാധനാലയവും മൂടിവെക്കേണ്ട അവസ്ഥ കേരളത്തിലില്ല. എല്ലാവർക്കും സമാധാനത്തോടെ ജീവിക്കാനുള്ള സാഹചര്യം കേരളത്തിലുണ്ട് എന്നും ബ്രിട്ടാസ് ചൂണ്ടിക്കാട്ടി. പ്രസംഗം വലിയ രാഷ്ട്രീയ ചർച്ചകൾക്ക് വഴി തെളിയിച്ചിരിക്കുകയാണ്.

CPI(M) MP John Brittas' speech in the Rajya Sabha during the Waqf Board Bill discussion has gone viral on social media, receiving praise across political lines for his eloquence and knowledge. He drew attention by comparing Union Minister Suresh Gopi to a character from the movie Empuraan and criticized the BJP's campaigns in Kerala and attacks on Christians in North India, also remembering Graham Staines and Father Stan Swamy.

#JohnBrittas #RajyaSabha #WaqfBill #SureshGopi #Kerala #India