PM Modi | 'ഇതുവരെ സംഭവിച്ചതെല്ലാം വെറും ട്രെയ്ലര്‍ മാത്രം; ജമ്മു കശ്മീരിന് സംസ്ഥാന പദവി അധികം വൈകാതെ തിരികെ ലഭിക്കും, സമാധാന അന്തരീക്ഷം സ്ഥാപിക്കുമെന്നും' തിരഞ്ഞെടുപ്പ് പ്രചാരണത്തിനിടെ മോദി

ഭീകരവാദത്തിന്റെയും ആക്രമണങ്ങളുടെയും കല്ലേറിന്റെയും അതിര്‍ത്തിക്കപ്പുറത്തുനിന്നുള്ള വെടിവയ്പിന്റെയും അകമ്പടിയില്ലാതെ തികച്ചും സമാധാനപരമായ അന്തരീക്ഷത്തിലാകും ഇത്തവണ ജമ്മു കശ്മീരില്‍ ലോക്‌സഭാ തിരഞ്ഞെടുപ്പു നടക്കുകയെന്നും മോദി പറഞ്ഞു.

മോദിയുടെ പ്രസംഗം:

മോദിയുടെ ചിന്തകള്‍ വളരെ മുന്നിലാണ്. അതുകൊണ്ട് ഇതുവരെ സംഭവിച്ചതെല്ലാം വെറും ട്രെയ്ലര്‍ മാത്രം. ജമ്മു കശ്മീരിന്റെ ഏറ്റവും സുന്ദരമായ പുതിയൊരു ചിത്രം സൃഷ്ടിക്കുന്നതിന്റെ തിരക്കിലാണ് ഞാന്‍. ജമ്മു കശ്മീരില്‍ നിയമസഭാ തിരഞ്ഞെടുപ്പ് വീണ്ടും നടക്കുന്ന കാലം വിദൂരമല്ല. ജമ്മു കശ്മീരിന് സംസ്ഥാന പദവി അധികം വൈകാതെ തിരികെ ലഭിക്കും. അതോടെ എംഎല്‍എമാരും മന്ത്രിമാരുമായി നിങ്ങളുടെ സ്വപ്നങ്ങള്‍ പങ്കിടാനും സാധിക്കും.

കഴിഞ്ഞ 60 വര്‍ഷമായി ജമ്മു കശ്മീരിനെ വിടാതെ പിന്തുടരുന്ന എല്ലാ പ്രശ്‌നങ്ങള്‍ക്കും ഞാന്‍ പരിഹാരം കണ്ടെത്തും. ഇക്കാര്യത്തില്‍ നിങ്ങള്‍ക്കെന്നെ പൂര്‍ണമായും വിശ്വസിക്കാം. ജമ്മു കശ്മീരിനെ പൂര്‍ണമായും മാറ്റിമറിക്കുമെന്ന എന്റെ വാഗ്ദാനം കഴിഞ്ഞ 10 വര്‍ഷത്തിനിടെ പാലിച്ചിട്ടുണ്ട്- എന്നും മോദി അവകാശപ്പെട്ടു.

ജമ്മു കശ്മീരിലെ ജനങ്ങള്‍ അനുഭവിച്ചിരുന്ന പീഡനങ്ങള്‍ക്ക് അറുതി വരുത്താന്‍ തനിക്കു സാധിച്ചെന്നും മോദി ചൂണ്ടിക്കാട്ടി. ബിജെപി സര്‍കാര്‍ 2019ല്‍ എടുത്തുകളഞ്ഞ ഭരണഘടനയുടെ 370-ാം അനുച്ഛേദം പുനഃസ്ഥാപിക്കാന്‍ കോണ്‍ഗ്രസിനെയും മറ്റു പ്രതിപക്ഷ പാര്‍ടികളെയും മോദി വെല്ലുവിളിച്ചു.