Jail CCTV | ലോകപിൽ നിന്നുള്ള ദൃശ്യങ്ങൾ! കാമുകിയെ കൊന്ന് 35 കഷ്ണങ്ങളാക്കി വലിച്ചെറിഞ്ഞെന്ന കേസിൽ അറസ്റ്റിലായ യുവാവ് 24 മണിക്കൂറും നിരീക്ഷണത്തിൽ; മൃതദേഹ അവശിഷ്ടങ്ങൾ ഫ്രിഡ്‌ജിൽ സൂക്ഷിച്ചിരുന്ന സമയത്തും പ്രതി ഡേറ്റിങ് ആപിലൂടെ പരിചയപ്പെട്ട മറ്റൊരു യുവതിയെ അപാർട്മെന്റിലേക്ക് കൊണ്ടുവന്നിരുന്നതായി പൊലീസ്

ന്യൂഡെൽഹി: (www.kvartha.com) ലിവ് ഇൻ പങ്കാളിയെ കൊലപ്പെടുത്തി മൃതദേഹം 35 കഷ്ണങ്ങളാക്കി മുറിച്ച് ഡെൽഹിയിലുടനീളം വലിച്ചെറിഞ്ഞന്ന കേസിൽ അറസ്റ്റിലായ കാമുകൻ അഫ്ത്വാബ് അമീൻ പൂനാവാല (28) ലോകപിൽ 24 മണിക്കൂറും നിരീക്ഷണത്തിലാണെന്ന് വ്യക്തമാക്കുന്ന ദൃശ്യങ്ങൾ പുറത്ത്. തെക്കൻ ഡെൽഹിയിലെ മെഹ്‌റൗളിയിലെ പൊലീസ് സ്‌റ്റേഷനിൽ മറ്റൊരു തടവുകാരനൊപ്പം അഫ്‌ത്വാബ് കിടക്കുന്ന ദൃശ്യങ്ങളാണ് പുറത്തുവന്നത്. പുറത്ത് രണ്ട് പൊലീസുകാർ യുവാവിനെ നോക്കി ഇരിക്കുന്നതും കാണാം.
  
മെയ് 18 ന് തർക്കമുണ്ടായതിനെ തുടർന്ന് അഫ്‌ത്വാബ് തന്റെ ലിവ്-ഇൻ പങ്കാളിയായ ശ്രദ്ധ (26) യെ കഴുത്ത് ഞെരിച്ച് കൊലപ്പെടുത്തിയെന്നാണ് പൊലീസ് പറയുന്നത്. 'തുടർന്ന് ഇയാൾ യുവതിയുടെ ശരീരം 35 കഷ്ണങ്ങളാക്കി മുറിക്കുകയും അവ സൂക്ഷിക്കാൻ ഒരു ഫ്രിഡ്ജ് വാങ്ങുകയും ചെയ്തു. അടുത്ത 18 ദിവസത്തിനുള്ളിൽ യുവാവ് ഡെൽഹിക്ക് ചുറ്റുമുള്ള വിവിധ സ്ഥലങ്ങളിൽ മൃതദേഹം അവശിഷ്ടങ്ങൾ തള്ളി', അന്വേഷണ ഉദ്യോഗസ്ഥർ വ്യക്തമാക്കുന്നു.

അതേസമയം ശ്രദ്ധയുടെ മൃതദേഹ അവശിഷ്ടങ്ങൾ ഫ്രിഡ്ജിൽ ഉണ്ടായിരുന്നപ്പോഴും അഫ്‌ത്വാബ് മറ്റൊരു സ്ത്രീയെ താമസ സ്ഥലത്തേക്ക് കൊണ്ട് വന്നിരുന്നുവെന്ന് ഡെൽഹി പൊലീസ് വെളിപ്പെടുത്തി. ശ്രദ്ധയെ കൊന്നതിന് ശേഷം പൂനാവാല ഡേറ്റിംഗ് ആപിൽ നിരവധി സ്ത്രീകളെ പരിചയപ്പെടുന്നത് തുടർന്നു. ഇയാളുടെ ചില സുഹൃത്തുക്കളും, ഭക്ഷണ വിതരണക്കാരും, കൂടാതെ മറ്റു പലരും വീട്ടിൽ പതിവായി വന്നിരുന്നു. വീട്ടിൽ സുഗന്ധം ഉപയോഗിച്ചിരുന്നത് കൊണ്ടും, റൂം ഫ്രഷ്നറുകളുടെ മണവും കാരണം കൊലപാതകം നടന്നതായി ആർക്കും തോന്നിയില്ല', പൊലീസ് ഉദ്യോഗസ്ഥർ പറയുന്നു.