(KVARTHA) ഭീകരതയുടെ ഏറ്റവും വലിയ ഇരകളായി മാറുന്നത് പാക്കിസ്ഥാനിലെ ദശലക്ഷക്കണക്കിന് സാധാരണ മനുഷ്യരാണ്. പാക് ഭരണകൂടത്തിൻ്റെ മൗനാനുവാദത്തോടെ സൈന്യവും ചാരസംഘടനയായ ഐ.എസ്.ഐയും ഇന്ത്യയിൽ നടത്തുന്ന ചാവേറാക്രമണങ്ങളുടെ ദുരിതം അനുഭവിക്കുന്നത് അന്നത്തിനും വെള്ളത്തിനും വേണ്ടി കഷ്ടപ്പെടുന്ന പാക്കിസ്ഥാനിലെ സാധാരണ കർഷകരും തൊഴിലാളികളും വ്യാപാരികളുമാണ്. 

തങ്ങളുടെ മാതൃരാജ്യമായ ഇന്ത്യയുമായി യുദ്ധമല്ല, സമാധാനമാണ് അവരിൽ ഭൂരിഭാഗം പേരും ആഗ്രഹിക്കുന്നത്. എന്നാൽ തകർന്നടിഞ്ഞ സമ്പദ്‌വ്യവസ്ഥയുടെ യാഥാർത്ഥ്യം മറച്ചുവെക്കാനും ജനങ്ങളുടെ ദുരിതപൂർണ്ണമായ ജീവിതപ്രശ്നങ്ങളിൽ നിന്ന് ശ്രദ്ധ തിരിക്കാനും അവർക്ക് എളുപ്പമാർഗ്ഗം ഇന്ത്യാവിരുദ്ധ ഭീകരപ്രവർത്തനമാണ്.

പാക്കിസ്ഥാനിൽ നടന്ന പ്രവാസി സംഗമത്തിൽ കാശ്മീർ അവരുടെ കഴുത്താണെന്നും ഇന്ത്യയുമായി ഒരു തരത്തിലും യോജിച്ചുപോകാൻ കഴിയില്ലെന്നും പാക് സൈനിക മേധാവി തന്നെ പറഞ്ഞത് ഇപ്പോൾ വലിയ ചർച്ചാവിഷയമാണ്. പാക് അധീന കാശ്മീരിൽ നൂറുകണക്കിന് ഭീകരരെയാണ് പാക് സൈന്യം ഫാക്ടറിയിൽ ഉത്പാദിപ്പിക്കുന്നതുപോലെ സൃഷ്ടിച്ചെടുക്കുന്നത്. 

ഇവരെ ഇന്ത്യൻ അതിർത്തികളിലെത്തിച്ച് നുഴഞ്ഞുകയറ്റത്തിന് വിടുകയാണ് പതിവ്. ബലൂചിസ്ഥാൻ സ്വാതന്ത്ര്യവാദം ശക്തമായ സാഹചര്യത്തിൽ രാജ്യം മൂന്നായി വിഭജിക്കപ്പെടണമെന്ന സ്ഥിതിയിലാണ് പാക്കിസ്ഥാൻ ഇപ്പോൾ. അടുത്ത കാലത്താണ് ബലൂചി വിമതർ ഓടുന്ന ട്രെയിൻ തട്ടിക്കൊണ്ടുപോയി നൂറുകണക്കിന് ആളുകളെ ബന്ദികളാക്കിയത്. 

രക്തരൂക്ഷിതമായ പോരാട്ടത്തിന് ശേഷമാണ് സൈന്യത്തിന് അവരെ മോചിപ്പിക്കാൻ സാധിച്ചത്. അഫ്ഗാൻ അതിർത്തിയിൽ താലിബാനുമായി അവർ നിരന്തര പോരാട്ടത്തിലാണ്. ഇപ്പോൾ താലിബാൻ ഇന്ത്യയുമായി സഹകരിച്ചുപോവുകയാണ്. ബംഗ്ലാദേശും നേപ്പാളുമായി പാക്കിസ്ഥാന് അത്ര നല്ല ബന്ധമില്ല. 

ചോദിക്കുമ്പോൾ പണം കടം കൊടുക്കുന്ന ചൈന മാത്രമാണ് പാക്കിസ്ഥാൻ്റെ ഏക രക്ഷകൻ. ഭീകരവാദം ഉത്പാദിപ്പിക്കുകയും അത് കയറ്റുമതി ചെയ്യുകയും ചെയ്യുന്നതുകൊണ്ട് അമേരിക്കയും ഗൾഫ് രാജ്യങ്ങളും പാക്കിസ്ഥാനുമായി അകൽച്ചയിലാണ്. സൈന്യത്തിന് കീഴ്പ്പെട്ട് നിൽക്കുന്ന ദുർബലമായ ഒരു സർക്കാർ ഭരിക്കുന്ന പാക്കിസ്ഥാന് ഇന്ത്യാവിരുദ്ധ വികാരം ആളിക്കത്തിക്കുകയല്ലാതെ മറ്റ് വഴികളൊന്നുമില്ല. 

കാർഗിൽ, ഉറി, മുംബൈ ഭീകരാക്രമണം, പുൽവാമ തുടങ്ങിയ ഒട്ടേറെ നുഴഞ്ഞുകയറ്റങ്ങളും കൂട്ടക്കൊലകളും അവർ നടത്തിയത് അവരുടെ ദൗർബല്യങ്ങൾ മറച്ചുവെക്കാനാണ്. ഇപ്പോൾ പഹൽഗാം കൂട്ടക്കൊല നടത്തിയതിന് അവർക്ക് വ്യക്തമായ ലക്ഷ്യങ്ങളുണ്ട്. 370-ാം വകുപ്പ് റദ്ദാക്കിയതിന് ശേഷം ലോകത്തിലെ സ്വർഗ്ഗമെന്ന് അറിയപ്പെടുന്ന കാശ്മീരിൽ ആഭ്യന്തര, വിദേശ സഞ്ചാരികളുടെ വലിയ ഒഴുക്കാണുണ്ടായത്. 

കഴിഞ്ഞ വർഷം മാത്രം രണ്ട് കോടി വിനോദസഞ്ചാരികൾ കാശ്മീരിലെത്തി. ഇത്തവണ അത് അഞ്ച് കോടിയാവുമെന്നായിരുന്നു പ്രതീക്ഷ. ഇത് തടയുന്നതിനും വിനോദസഞ്ചാരികളിൽ ഭീതി പരത്തുന്നതിനുമാണ് കാശ്മീരിലെ സ്വിറ്റ്സർലൻഡ് എന്നറിയപ്പെടുന്ന പഹൽഗാമിൽ അവർ വെടിയുതിർത്തത്. 

അമേരിക്കൻ വൈസ് പ്രസിഡൻ്റ് ഇന്ത്യ സന്ദർശിക്കുന്ന സമയവും ഇന്ത്യൻ പ്രധാനമന്ത്രി സൗദി അറേബ്യ സന്ദർശിക്കുന്ന അവസരവും പാക്കിസ്ഥാൻ കൃത്യമായി ഉപയോഗിച്ചു. ഇതുവഴി കാശ്മീർ വിഷയം വീണ്ടും സജീവമായി നിലനിർത്താനും അവർക്ക് സാധിച്ചു. എന്നാൽ കാറ്റ് വിതച്ച് കൊടുങ്കാറ്റ് കൊയ്യുന്ന ഒരു തെമ്മാടി രാഷ്ട്രത്തിൻ്റെ ഭാവി ഇപ്പോഴും അനിശ്ചിതത്വത്തിലാണ്. ഇന്ത്യയിൽ നിന്നുള്ള കുടിവെള്ളം പോലും അവർക്ക് ലഭിക്കാത്ത സാഹചര്യം വന്നിരിക്കുകയാണ്.

പഹൽഗാം ഭീകരാക്രമണത്തിൽ പാകിസ്താനെതിരെ ഇന്ത്യയുടെ ശക്തമായ നയതന്ത്ര നീക്കങ്ങളെ താങ്ങാൻ പാകിസ്താന് ശേഷിയുണ്ടോ എന്നത് കാലം തെളിയിക്കേണ്ട കാര്യമാണ്. പാകിസ്താനുമായുള്ള നയതന്ത്ര ബന്ധത്തിലെ പല സുപ്രധാന വാതിലുകളും അടച്ചുകൊണ്ടാണ് ഇന്ത്യ കടുത്ത നടപടി സ്വീകരിച്ചിരിക്കുന്നത്. എട്ട് സുപ്രധാന തീരുമാനങ്ങളാണ് രാജ്യം പ്രധാനമായും കൈക്കൊണ്ടിരിക്കുന്നത്. 

സിന്ധു നദീജല കരാർ റദ്ദാക്കിയതാണ് അതിൽ ഏറ്റവും പ്രധാനം. വാണിജ്യ ഇടനാഴിയായ വാഗ-അട്ടാരി അതിർത്തി അടച്ചതും സുപ്രധാനമായ തീരുമാനമാണ്. വാഗ-അട്ടാരി വഴി വന്ന പാക് പൗരന്മാർ മെയ് ഒന്നിനകം രാജ്യം വിടണമെന്ന നിർദ്ദേശം നൽകിയിട്ടുണ്ട്. സാർക് വിസ വഴി വന്നവർ 48 മണിക്കൂറിനകം ഇന്ത്യ വിടണമെന്നും, പാക് പൗരന്മാർക്ക് വിസ നൽകില്ലെന്നും, നിലവിലെ വിസകളെല്ലാം റദ്ദാക്കുമെന്നും ഇന്ത്യ ഔദ്യോഗികമായി അറിയിച്ചിട്ടുണ്ട്. 

പാക് നയതന്ത്ര ഉദ്യോഗസ്ഥരെ പുറത്താക്കുകയും ഇന്ത്യൻ ഉദ്യോഗസ്ഥരുടെ എണ്ണം കുറയ്ക്കുകയും ചെയ്തതോടെ യുദ്ധകാലത്ത് പോലും സ്വീകരിക്കാത്ത നടപടികളാണ് ഇന്ത്യ പഹൽഗാം ഭീകരാക്രമണത്തിന് പിന്നാലെ സ്വീകരിച്ചിരിക്കുന്നത്. അതിൽത്തന്നെ ഏറ്റവും പ്രധാനപ്പെട്ടത് 64 വർഷത്തിലധികമായി ഇന്ത്യയും പാകിസ്താനും പാലിച്ചുവന്നിരുന്ന സിന്ധു നദീജല കരാറാണ്.

ഏഷ്യയിലെ രണ്ട് രാജ്യങ്ങൾ തമ്മിലുള്ള ഏക അതിർത്തി കടന്നുള്ള ജല പങ്കിടൽ കരാറാണ് സിന്ധു നദീജല കരാർ. 1960 സെപ്റ്റംബർ 19നാണ് ഇന്ത്യയും പാകിസ്താനും തമ്മിൽ സിന്ധു നദീജല കരാർ ഒപ്പുവെയ്ക്കുന്നത്. 64 വർഷം പഴക്കമുള്ള ഈ കരാർ കറാച്ചിയിൽ വെച്ചാണ് ഒപ്പിട്ടത്. നീണ്ട ഒമ്പത് വർഷത്തെ ചർച്ചകൾക്ക് ശേഷമാണ് ഇരു രാജ്യങ്ങളും ഈ കരാറിലെത്തിയത്. 

1947-ലെ ഇന്ത്യാ-പാക് വിഭജന കാലത്താണ് ഇരു രാജ്യങ്ങളിലൂടെയും ഒഴുകുന്ന സിന്ധു നദി ആര് നിയന്ത്രിക്കുമെന്നും ആർക്കാണ് കൂടുതൽ ജലം ലഭിക്കുന്നതെന്നും തുടങ്ങിയ ചോദ്യങ്ങൾ ഉയർന്നുവന്നത്. 1948-ൽ പാകിസ്താനിലേക്കുള്ള ജലപ്രവാഹം ഇന്ത്യ താൽക്കാലികമായി നിർത്തിവെയ്ക്കുകയുണ്ടായി. ഈ സമയത്താണ് തങ്ങൾക്ക് ഇന്ത്യ ആവശ്യത്തിന് വെള്ളം കടത്തിവിടുന്നില്ലെന്ന പരാതിയുമായി പാകിസ്താൻ ഐക്യരാഷ്ട്രസഭയെ സമീപിക്കുന്നത്. 

പിന്നീട് വർഷങ്ങളുടെ ചർച്ചകൾക്ക് ശേഷം ലോകബാങ്കിൻ്റെ മധ്യസ്ഥതയിൽ കരാർ ഒപ്പുവെക്കാമെന്ന തീരുമാനത്തിലേക്ക് ഇരു രാജ്യങ്ങളും എത്തിച്ചേർന്നു. ഒടുവിൽ 1960-ൽ അന്നത്തെ ഇന്ത്യൻ പ്രധാനമന്ത്രി ജവഹർലാൽ നെഹ്‌റുവും പാകിസ്താൻ പ്രസിഡന്റ് അയ്യൂബ് ഖാനും ചേർന്ന് കരാറിൽ ഒപ്പുവെച്ചു.

സിന്ധു നദീതടത്തിലെ ആറ് പ്രധാന നദികളെ വിഭജിച്ചുകൊണ്ടായിരുന്നു ഈ ഉടമ്പടി നിലവിൽ വന്നത്. കിഴക്കൻ നദികളായ രവി, സത്ലജ്, ബിയാസ് എന്നീ നദികളിലെ ജലം ഇന്ത്യയ്ക്കും, പടിഞ്ഞാറൻ നദികളായ സിന്ധു, ചെനാബ്, ഝലം തുടങ്ങിയ നദികളിലെ ജലത്തിൻ്റെ അവകാശം പാകിസ്താനും നൽകിക്കൊണ്ടായിരുന്നു ഉടമ്പടി. 

കാഴ്ചയിൽ ഇരു രാജ്യങ്ങൾക്കും ഒരുപോലെ ഗുണകരമാകുന്ന കരാറാണ് സിന്ധു നദീജല കരാറെന്ന് തോന്നുമെങ്കിലും ഇതിലെ വലിയ ഗുണഭോക്താവ് പാകിസ്താനാണ്. മൊത്തം ജലത്തിൻ്റെ 20 ശതമാനം ഇന്ത്യയും ബാക്കി വരുന്ന ജലപ്രവാഹത്തിൻ്റെ 80 ശതമാനം പാകിസ്താനുമാണ് സ്വീകരിച്ചുവരുന്നത്. 

പാകിസ്താനിലെ, പ്രത്യേകിച്ച് പഞ്ചാബ്, സിന്ധ് പ്രവിശ്യകളിലെ കൃഷിക്ക് ഈ നദികളിലെ ജലം അത്യന്താപേക്ഷിതമാണ്. അതുകൊണ്ടുതന്നെ കരാർ റദ്ദാക്കുന്നത് പാകിസ്താൻ്റെ പ്രധാന വരുമാന സ്രോതസ്സായ കൃഷിയെ പ്രതികൂലമായി ബാധിക്കും.

2001-ലെ ഇന്ത്യൻ പാർലമെൻ്റ് ആക്രമണം, 2019-ലെ പുൽവാമ ആക്രമണം എന്നിവയുൾപ്പെടെ നിരവധി ഭീകരാക്രമണങ്ങൾ നേരിട്ടിട്ടും ഇന്ത്യ ഈ കരാറിൽ നിന്ന് പിന്മാറിയിരുന്നില്ല. എന്നാൽ കാശ്മീരിൻ്റെ സ്വപ്ന താഴ്വരയായ പഹൽഗാമിനെ രക്തരൂക്ഷിതമാക്കിയതിന് പിന്നാലെ നയതന്ത്ര ബന്ധത്തിലെ പ്രധാന ഏടായ സിന്ധു നദീജല കരാർ റദ്ദാക്കാൻ ഇന്ത്യ തീരുമാനിക്കുകയായിരുന്നു. 

ഈ തിരിച്ചടി പാക്കിസ്ഥാനെ സംബന്ധിച്ച് കനത്ത പ്രഹരമാണ്. ഭീകരവാദം കൃഷി ചെയ്യുന്ന പാക്കിസ്ഥാൻ ഇപ്പോൾ അതിൻ്റെ വിളവെടുപ്പ് തുടങ്ങിയിരിക്കുന്നു. ജനാധിപത്യ രാജ്യമാകാൻ പരാജയപ്പെട്ട പാക്കിസ്ഥാൻ മതരാഷ്ട്രവാദവുമായി മുന്നോട്ട് പോകുമ്പോൾ അനിവാര്യമായ പരാജയത്തെയാണ് നേരിടേണ്ടിവരുന്നത്.

ഈ വാർത്തയെക്കുറിച്ചുള്ള അഭിപ്രായങ്ങളും ഇത് സംബന്ധിച്ച് നിങ്ങൾ അറിയുന്ന മറ്റ് കാര്യങ്ങളും കമന്റ് ബോക്സിൽ പങ്കുവെക്കുക. സുഹൃത്തുകൾക്ക് ഈ വിവരങ്ങൾ എത്താനായി ഷെയർ ചെയ്യാനും മറക്കരുത്.

Summary: Following the Pahalgam terror assault, India has revoked the Indus Water Treaty, a major diplomatic blow to Pakistan. The article details the history of the treaty, its benefits to Pakistan, and the other stringent diplomatic actions taken by India, including border closure and visa restrictions.

#IndusWaterTreaty, #IndiaPakistan, #PahalgamAssault, #Terrorism, #DiplomaticCrisis, #WaterScarcity