ഇൻഡിഗോ പ്രതിസന്ധി: 37,000 കോടി നഷ്ടം; 827 കോടി രൂപ റീഫണ്ട് നൽകി; ഓഹരി വിലയിൽ 15 ശതമാനം ഇടിവ്

ന്യൂഡൽഹി: (KVARTHA) ഇന്ത്യയിലെ ഏറ്റവും വലിയ വിമാനക്കമ്പനിയായ ഇൻഡിഗോയുടെ വിമാന സർവീസുകളിലെ തടസ്സങ്ങൾ ഏഴാം ദിവസത്തിലേക്ക് കടന്നു. രാജ്യവ്യാപകമായി വിമാന സർവിസുകൾ റദ്ദാക്കി യാത്രക്കാരെ ദുരിതത്തിലാക്കിയ ഇൻഡിഗോ, തിങ്കളാഴ്ച (2025 ഡിസംബർ 8) മാത്രം 500 ഫ്ലൈറ്റുകൾ റദ്ദാക്കിയതായാണ് റിപ്പോർട്ട്. 138 ലക്ഷ്യസ്ഥാനങ്ങളിൽ 137 സ്ഥലങ്ങളിലേക്ക് ഇന്ന് 1,802 സർവീസുകൾ നടത്തുമെന്നാണ് കമ്പനി അറിയിച്ചിരിക്കുന്നത്.

ഗുരുതര വീഴ്ച, നടപടിക്ക് സാധ്യത

സർവീസുകൾ മുടങ്ങിയതിൽ ഇൻഡിഗോയുടെ ഭാഗത്ത് ഗുരുതര വീഴ്ച സംഭവിച്ചെന്നാണ് കേന്ദ്രസർക്കാരിൻ്റെ വിലയിരുത്തൽ. എയർലൈനിൻ്റെ പ്രവർത്തനങ്ങളിലെ ഈ വീഴ്ച കണക്കിലെടുത്ത് ഇൻഡിഗോയുടെ സി ഇ ഒ പീറ്റർ എൽബേഴ്സിന് ഡയരക്ടറേറ്റ് ജനറൽ ഓഫ് സിവിൽ ഏവിയേഷൻ (ഡി ജി സി എ) കാരണം കാണിക്കൽ നോട്ടിസ് നൽകി. കടമകൾ നിർവഹിക്കുന്നതിൽ കമ്പനി പരാജയപ്പെട്ടെന്ന് കേന്ദ്ര വ്യോമയാന സഹമന്ത്രി മുരളീധർ മൊഹോൾ കുറ്റപ്പെടുത്തി. രാജ്യത്തുടനീളമുള്ള യാത്രക്കാർക്ക് കടുത്ത മാനസിക പ്രയാസങ്ങളും ബുദ്ധിമുട്ടുകളും നേരിടേണ്ടി വന്നു.

സംഭവത്തിൽ ഡി ജി സി എ രൂപീകരിച്ച നാലംഗ സമിതിയുടെ റിപ്പോർട്ട് ലഭിക്കുന്ന മുറയ്ക്ക് വിമാനക്കമ്പനിക്കെതിരേ നടപടിയെടുക്കുമെന്ന് കേന്ദ്രമന്ത്രി അറിയിച്ചു. ഇൻഡിഗോ സി ഇ ഒയെ പുറത്താക്കുന്നതും കമ്പനിക്ക് കനത്ത പിഴ ചുമത്തുന്നതും ഉൾപ്പെടെയുള്ള നടപടികൾ കേന്ദ്രം പരിഗണിക്കുന്നുണ്ട്.

പ്രതിസന്ധിക്ക് കാരണം പുതിയ ചട്ടങ്ങൾ

വിമാന ജീവനക്കാരുടെ ഡ്യൂട്ടി സമയം (ഫ്ലൈറ്റ് ഡ്യൂട്ടി ടൈം ലിമിറ്റേഷൻ) സംബന്ധിച്ച പുതിയ ചട്ടങ്ങൾ നടപ്പിലാക്കുന്നതിലെ വീഴ്ചയാണ് നിലവിലെ പ്രതിസന്ധിക്ക് പ്രധാന കാരണം. ജനുവരിയിൽ പുറത്തിറക്കിയ വിജ്ഞാപന പ്രകാരം നവംബർ ഒന്ന് മുതൽ പുതിയ സമയം ക്രമീകരിക്കേണ്ടിയിരുന്നു. എന്നാൽ, ഇതിനാവശ്യമായ ജീവനക്കാരെ മുൻകൂട്ടി കണ്ടെത്തുന്നതിലോ കൃത്യമായ പരിശീലനം നൽകുന്നതിലോ കമ്പനി പരാജയപ്പെട്ടുവെന്നാണ് ഡി ജി സി എയുടെ വിലയിരുത്തൽ. മാറ്റങ്ങൾ മുൻകൂട്ടി അറിയിച്ചിട്ടും കൃത്യമായ തയ്യാറെടുപ്പുകൾ നടത്തുന്നതിൽ എയർലൈൻ പരാജയപ്പെട്ടുവെന്നും ഡി ജി സി എ ചൂണ്ടിക്കാണിച്ചു.

ഓഹരി വിപണിയിൽ കനത്ത പ്രഹരം

വിമാന സർവീസുകൾ താറുമാറായതിനെത്തുടർന്ന് പ്രതിസന്ധിയിലായ ഇൻഡിഗോ എയർലൈൻസിന് ഓഹരി വിപണിയിലും കനത്ത പ്രഹരമാണ് നേരിട്ടത്. ഇൻഡിഗോയുടെ മാതൃകമ്പനിയായ ഇൻ്റർഗ്ലോബ് ഏവിയേഷൻ്റെ ഓഹരി വില തിങ്കളാഴ്ചത്തെ വ്യാപാരത്തിൽ 10 ശതമാനത്തോളം ഇടിവ് രേഖപ്പെടുത്തി. ആറ് വ്യാപാര ദിവസങ്ങൾ കൊണ്ട് നിക്ഷേപകർക്ക് 37,000 കോടി രൂപയുടെ നഷ്‌ടമാണ് നേരിട്ടത്.

ഡിസംബർ ഒന്നിന് 5,837 രൂപയായിരുന്ന ഓഹരി വില, തുടർച്ചയായ ഇടിവിനൊടുവിൽ തിങ്കളാഴ്ച‌ ഉച്ചയോടെ 4,970 രൂപയിലേക്ക് കൂപ്പുകുത്തി. ഇതോടെ ഈ മാസം മാത്രം ഓഹരി വിലയിലുണ്ടായ ആകെ ഇടിവ് 15 ശതമാനമായി ഉയർന്നു. ഡി ജി സി എയുടെ ഭാഗത്തുനിന്നുണ്ടാകാൻ സാധ്യതയുള്ള കൂടുതൽ നടപടികൾ കമ്പനിയുടെ പ്രവർത്തന ചെലവ് വർധിപ്പിച്ചേക്കുമെന്ന ആശങ്കയും നിക്ഷേപകരുടെ ആത്മവിശ്വാസം നഷ്‌ടപ്പെടാൻ കാരണമായി.

റീഫണ്ടും ബാഗേജുകളും തിരികെ നൽകുന്നു

വിമാന സർവീസുകൾ റദ്ദായതിനെ തുടർന്ന് ഇതുവരെ 827 കോടി രൂപയാണ് ടിക്കറ്റ് റീഫണ്ടായി ഇൻഡിഗോ യാത്രക്കാർക്ക് നൽകിയത്. നവംബർ 21 മുതൽ ഡിസംബർ ഏഴ് വരെയുള്ള കാലയളവിൽ 9.55 ലക്ഷം പി എൻ ആർ ടിക്കറ്റുകളാണ് റദ്ദാക്കപ്പെട്ടത്.

കൂടാതെ, റദ്ദാക്കൽ കാരണം വിമാനത്താവളങ്ങളിൽ കുടുങ്ങിപ്പോയ യാത്രക്കാർക്ക് വേണ്ട സഹായങ്ങൾ കമ്പനി ഒരുക്കിയിട്ടുണ്ട്. ഡിസംബർ ഒന്ന് മുതൽ ഏഴ് വരെ ബുദ്ധിമുട്ടിലായ യാത്രക്കാർക്കായി 9,500 ലേറെ ഹോട്ടൽ മുറികളും, ഏകദേശം 10,000 ടാക്സികളും ബസുകളുമാണ് യാത്രാസൗകര്യത്തിനായി ഇൻഡിഗോ ഏർപ്പെടുത്തിയത്. പ്രതിദിനം രണ്ട് ലക്ഷത്തിലധികം ഉപഭോക്താക്കൾക്ക് വിവിധ ആശയവിനിമയ ചാനലുകളിലൂടെ സഹായം നൽകുന്നുണ്ടെന്നും കമ്പനി അറിയിച്ചു.

വിമാന സർവീസുകൾ റദ്ദായതിൻ്റെ ഫലമായി വിമാനത്താവളങ്ങളിൽ കുടുങ്ങിയ യാത്രക്കാരുടെ 9,000 ബാഗുകളിൽ 4,500 എണ്ണം ഇതിനോടകം തന്നെ ഉടമകൾക്ക് കൈമാറിയതായി വ്യോമയാന മന്ത്രാലയം അറിയിച്ചു. ശേഷിക്കുന്ന 4,500 ബാഗേജുകൾ അടുത്ത 36 മണിക്കൂറിനുള്ളിൽ വിതരണം ചെയ്യാനാണ് എയർലൈൻ ലക്ഷ്യമിടുന്നത്. പ്രശ്നങ്ങൾ പരിഹരിക്കാനായി ചെയർമാൻ വിക്രം സിങ് മേത്ത, സി ഇ ഒ തുടങ്ങിയ ഉന്നതരെ ഉൾപ്പെടുത്തി പ്രത്യേകസമിതിക്ക് ഇൻഡിഗോ രൂപം നൽകിയിട്ടുണ്ട്.

ഇൻഡിഗോ പ്രതിസന്ധിയിൽ നിങ്ങളുടെ അഭിപ്രായങ്ങൾ പങ്കുവെക്കുക.

Article Summary: IndiGo crisis enters Day 7 with 500 cancellations; CEO gets DGCA notice.

 #IndiGoCrisis #AviationNews #DGCANotice #StockMarketLoss #FlightCancellations #KeralaNews