ന്യൂഡൽഹി: (KVARTHA) ലോകാരോഗ്യസംഘടന പോലുള്ള ആരോഗ്യ രംഗത്തെ പ്രമുഖർ ഏറ്റവും വലിയ ആരോഗ്യ പ്രശ്നങ്ങളിലൊന്നായി ചൂണ്ടിക്കാട്ടുന്നത് ആന്റി മൈക്രോബിയൻ റെസിസ്റ്റൻസ് (AMR) ആണ്. 
ശരീരത്തിനും പരിസ്ഥിതിക്കും ഹാനികരമായ ബാക്ടീരിയ, വൈറസ്, ഫംഗസ്, പരാന്നഭോജികൾ എന്നീ സൂക്ഷ്മാണുക്കളെ നശിപ്പിക്കാൻ ഉപയോഗിക്കുന്ന മരുന്നുകളാണ് ആന്റി മൈക്രോബിയലുകൾ. ഇവയിൽ ആൻറിബയോട്ടിക്, ആൻറിവൈറൽ, ആൻറിഫംഗൽ എന്നിവ ഉൾപ്പെടുന്നു. 

എന്നാൽ, ഈ മരുന്നുകൾ അനാവശ്യമായി ഉപയോഗിക്കുമ്പോൾ സൂക്ഷ്മാണുക്കൾക്ക് ഇവയോട് പ്രതിരോധം വികസിക്കാനുള്ള സാധ്യതയുണ്ട്. ഇതിനെയാണ് ആന്റി മൈക്രോബിയൽ റെസിസ്റ്റൻസ് അഥവാ പ്രതിരോധം എന്നു പറയുന്നത്. എഎംആർ കാരണം ആന്റി മൈക്രോബിയൽ മരുന്നുകൾ ഫലപ്രദമാകാതെ വരുകയും ചെറിയ അണുബാധ പോലും ജീവനെ ഭീഷണിപ്പെടുത്തുന്ന അവസ്ഥയിലേക്ക് നയിക്കുകയും ചെയ്യുന്നു. ഇത് സാധാരണ അണുബാധകളെ പോലും ചികിത്സിക്കാൻ പ്രയാസമാക്കുകയും മരണത്തിലേക്ക് നയിക്കുകയും ചെയ്യുന്നു.

പുതിയ ആൻറിബയോട്ടിക് വരുന്നു

ഇപ്പോഴിതാ മരുന്നിനോട് പ്രതിരോധശേഷിയുള്ള ന്യുമോണിയയെ ചെറുക്കാൻ മൂന്ന് തവണ മാത്രം കഴിച്ചാൽ പത്ത് ഇരട്ടി ഫലപ്രാപ്തി നൽകുന്ന പുതിയ ആൻറിബയോട്ടിക് വരികയാണ്. ഇന്ത്യയുടെ ബയോടെക്നോളജി മേഖലയിലെ ശ്രദ്ധേയമായ  ഈ നേട്ടത്തിൽ, കേന്ദ്രമന്ത്രി ഡോ. ജിതേന്ദ്ര സിംഗ് ഔദ്യോഗികമായി ഇന്ത്യയുടെ ആദ്യത്തെ സ്വദേശി ആൻറിബയോട്ടിക് 'നാഫിത്തോമൈസിൻ' കഴിഞ്ഞദിവസം പുറത്തിറക്കി.

നാഫിത്തോമൈസിൻ എന്താണ്?

ബയോടെക്നോളജി വകുപ്പിന്റെ ഭാഗമായ ബയോടെക്നോളജി ഇൻഡസ്ട്രി റിസർച്ച് അസിസ്റ്റൻസ് കൗൺസിൽ (BIRAC) ന്റെ പിന്തുണയോടെ വികസിപ്പിച്ച നാഫിത്തോമൈസിൻ ആന്റിബയോട്ടിക്, വോൾക്കാർഡ് ഫാർമ എന്ന കമ്പനിയുടെ മിക്നാഫ് എന്ന ബ്രാൻഡ് നാമത്തിൽ വിപണിയിൽ എത്തിയിരിക്കുന്നു. ആന്റിമൈക്രോബിയൽ പ്രതിരോധത്തെ നേരിടാൻ ഇന്ത്യ സ്വന്തമായി വികസിപ്പിച്ച ആദ്യത്തെ ആൻറിബയോട്ടിക് ഇതാണ്.

ന്യുമോണിയയ്ക്കെതിരായ പുതിയ ആയുധം

മരുന്നു പ്രതിരോധശേഷിയുള്ള ബാക്ടീരിയകൾ മൂലമുണ്ടാകുന്ന ഗുരുതരമായ അസുഖമായ കമ്മ്യൂണിറ്റി-അക്വയേർഡ് ബാക്റ്റീരിയൽ ന്യുമോണിയ (CABP) ചികിത്സിക്കാൻ ഈ മരുന്ന് രൂപകൽപ്പന ചെയ്തിരിക്കുന്നു. പ്രത്യേകിച്ച് കുട്ടികൾ, മുതിർന്നവർ, പ്രമേഹ രോഗികൾ, കാൻസർ രോഗികൾ തുടങ്ങിയ പ്രതിരോധശേഷി കുറഞ്ഞവരെയാണ് ഈ രോഗം കൂടുതലായി ബാധിക്കുന്നത്.

നാഫിത്തോമൈസിന്റെ മൂന്ന് ദിവസത്തെ ചികിത്സാ രീതി, വർഷംതോറും ലോകമെമ്പാടും രണ്ട് ദശലക്ഷത്തിലധികം മരണങ്ങൾക്ക് കാരണമാകുന്ന മരുന്നു പ്രതിരോധശേഷിയുള്ള ന്യുമോണിയയെ നേരിടുന്നതിൽ ഒരു ഗെയിം-ചേഞ്ചറാണെന്ന് കേന്ദ്രമന്ത്രി  വിശദീകരിച്ചു. ബയോടെക്നോളജി ഇൻഡസ്ട്രി റിസർച്ച് അസിസ്റ്റൻസ് കൗൺസിലിന്റെ പിന്തുണയോടെ വോക്ഹാർഡ് വികസിപ്പിച്ച പുതിയ ആൻറിബയോട്ടിക്, നിലവിലുള്ള ഓപ്ഷനുകളേക്കാൾ പത്ത് ഇരട്ടി കൂടുതൽ ഫലപ്രദമാണ്.

ഗവേഷണത്തിന്റെ ഫലം

നാഫിത്തോമൈസിന്റെ വികസനം ഒരു വലിയ നേട്ടമാണ്. ഇത് 14 വർഷത്തെ കഠിനമായ ഗവേഷണത്തിന്റെയും 500 കോടി രൂപയുടെ നിക്ഷേപത്തിന്റെയും ഫലമാണ്. അമേരിക്ക, യൂറോപ്പ്, ഇന്ത്യ എന്നിവിടങ്ങളിൽ നടന്ന പരീക്ഷണങ്ങൾ ഇതിന്റെ വിജയത്തിന് സാക്ഷ്യം വഹിക്കുന്നു. 

അംഗീകാരത്തിനായി കാത്തിരിക്കുന്നു

മരുന്നു നിർമ്മാണത്തിനും പൊതു ഉപയോഗത്തിനുമായി സെൻട്രൽ ഡ്രഗ്സ് സ്റ്റാൻഡേർഡ് കൺട്രോൾ ഓർഗനൈസേഷന്റെ (CDSCO) അന്തിമ അംഗീകാരത്തിനായി ഈ മരുന്ന് ഇപ്പോൾ കാത്തിരിക്കുകയാണ്, ഇത് ആന്റി മൈക്രോബിയല്‍ റസിസ്റ്റന്‍സിനെതിരായ ഇന്ത്യയുടെ പോരാട്ടത്തിൽ ഒരു പ്രധാന നാഴികക്കല്ലാകുമെന്നാണ് പ്രതീക്ഷിക്കുന്നത്.

#Nafithomycin #IndiaBiotech #HealthcareInnovation #DrugResistance #PneumoniaTreatment #AMR