ന്യൂഡൽഹി: (KVARTHA) ഇന്ത്യൻ റെയിൽവേയുടെ റിസർവേഷൻ ടിക്കറ്റ് ബുക്കിംഗ് നിയമങ്ങളിൽ റെയിൽവേ സുപ്രധാന ഭേദഗതി വരുത്തി. ഇതുവരെ, യാത്രക്കാർക്ക് തങ്ങളുടെ യാത്രയ്ക്ക് 120 ദിവസം മുമ്പ് ടിക്കറ്റ് ബുക്ക് ചെയ്യാമായിരുന്നു. എന്നാൽ, ഈ സമയപരിധി 60 ദിവസമായി കുറച്ചു. ഇനി മുതൽ യാത്രക്കാർക്ക് തങ്ങളുടെ യാത്രയ്ക്ക് 60 ദിവസത്തിനുള്ളിൽ മാത്രമേ ടിക്കറ്റ് ബുക്ക് ചെയ്യാൻ സാധിക്കൂ. റെയിൽവേ ബോർഡ് ഡയറക്ടർ (പാസഞ്ചർ മാർക്കറ്റിംഗ്) സഞ്ജയ് മൂഞ്ചയാണ് ഇത് സംബന്ധിച്ച് ഉത്തരവിറക്കിയത്.

2024 നവംബർ ഒന്ന് മുതൽ പുതിയ നിയമങ്ങൾ പ്രാബല്യത്തിൽ വരും. എന്നാൽ, ഈ പുതിയ നിയമങ്ങൾ ഒക്ടോബർ 31 വരെ ബുക്ക് ചെയ്യുന്ന ടിക്കറ്റുകളെ ബാധിക്കില്ല. താജ് എക്സ്പ്രസ്, ഗോമതി എക്സ്പ്രസ് തുടങ്ങിയ ട്രെയിനുകളിൽ മുൻകൂർ റിസർവേഷൻ സംബന്ധിച്ച നിലവിലുള്ള ഹ്രസ്വ സമയ പരിധിയിൽ യാതൊരു മാറ്റവും വരുത്തിയിട്ടില്ല. വിദേശ വിനോദസഞ്ചാരികൾക്ക് അനുവദിച്ചിരിക്കുന്ന 365 ദിവസത്തെ മുൻകൂർ റിസർവേഷൻ പരിധിയും തുടർന്നും നിലനിൽക്കും.

റിസർവേഷൻ കാലയളവിൽ വന്ന മാറ്റങ്ങൾ

റെയിൽവേ മുൻകൂർ റിസർവേഷൻ കാലയളവ് കാലാകാലങ്ങളിൽ നിരവധി മാറ്റങ്ങൾക്ക് വിധേയമായിട്ടുണ്ട്. 1995-98 കാലഘട്ടത്തിൽ 30 ദിവസമായിരുന്ന ഈ കാലയളവ് പിന്നീട് 1981-85, 2012-13, 2015-24 കാലഘട്ടങ്ങളിൽ 120 ദിവസമായി ഉയർത്തി. ഇടയ്ക്കുള്ള കാലഘട്ടങ്ങളിൽ 45 മുതൽ 90 ദിവസം വരെയായിരുന്നു ഈ കാലയളവ്.

വിവിധ കാലഘട്ടങ്ങളിലെ അനുഭവങ്ങൾ വിലയിരുത്തിയ ശേഷം, റെയിൽവേ മന്ത്രാലയം 60 ദിവസത്തെ മുൻകൂർ റിസർവേഷൻ കാലയളവ് യാത്രക്കാർക്ക് ഏറ്റവും അനുയോജ്യമാണെന്ന് നിഗമനത്തിലെത്തി. 120 ദിവസം വളരെ നീണ്ട കാലയളവായതിനാൽ യാത്രക്കാർ പലപ്പോഴും ടിക്കറ്റുകൾ റദ്ദാക്കുകയും സീറ്റുകൾ പാഴാവുകയും ചെയ്യുന്നതായി മന്ത്രാലയം ചൂണ്ടിക്കാട്ടുന്നു. നിലവിൽ ഏകദേശം 21 ശതമാനം ടിക്കറ്റുകൾ റദ്ദാക്കപ്പെടുന്നതും 4-5 ശതമാനം യാത്രക്കാർ യാത്രയ്ക്ക് എത്താത്തതും ഈ സാഹചര്യം തെളിയിക്കുന്നു.

#IndianRailways #TrainTickets #Reservation #Travel #Booking #IRCTC #NewRules