ന്യൂഡൽഹി: (KVARTHA) പഹൽഗാം ഭീകരാക്രമണത്തിലും തുടർന്നുണ്ടായ ഓപ്പറേഷൻ സിന്ദൂർ നടപടിയിലും ഇന്ത്യാവിരുദ്ധ നിലപാടെടുത്ത തുർക്കിയുമായുള്ള ബന്ധം വഷളാകുന്നതിന്റെ സൂചനയായി, ഇന്ത്യയിലേക്കുള്ള തുർക്കിയുടെ പുതിയ അംബാസഡറെ സ്വീകരിക്കുന്ന ചടങ്ങ് ഇന്ത്യ അനിശ്ചിതകാലത്തേക്ക് മാറ്റിവച്ചു.

രാഷ്ട്രപതി ഭവനിലെ സമയക്രമത്തിലെ പ്രശ്നങ്ങളാണ് കാരണമെന്ന് ഔദ്യോഗികമായി പറയുന്നതെങ്കിലും, ഇന്ത്യയിൽ തുർക്കി വിരുദ്ധ മനോഭാവം ശക്തമാകുന്നതിനിടയിലാണ് കേന്ദ്രത്തിന്റെ ഈ നീക്കം എന്നതും ശ്രദ്ധേയമാണ്.

ഇന്ത്യയിലേക്കുള്ള തുർക്കിയുടെ പുതിയ അംബാസഡറായി നിയമിതനാകേണ്ടത് അലി മുറാത് എർസോയിയാണ്. സ്ഥാനമേൽക്കുന്നതിന് മുൻപ് ഇന്ത്യ അദ്ദേഹത്തെ അംഗീകരിക്കേണ്ടതുണ്ട്. രാഷ്ട്രപതിയുടെ സാന്നിധ്യത്തിൽ നടക്കേണ്ടിയിരുന്ന ഈ ചടങ്ങ് ഇന്ന് നടക്കേണ്ടതായിരുന്നു. വിഷയത്തിൽ തുർക്കി എംബസി ഇതുവരെ പ്രതികരിച്ചിട്ടില്ല.

ചടങ്ങ് എന്ന് നടക്കുമെന്നോ മാറ്റിവച്ചതിന്റെ കാരണമോ ഇന്ത്യ ഔദ്യോഗികമായി വ്യക്തമാക്കിയിട്ടുമില്ല. അലി മുറാത് എർസോയി മാർച്ചിലാണ് ഇന്ത്യയിലെ അംബാസഡറായി എത്തുന്നത്. എന്നാൽ, ഇന്ത്യ അംഗീകാരം നൽകാത്തതിനാൽ ഈ നിയമനത്തിന് പ്രാബല്യമുണ്ടാകില്ല.

അതേസമയം, ഇതിനൊപ്പം നടക്കേണ്ടിയിരുന്ന തായ് അംബാസഡറുടെയും പുതിയ ബംഗ്ലാദേശ് ഹൈക്കമ്മീഷണറുടെയും അംഗീകാര ചടങ്ങുകളും മാറ്റിവെച്ചിട്ടുണ്ട്. കഴിഞ്ഞ ദിവസമാണ് ഇന്ത്യയിലെ വിമാനത്താവളങ്ങളിൽ ഗ്രൗണ്ട് ഹാൻഡിലിംഗ് ജോലികൾ ഏറ്റെടുത്ത് നടത്തിയിരുന്ന തുർക്കി ബന്ധമുള്ള കമ്പനിയുടെ സുരക്ഷാ അനുമതി റദ്ദാക്കിയത്.

തുർക്കിയിലെ ജെലെബി ഏവിയേഷൻ ഹോൾഡിംഗിന്റെ ഇന്ത്യൻ കമ്പനിയായ ജെലെബി എയർപോർട്ട് സർവീസസ് ഇന്ത്യയുടെ സുരക്ഷാ അനുമതിയാണ് ബ്യൂറോ ഓഫ് സിവിൽ ഏവിയേഷൻ സെക്യൂരിറ്റി റദ്ദാക്കിയത്. ദേശസുരക്ഷയുമായി ബന്ധപ്പെട്ട ആശങ്കകളെ തുടർന്നാണ് കമ്പനിക്കെതിരെ നടപടിയെടുത്തത്.

ഡൽഹി, മുംബൈ, ചെന്നൈ ഉൾപ്പെടെ ഒമ്പത് വിമാനത്താവളങ്ങളിലാണ് ജെലെബി പ്രവർത്തിച്ചിരുന്നത്. മുംബൈ വിമാനത്താവളത്തിലെ 70 ശതമാനം ഗ്രൗണ്ട് ഓപ്പറേഷൻസും ഈ തുർക്കി കമ്പനിയാണ് കൈകാര്യം ചെയ്യുന്നത്. ജനറൽ എവിയേഷൻ സർവീസ്, പാസഞ്ചർ സർവീസ്, കാർഗോ, പോസ്റ്റൽ സർവീസ്, വെയർഹൗസ് ആൻഡ് ബ്രിഡ് ഓപ്പറേഷൻ തുടങ്ങിയ പ്രധാനപ്പെട്ട ഗ്രൗണ്ട് ഓപ്പറേഷൻസുകളെല്ലാം കമ്പനി നടത്തിവരികയായിരുന്നു. സുരക്ഷാ അനുമതി പിൻവലിച്ചതോടെ ഈ വിമാനത്താവളങ്ങളിലെ പ്രവർത്തനങ്ങളിൽ ആശയക്കുഴപ്പങ്ങൾ ഉടലെടുത്തിരുന്നു.

ഓപ്പറേഷൻ സിന്ദൂറിന് പിന്നാലെ പാകിസ്താന് പിന്തുണ പ്രഖ്യാപിച്ച് തുർക്കി രംഗത്തുവന്നത് ഇന്ത്യയുടെ അതൃപ്തിക്ക് കാരണമായിരുന്നു. ഇതിന് പിന്നാലെയാണ് ഇപ്പോഴത്തെ നടപടികൾ. തുർക്കിയും അസർബൈജാനുമാണ് പാകിസ്താന് പരസ്യ പിന്തുണ നൽകിയത്. ഇതിന്റെ പശ്ചാത്തലത്തിൽ ഈ രാജ്യങ്ങളിലേക്കുള്ള യാത്രകൾ ഇന്ത്യക്കാർ റദ്ദാക്കാൻ തുടങ്ങിയിട്ടുണ്ട്. തുർക്കി ഉത്പന്നങ്ങൾ ബഹിഷ്കരിക്കണമെന്ന ആഹ്വാനവും രാജ്യത്ത് ശക്തമായി ഉയരുന്നുണ്ട്.

തുർക്കിയുമായുള്ള ഇന്ത്യയുടെ ബന്ധത്തിലെ ഈ പുതിയ സംഭവവികാസങ്ങളെക്കുറിച്ച് നിങ്ങളുടെ അഭിപ്രായങ്ങൾ രേഖപ്പെടുത്തുക.

Summary: India has postponed the accreditation ceremony for the new Turkish ambassador, Ali Murat Ersoy, amid growing tensions following Turkey's stance on recent events. While the official reason cites scheduling issues, the move is seen against a backdrop of rising anti-Turkey sentiment in India.

#IndiaTurkeyRelations, #Diplomacy, #NationalSecurity, #Geopolitics, #IndianNews, #Turkey