'പരീക്ഷണ ഗ്രൗണ്ടായി ഇന്ത്യ-പാക് അതിർത്തി': ചൈനീസ് നീക്കത്തിനെതിരെ യുഎസ് റിപ്പോർട്ട്

ന്യൂഡൽഹി: (KVARTHA) പഹൽഗാം ഭീകരാക്രമണത്തിന് പിന്നാലെ ഓപ്പറേഷൻ സിന്ദൂർ ഉൾപ്പെടെയുള്ള ഇന്ത്യൻ തിരിച്ചടികൾക്ക് ശേഷം നടന്ന ഇന്ത്യ-പാകിസ്ഥാൻ സംഘർഷത്തെ ചൈന അവസരവാദപരമായി ഉപയോഗപ്പെടുത്തിയതായി നിർണായക റിപ്പോർട്ട്. തങ്ങളുടെ ഏറ്റവും പുതിയ ആയുധങ്ങളുടെയും രഹസ്യാന്വേഷണ ശേഷികളുടെയും പരീക്ഷണ കേന്ദ്രമായാണ് ചൈന ഈ സംഘർഷത്തെ കണ്ടതെന്ന് യുഎസ്-ചൈന ഇക്കണോമിക് ആന്‍ഡ് സെക്യൂരിറ്റി റിവ്യൂ കമ്മീഷൻ (യുഎസ്‌സിസി) അമേരിക്കൻ കോൺഗ്രസിന് സമർപ്പിച്ച 2025 ലെ വാർഷിക റിപ്പോർട്ടിൽ പറയുന്നു. ഇന്ത്യ-പാക് സംഘർഷത്തിന്റെ പ്രേരകശക്തിയെന്ന് റിപ്പോർട്ടിൽ ചൈനയെ വിശേഷിപ്പിച്ചു.

2025 മെയ് 7 മുതൽ പത്ത് വരെയുള്ള നാല് ദിവസങ്ങളിലാണ് ഇന്ത്യയും പാകിസ്ഥാനും തമ്മിൽ രൂക്ഷമായ സംഘർഷം അരങ്ങേറിയത്. കഴിഞ്ഞ 50 വർഷത്തിനിടെ പരസ്പരം ഏറ്റവും കൂടുതൽ ലക്ഷ്യങ്ങൾ ആക്രമിക്കപ്പെട്ടതും ഈ ദിവസങ്ങളിലായിരുന്നു. ഇന്ത്യയ്‌ക്കെതിരായ നീക്കത്തിൽ പാകിസ്ഥാൻ കൂടുതലായി ആശ്രയിച്ചത് ചൈനീസ് ആയുധങ്ങളെ ആയിരുന്നു. ഇതിന് പുറമെ സംഘർഷത്തെക്കുറിച്ച് പാകിസ്ഥാൻ ചൈനയ്ക്ക് തത്സമയ വിവരങ്ങൾ കൈമാറുകയും ചെയ്തുവെന്ന് ഇന്ത്യൻ സൈന്യത്തെ ഉദ്ധരിച്ച് റിപ്പോർട്ട് പറയുന്നു.

ഗ്രൗണ്ടിലെ ആയുധ പരീക്ഷണം

പ്രതിരോധ വ്യവസായത്തിൽ മുന്നേറാൻ ഏറെ ആഗ്രഹിക്കുന്ന ചൈന തങ്ങൾ നിർമ്മിച്ച ആയുധങ്ങളുടെ ഗുണനിലവാരം പരിശോധിക്കുന്നതിനും അവ പരീക്ഷിക്കുന്നതിനുമായാണ് സംഘർഷത്തെ ഉപയോഗപ്പെടുത്തിയത്. ചൈന നിർമ്മിച്ച എച്ച് ക്യൂ 9 (HQ-9) വ്യോമ പ്രതിരോധ സംവിധാനം, പിഎൽ 15 (PL-15) എയർ ടു എയർ മിസൈൽ, ജെ 10 (J-10) യുദ്ധവിമാനം എന്നിവ സംഘർഷത്തിനിടെ പരീക്ഷിക്കാൻ ചൈനയ്ക്ക് കഴിഞ്ഞുവെന്ന് റിപ്പോർട്ടിൽ പറയുന്നു. അന്നുവരെ പരീക്ഷണാടിസ്ഥാനത്തിൽ മാത്രം ഉപയോഗിച്ചിരുന്ന ഈ ആയുധങ്ങൾ ആദ്യമായി ഒരു 'റിയൽ വേൾഡ് ഫീൽഡ് എക്സ്പെരിമെന്റ്' പോലെ ഉപയോഗിക്കപ്പെട്ടത് ഈ സംഘർഷത്തിലായിരുന്നു.

അതിനിടെ, പാകിസ്ഥാൻ വ്യോമസേന ഇന്ത്യയ്ക്ക് നേരെ പ്രയോഗിച്ച ചൈനീസ് നിർമ്മിത മിസൈലുകളിലൊന്ന് ലക്ഷ്യം കാണാതെ പാടത്ത് വീണത് സംഭവത്തിലെ വഴിത്തിരിവായി. പൊട്ടിത്തെറിക്കാത്ത നിലയിൽ കണ്ടെത്തിയ ഈ മിസൈൽ ഇന്ത്യയുടെ ഡിഫൻസ് റിസർച്ച് ആൻഡ് ഡെവലപ്മെന്റ് ഓർഗനൈസേഷൻ (ഡിആർഡിഒ) പിടിച്ചെടുത്തു. പരിശോധനയിൽ ഇത് ചൈനയുടെ അത്യാധുനിക 'പിഎൽ-17' (PL-17) എയർ-ടു-എയർ മിസൈലാണെന്ന് തിരിച്ചറിഞ്ഞതായും റിപ്പോർട്ട് ചൂണ്ടിക്കാട്ടുന്നു. 

വ്യാജ പ്രചാരണങ്ങളും പാക്കേജുകളും

സംഘർഷം നടന്ന് ഏതാനും ആഴ്ച്ചകൾക്ക് ശേഷം തന്നെ തങ്ങളുടെ യുദ്ധോപകരണങ്ങൾ മികച്ച പ്രകടനം കാഴ്ച്ചവെക്കുന്നു എന്ന് വ്യക്തമാക്കി ചൈന രംഗത്തെത്തിയിരുന്നു. ഇന്ത്യൻ റാഫേൽ യുദ്ധ വിമാനങ്ങളെക്കാൾ നല്ലത് തങ്ങളുടെ യുദ്ധ വിമാനങ്ങളാണെന്ന് കാണിക്കാനും, ഫ്രഞ്ച് ആയുധ വില്‍പ്പനയെ തടസ്സപ്പെടുത്താനുമായിരുന്നു ചൈനയുടെ നീക്കം. ഇന്ത്യൻ വിമാനങ്ങളുടെ 'അവശിഷ്ടങ്ങൾ' എന്ന പേരിൽ സോഷ്യൽ മീഡിയയിൽ പ്രചരിപ്പിച്ചത് എഐ- ഗെയിം ഇമേജുകൾ ആയിരുന്നുവെന്നും ഇത് വ്യാജ പ്രചാരണമാണെന്നും ഫ്രഞ്ച് ഇന്റലിജൻസ് വൃത്തങ്ങളെ ഉദ്ധരിച്ച് റിപ്പോർട്ട് പറയുന്നു.

സംഘർഷത്തിന് തൊട്ടുപിന്നാലെ, ജൂൺ മാസത്തിൽ പാകിസ്ഥാന് 40 ജെ-35 (J-35) അഞ്ചാം തലമുറ യുദ്ധവിമാനങ്ങളും കെജെ-500 (KJ-500) മുന്നറിയിപ്പ് വിമാനങ്ങളും ബാലിസ്‌റ്റിക് മിസൈൽ പ്രതിരോധ സംവിധാനങ്ങളും ഉൾപ്പെടെയുള്ള പുതിയ പ്രതിരോധ പാക്കേജ് ചൈന വാഗ്ദാനം ചെയ്തു. ദേശീയ ചെലവ് വെട്ടിക്കുറയ്ക്കൽ പ്രഖ്യാപിച്ച സമയത്ത് പോലും പാകിസ്ഥാൻ പ്രതിരോധ ബജറ്റ് 20 ശതമാനം വർധിപ്പിച്ച് ഒൻപത് ബില്യൺ യുഎസ് ഡോളർ തുക പ്രതിരോധ വിഹിതത്തിനായി നീക്കിവെച്ചതും റിപ്പോർട്ടിൽ പരാമർശിക്കുന്നുണ്ട്.

ചൈനയുടെ പ്രതികരണം

അതേസമയം, യുഎസ് കമ്മീഷൻ വാർഷിക റിപ്പോർട്ടിനെ പൂർണമായും തള്ളിക്കൊണ്ടാണ് ചൈന രംഗത്തെത്തിയത്. റിപ്പോർട്ടിലെ വിവരങ്ങളെല്ലാം തെറ്റാണെന്നും യുഎസ് കമ്മീഷൻ എപ്പോഴും ചൈനയ്‌ക്കെതിരെ തെറ്റായ വാർത്തകൾ പ്രചരിപ്പിക്കാറുണ്ടെന്നും ചൈന പ്രതികരിച്ചു. ഇന്ത്യ-പാകിസ്ഥാൻ സംഘർഷത്തെ തങ്ങളുടെ സൈനിക ശേഷി പരീക്ഷിക്കാനുള്ള അവസരമായി ചൈന ഉപയോഗിച്ചത് ദക്ഷിണേഷ്യൻ മേഖലയിൽ ചൈന നടത്തുന്ന സൈനിക ഇടപെടൽ സംബന്ധിച്ച ആശങ്ക ശക്തമാക്കുന്നതാണ് എന്നാണ് വിലയിരുത്തൽ.

ഇന്ത്യ-പാക് സംഘർഷത്തെ ചൈന മുതലെടുത്തതിനെക്കുറിച്ച് നിങ്ങളുടെ അഭിപ്രായം എന്താണ്? കമൻ്റ് ചെയ്യുക.

Article Summary: US report says China used India-Pak conflict to test new weapons.

#LDF #KeralaLocalBodyPolls #KannurPolitics #Anthoor #Malappattam #CPMVijayam