ഇന്ത്യയുടെ കരുനീക്കം; പുതിയ മിസൈൽ പരീക്ഷണത്തിന് ആൻഡമാൻ തീരം വേദിയാകുന്നു

ന്യൂഡല്‍ഹി: (KVARTHA) ഇന്ത്യ പുതിയ മിസൈൽ പരീക്ഷണത്തിന് ഒരുങ്ങുകയാണ്. ബംഗാൾ ഉൾക്കടലിൽ നടക്കുന്ന പരീക്ഷണത്തിന്റെ ഭാഗമായി ആൻഡമാനിലെ വ്യോമമേഖല രണ്ടു ദിവസത്തേക്ക് അടച്ചിടും.

ഇന്ന് (മെയ് 23), നാളെ (മെയ് 24) ദിവസങ്ങളിൽ മൂന്നു മണിക്കൂർ വീതമാണ് വ്യോമാതിർത്തി അടച്ചിടുക. ഈ സമയം ഒരു സിവിലിയൻ വിമാനത്തിനും നിശ്ചിത വ്യോമാതിർത്തിക്ക് മുകളിലൂടെ പറക്കാൻ അനുമതിയില്ലെന്ന് അധികൃതർ അറിയിച്ചു.

ആൻഡമാൻ നിക്കോബാർ ദ്വീപുകൾക്ക് ചുറ്റുമുള്ള ഏകദേശം 500 കിലോമീറ്റർ പരിധിയിൽ രാവിലെ ഏഴു മണിക്കും പത്തു മണിക്കും ഇടയിലായിരിക്കും പരീക്ഷണം നടക്കുക. ഈ സമയത്ത് ഒൻപത് അന്താരാഷ്ട്ര വിമാന റൂട്ടുകൾ അടച്ചിടും. എന്നാൽ ഏത് മിസൈലാണ് പരീക്ഷിക്കുന്നതെന്ന് വ്യക്തമായിട്ടില്ല.

ആൻഡമാൻ നിക്കോബാർ ദ്വീപ് മേഖലയിൽ ഇത് ആദ്യമായല്ല മിസൈൽ പരീക്ഷണം നടക്കുന്നത്. 2025 ജനുവരിയിൽ ബ്രഹ്‌മോസ് സൂപ്പർസോണിക് മിസൈലിന്റെ സാൽവോ മോഡൽ ഇവിടെ പരീക്ഷിച്ചിരുന്നു. കഴിഞ്ഞ വർഷം ഒരു എയർ ലോഞ്ച്ഡ് ബാലിസ്റ്റിക് മിസൈലും വിജയകരമായി പരീക്ഷിച്ചിരുന്നു.

ഓപ്പറേഷൻ സിന്ദൂറിന് പിന്നാലെ ഇന്ത്യ 40,000 കോടി രൂപയുടെ ആയുധങ്ങൾ വാങ്ങാൻ ഒരുങ്ങുന്നതായി റിപ്പോർട്ടുകളുണ്ട്. സായുധസേനകൾക്കുള്ള അടിയന്തര ആയുധ സംഭരണ അധികാരം ഉപയോഗിച്ചാണ് ഡ്രോണുകൾ ഉൾപ്പെടെയുള്ള ആയുധങ്ങൾ വാങ്ങുന്നത്. കാമികാസെ ഡ്രോണുകൾ, നിരീക്ഷണ ഡ്രോണുകൾ, പീരങ്കി ഷെല്ലുകൾ, വ്യോമ പ്രതിരോധ സംവിധാനങ്ങൾ, ദീർഘദൂര സ്മാർട്ട് വെപ്പണുകൾ, വിവിധ റോക്കറ്റുകൾ, മിസൈലുകൾ എന്നിവയാണ് ഇന്ത്യ വാങ്ങുന്നത്.

ഈ വാർത്തയെക്കുറിച്ച് നിങ്ങളുടെ അഭിപ്രായങ്ങൾ പങ്കുവെക്കുക! ഷെയർ ചെയ്യുക
 

Summary: India is preparing for a missile test in the Bay of Bengal, leading to a two-day closure of Andaman airspace for civilian flights. Nine international air routes will be affected. The specific missile being tested is not disclosed. India is also reportedly planning a ₹40,000 crore arms purchase.

#IndiaMissileTest, #BayOfBengal, #AndamanAirspace, #DefenseNews, #MilitaryExercise, #ArmsProcurement