Treasure | ഭൂമിക്കടിയിൽ നിന്ന് നിധി കണ്ടെത്തിയാൽ നമുക്ക് ഉപയോഗിക്കാൻ കഴിയുമോ? ഇന്ത്യയിലെ നിയമം ഇങ്ങനെയാണ്!

 

തിരുവനന്തപുരം: (KVARTHA) കണ്ണൂരിൽ നിന്ന് നിധിയെന്ന് സംശയിക്കുന്ന വസ്തുക്കൾ രണ്ട് തവണയായി കിട്ടിയത് വലിയ ചർച്ചയായിരിക്കുകയാണ്. കണ്ണൂർ ചെങ്ങളായിയിൽ പരപ്പായി സർക്കാർ സ്‌കൂളിന് സമീപത്തുള്ള റബർ തോട്ടത്തിൽ മഴക്കുഴി വെട്ടുകയായിരുന്ന തൊഴിലുറപ്പ് തൊഴിലാളികളായ സ്ത്രീകൾക്കാണ് നിധി കുംഭം പോലുള്ള മൺപാത്രം ലഭിച്ചത്. സ്വര്‍ണ ലോക്കറ്റുകള്‍, പതക്കങ്ങള്‍, മോതിരങ്ങള്‍ എന്നിവയാണ് പാത്രത്തില്‍ ഉണ്ടായിരുന്നത്. പിന്നാലെ ഇതേ സ്ഥലത്ത് നിന്ന് ഒരു  സ്വര്‍ണമുത്തും നാല് വെള്ളി നാണയങ്ങളും കണ്ടെത്തി. 

നിധി തേടി പോകുന്നത് ധാരാളം ആളുകളുടെ ഹരമാണെങ്കിലും, ഇന്ത്യയിൽ ഭൂമിക്കടിയിൽ നിന്ന് കണ്ടെത്തുന്ന നിധികൾ സംബന്ധിച്ച് കർശനമായ നിയമങ്ങൾ നിലവിലുണ്ട്. പുരയിടം കിളയ്ക്കുമ്പോഴോ മറ്റോ സ്വർണ നാണയങ്ങളോ, മറ്റ് വിലപിടിപ്പുള്ള വസ്തുക്കളോ കണ്ടെത്തിയാൽ, ഇന്ത്യൻ നിയമ പ്രകാരം നമുക്ക് ഉപയോഗിക്കാൻ കഴിയുമോ?

സർക്കാരിന്റെ സ്വത്ത് 

ഇന്ത്യയിൽ, ഭൂമിക്കടിയിൽ നിന്ന് കണ്ടെത്തുന്ന എല്ലാ പുരാവസ്തുക്കളും സർക്കാരിന്റെ സ്വത്താണെന്ന് പുരാവസ്തു സംരക്ഷണ നിയമം 1972 (The Antiquities and Art Treasures Act, 1972) വ്യക്തമാക്കുന്നു. സ്വർണ നാണയങ്ങളും മറ്റ് വിലപിടിപ്പുള്ള വസ്തുക്കളും പുരാവസ്തുക്കളുടെ വിഭാഗത്തിൽ വരും. നികുതി നൽകി നാം ഭൂമിയിൽ കഴിയുന്നത് വാടകക്കാരെ പോലെയാണ്. ഭൂമിയുടെ ഉടമസ്ഥാവകാശം സർക്കാരിനാണ്, അതിനാൽ ഭൂമിക്കടിയിൽ നിന്ന് ലഭിക്കുന്ന വസ്തുക്കളുടെ മേലും അവർക്കാണ് അവകാശം.

റവന്യൂ ഉദ്യോഗസ്ഥരെ അറിയിക്കണം

നിയമപ്രകാരം, പുരയിടം കിളയ്ക്കുമ്പോഴോ മറ്റോ സ്വർണ നാണയങ്ങളോ, മറ്റ് വിലപിടിപ്പുള്ള വസ്തുക്കളോ കണ്ടെത്തിയാൽ റവന്യൂ ഉദ്യോഗസ്ഥരെ അറിയിക്കേണ്ടത് നിർബന്ധമാണ്.  നിങ്ങളുടെ പ്രദേശത്തെ കലക്ടറാണ് ഇത്തരം സാഹചര്യങ്ങളിൽ ആദ്യം ഇടപെടേണ്ടത്. അവർക്ക് സ്ഥലത്തെത്തി വസ്തുക്കൾ പരിശോധിക്കാനും അവയുടെ പ്രാധാന്യം വിലയിരുത്താനും കഴിയും.

അല്ലെങ്കിൽ ഈ ചുമതല ഏൽപ്പിക്കാൻ റവന്യൂ വകുപ്പിലെ മറ്റ് ഉദ്യോഗസ്ഥരെ നിയോഗിക്കാം. റവന്യൂ വകുപ്പ് ഉദ്യോഗസ്ഥർ വസ്തുക്കൾ ഏറ്റെടുത്ത ശേഷം, അവ ആർക്കിയോളജി വകുപ്പിന് കൈമാറും. അവിടെ വിദഗ്ദ്ധർ വസ്തുക്കൾ പരിശോധിക്കുകയും അവയുടെ ചരിത്ര പ്രാധാന്യം നിർണയിക്കുകയും ചെയ്യും. നിങ്ങൾ കണ്ടെത്തിയ വസ്തുക്കൾ റിപ്പോർട്ട് ചെയ്യാതെ വെച്ചാൽ, നിയമനടപടി നേരിടേണ്ടി വന്നേക്കാം. 

ഇൻസെന്റീവ് ലഭിക്കാം

നിങ്ങൾ ഭൂമിക്കടിയിൽ നിന്ന് പുരാവസ്തു മൂല്യമുള്ള വസ്തുക്കൾ (നിധി) കണ്ടെത്തിയാൽ, നിങ്ങൾക്ക് ഇൻസെന്റീവ് ലഭിക്കാം. ഈ പ്രതിഫലത്തിന്റെ തുക നിർണയിക്കുന്ന ഘടകങ്ങൾ ഉണ്ട്.

പുരാവസ്തു സംരക്ഷണ നിയമം, 1972 

* ലക്ഷ്യം:

ഇന്ത്യയുടെ പുരാവസ്തുക്കളും കലാവസ്തുക്കളും കയറ്റുമതി തടയുക.
നമ്മുടെ രാജ്യത്തിന്റെ സാംസ്കാരിക പൈതൃകം സംരക്ഷിക്കുക.

നിയമത്തിന്റെ പ്രധാന വ്യവസ്ഥകൾ:

* കേന്ദ്ര സർക്കാരിന്റെ അനുമതിയില്ലാതെ യാതൊരു പുരാവസ്തുവും കലാവസ്തുവും കയറ്റുമതി ചെയ്യാൻ പാടില്ല.
* പുരാവസ്തുക്കളുടെ വിൽപനയും കച്ചവടവും നിയന്ത്രിക്കുന്നു.
* നിയമം ലംഘിക്കുന്നവർക്ക് പിഴയും തടവും ശിക്ഷയായി ലഭിക്കും.