ന്യൂഡൽഹി: (KVARTHA) ഡിജിറ്റൽ ഇടപാടുകൾ വ്യാപകമായെങ്കിലും പലരും ഇപ്പോഴും പണമായി ഇടപാട് നടത്താൻ ഇഷ്ടപ്പെടുന്നു. മാസം മുഴുവൻ ഉപയോഗിക്കാനുള്ള പണം എടിഎമ്മിൽ നിന്ന് ഒറ്റയടിക്ക് പിൻവലിക്കുന്നത് പലരുടെയും പതിവാണ്. എന്നാൽ വീട്ടിൽ ഇത്രയും പണം സൂക്ഷിക്കുന്നത് സുരക്ഷിതമാണോ? ആദായ നികുതി നിയമപ്രകാരം ഇതിന് എന്തെങ്കിലും നിയന്ത്രണമുണ്ടോ? ഈ ചോദ്യങ്ങൾക്ക് ഉത്തരം തേടാം.

വീട്ടിൽ എത്ര പണം സൂക്ഷിക്കാം?

നിയമപ്രകാരം വീട്ടിൽ എത്ര പണം വേണമെങ്കിലും സൂക്ഷിക്കാം. ഇതിന് ഒരു നിശ്ചിത പരിധിയോ നിയന്ത്രണമോ ഇല്ല. എന്നാൽ ഇത്രയും പണം വീട്ടിൽ സൂക്ഷിച്ചാൽ ആദായ നികുതി വകുപ്പിൽ നിന്ന് പ്രശ്നമുണ്ടാകുമോ എന്ന ആശങ്ക പലർക്കും ഉണ്ടാകാം. 

ആദായ നികുതി നിയമം പറയുന്നത്

ആദായ നികുതി വകുപ്പ് വീട്ടിൽ സൂക്ഷിച്ചിരിക്കുന്ന പണത്തെക്കുറിച്ച് നേരിട്ട് ഒരു ചോദ്യവും ഉന്നയിക്കില്ല. എന്നാൽ ആദായനികുതി റെയ്ഡ് നടത്തുമ്പോൾ കൈവശം ഉള്ള പണത്തിന്റെ ഉറവിടം എന്താണെന്ന് തെളിയിക്കേണ്ടി വരും.  വീട്ടിൽ സൂക്ഷിച്ചിരിക്കുന്ന പണം നിയമപരമായ വരുമാനത്തിൽ നിന്നാണെങ്കിൽ, അതിനുള്ള തെളിവുകൾ കാണിക്കേണ്ടതുണ്ട്. സമ്പാദ്യം, വായ്പ, വിൽപന തുടങ്ങിയവയിൽ നിന്നുള്ള വരുമാനമാണെന്ന് തെളിയിക്കുന്ന രേഖകൾ ഇതിൽ ഉൾപ്പെടുന്നു.

കൈവശം ഉള്ള പണത്തിന്റെ ഉറവിടം വിശദീകരിക്കാൻ കഴിയുന്നില്ലെങ്കിൽ, അന്വേഷണ ഏജൻസികൾക്ക് കനത്ത പിഴ ചുമത്താം. നോട്ട് അസാധുവാക്കലിന് ശേഷമുള്ള നിയമങ്ങൾ പ്രകാരം, അന്വേഷണത്തിൽ കൈവശം വെളിപ്പെടുത്താത്ത പണം കണ്ടെത്തിയാൽ, കണ്ടെടുത്ത പണത്തിൻറെ 137% വരെ നികുതി ചുമത്താവുന്നതാണ്.

നികുതി വെട്ടിപ്പ്:

ആദായ നികുതി വകുപ്പ്, എൻഫോഴ്‌സ്‌മെൻ്റ് ഡയറക്‌ടറേറ്റ് തുടങ്ങിയ സർക്കാർ ഏജൻസികൾ കള്ളപ്പണം നിക്ഷേപിച്ചവരെ നിരീക്ഷിക്കുന്നു. വരുമാനം നികുതി രേഖകളിൽ കൃത്യമായി രേഖപ്പെടുത്തിയിട്ടുണ്ടെങ്കിൽ പണം കണ്ടുകെട്ടാൻ കഴിയില്ല. എന്നാൽ എന്തെങ്കിലും തെറ്റ് കണ്ടെത്തുകയോ നികുതി അടയ്ക്കാതിരിക്കുകയോ ചെയ്താൽ ആദായനികുതി റെയ്ഡ് നടത്തി വീട്ടിൽ നിന്ന് പണം  പിടിച്ചെടുക്കാം.

പണവുമായി ബന്ധപ്പെട്ട മറ്റ് പ്രധാന കാര്യങ്ങൾ:

ബാങ്കിൽ നിന്ന് ഒരേസമയം 50,000 രൂപയിൽ കൂടുതൽ പണം പിൻവലിക്കുകയോ നിക്ഷേപിക്കുകയോ ചെയ്‌താൽ പാൻകാർഡ് കാണിക്കണമെന്നാണ് ചട്ടം. ഷോപ്പിംഗ് നടത്തുമ്പോൾ രണ്ട് ലക്ഷം രൂപയിൽ കൂടുതൽ പണമായി നൽകാനാവില്ല. രണ്ട് ലക്ഷം രൂപയിൽ കൂടുതൽ പണമായി വാങ്ങുകയാണെങ്കിൽ പാൻ കാർഡിൻ്റെയും ആധാർ കാർഡിൻ്റെയും പകർപ്പ് നൽകണം.

വീട്ടിൽ എത്ര പണം സൂക്ഷിക്കാം എന്നതിന് നിയമപരമായ ഒരു പരിധിയില്ല. എന്നാൽ ആദായനികുതി റെയ്ഡ് നടത്തുമ്പോൾ നിങ്ങളുടെ കൈവശം ഉള്ള പണത്തിന്റെ ഉറവിടം നിങ്ങൾ തെളിയിക്കേണ്ടി വരും. അതിനാൽ, നിയമപരമായ വരുമാനത്തിൽ നിന്നുള്ള പണം മാത്രം വീട്ടിൽ സൂക്ഷിക്കാൻ ശ്രദ്ധിക്കുക.

 #IncomeTax #LegalGuidelines #CashStorage #TaxRaid #MoneyAtHome #TaxCompliance