ന്യൂഡൽഹി: (KVARTHA) ഇന്ത്യയിലെ ഇരുചക്ര വാഹന വിപണിയിൽ പുതിയ വിപ്ലവം സൃഷ്ടിക്കാനൊരുങ്ങി ഹോണ്ട മോട്ടോർസൈക്കിൾ ആൻഡ് സ്കൂട്ടർ ഇന്ത്യ (HMSI). ജനപ്രിയ മോഡലായ ആക്ടിവയുടെ ഇലക്ട്രിക് പതിപ്പായ 'ആക്ടിവ ഇ'യും പുതിയ 'ക്യുസി1' ഇലക്ട്രിക് സ്കൂട്ടറും ബുക്കിംഗിനായി തുറന്നു. 1,000 രൂപ നൽകി ഉപഭോക്താക്കൾക്ക് ഈ മോഡലുകൾ ബുക്ക് ചെയ്യാം. 

ബംഗളൂരു, ഡൽഹി, മുംബൈ എന്നിവിടങ്ങളിലെ തിരഞ്ഞെടുത്ത ഹോണ്ട ഡീലർഷിപ്പുകളിൽ ആക്ടിവ ഇ ബുക്ക് ചെയ്യാം. ഡൽഹി, മുംബൈ, പൂനെ, ബംഗളൂരു, ഹൈദരാബാദ്, ചണ്ഡീഗഡ് എന്നിവിടങ്ങളിലെ ഹോണ്ട ഡീലർഷിപ്പുകളിൽ ക്യുസി1 ലഭ്യമാകും. ഈ രണ്ട് ഇലക്ട്രിക് സ്കൂട്ടറുകളുടെയും വില ഈ മാസം നടക്കുന്ന ഭാരത് മൊബിലിറ്റി ഗ്ലോബൽ എക്സ്പോ 2025-ൽ പ്രഖ്യാപിക്കും. ഫെബ്രുവരി 2025 മുതൽ ഇരു മോഡലുകളുടെയും വിതരണം ആരംഭിക്കും.

ആക്ടിവ ഇ - സവിശേഷതകൾ

ആക്ടിവ ഇ: രണ്ട് 1.5 (kWh) സ്വാപ്പബിൾ ബാറ്ററികളുമായാണ് വരുന്നത്. ഹോണ്ട മൊബൈൽ പവർ പാക്ക് ഇ എന്നാണ് ഈ ബാറ്ററികൾ അറിയപ്പെടുന്നത്. ഒറ്റ ചാർജിൽ 102 കിലോമീറ്റർ വരെ സഞ്ചരിക്കാൻ സാധിക്കുമെന്നാണ് കമ്പനിയുടെ അവകാശവാദം. 6 കിലോ വാട്സ് പെർമനന്റ് മാഗ്നെറ്റ് സിൻക്രണസ് മോട്ടോറാണ് സ്കൂട്ടറിന് കരുത്തേകുന്നത്. 22 എൻഎം ആണ് ടോർക്ക്. ഇക്കോൺ, സ്റ്റാൻഡേർഡ്, സ്പോർട് എന്നിങ്ങനെ മൂന്ന് റൈഡിംഗ് മോഡുകളും സ്പോർട് മോഡിൽ 80 കി. മീ ടോപ് സ്പീഡും ലഭിക്കും. 0-60 km/h എത്താൻ 7.3 സെക്കൻഡ് മതി. 

ഹോണ്ട റോഡ്‌സിങ്ക് ഡ്യുവോ സ്മാർട്ട്ഫോൺ ആപ്പ് വഴി നാവിഗേഷൻ ഉൾപ്പെടെയുള്ള കണക്റ്റിവിറ്റി ഫീച്ചറുകളുള്ള ഏഴ് ഇഞ്ച് ടിഎഫ്ടി ഡിസ്പ്ലേയും ഇതിലുണ്ട്. ഹാൻഡിൽബാറിലെ ടോഗിൾ സ്വിച്ചുകൾ ഉപയോഗിച്ച് ഡിസ്പ്ലേ നിയന്ത്രിക്കാം. ഡേ, നൈറ്റ് മോഡുകളും ലഭ്യമാണ്. ഹോണ്ടയുടെ എച്ച്-സ്മാർട്ട് കീ സിസ്റ്റം, സ്മാർട്ട് ഫൈൻഡ്, സ്മാർട്ട് സേഫ്, സ്മാർട്ട് അൺലോക്ക്, സ്മാർട്ട് സ്റ്റാർട്ട് തുടങ്ങിയ ഫീച്ചറുകളും ഇതിലുണ്ട്. 12 ഇഞ്ച് അലോയ് വീലുകൾ, ടെലിസ്കോപിക് ഫ്രണ്ട് ഫോർക്കുകൾ, ഡ്യുവൽ റിയർ സ്പ്രിംഗുകൾ, ഡിസ്ക്-ഡ്രം ബ്രേക്കിംഗ് സിസ്റ്റം എന്നിവയും ഇതിന്റെ പ്രത്യേകതകളാണ്. പേൾ ഷാലോ ബ്ലൂ, പേൾ മിസ്റ്റി വൈറ്റ്, പേൾ സെറീനിറ്റി ബ്ലൂ, മാറ്റ് ഫോഗി സിൽവർ മെറ്റാലിക്, പേൾ ഇഗ്നിയസ് ബ്ലാക്ക് എന്നീ അഞ്ച് നിറങ്ങളിൽ ആക്ടിവ ഇ ലഭ്യമാകും.

ക്യുസി1 - നഗര യാത്രകൾക്ക് ഒരു കൂട്ടുകാരൻ

ഇന്ത്യൻ വിപണിക്ക് മാത്രമായി രൂപകൽപ്പന ചെയ്ത ക്യുസി1, ചെറിയ ദൂര യാത്രകൾക്ക് അനുയോജ്യമാണ്. ആക്ടിവ ഇ:യുടെ മുൻവശത്തെയും സൈഡ് പാനലുകളുടെയും രൂപകൽപ്പനയുമായി ക്യുസി1ന് സാമ്യമുണ്ട്. 1.5 kWh ഫിക്സഡ് ബാറ്ററി പാക്കും ഫ്ലോർബോർഡിൽ ഘടിപ്പിച്ചിട്ടുള്ള സോക്കറ്റ് വഴി കണക്ട് ചെയ്യാവുന്ന ചാർജറുമാണ് ഇതിലുള്ളത്. 1.2 കിലോ വാട്സ് (1.6 bhp), 1.8 കിലോ വാട്സ് (2.4 bhp) പവർ ഔട്ട്പുട്ടുകൾ നൽകുന്ന ഒരു കോംപാക്ട് ഇൻ-വീൽ മോട്ടോറാണ് ഇതിൽ ഉപയോഗിച്ചിരിക്കുന്നത്. 

80 കിലോമീറ്റർ റേഞ്ചും 50 കി മീ ടോപ് സ്പീഡും ക്യുസി1 വാഗ്ദാനം ചെയ്യുന്നു. 5 ഇഞ്ച് എൽസിഡി ഇൻസ്ട്രുമെന്റ് പാനൽ, 26 ലിറ്റർ അണ്ടർ-സീറ്റ് സ്റ്റോറേജ്, യുഎസ്ബി ടൈപ്പ്-സി ചാർജിംഗ് സോക്കറ്റ് എന്നിവയാണ് മറ്റ് സവിശേഷതകൾ. പേൾ സെറീനിറ്റി ബ്ലൂ, പേൾ മിസ്റ്റി വൈറ്റ്, മാറ്റ് ഫോഗി സിൽവർ മെറ്റാലിക്, പേൾ ഇഗ്നിയസ് ബ്ലാക്ക്, പേൾ ഷാലോ ബ്ലൂ എന്നീ അഞ്ച് കളർ ഓപ്ഷനുകളിൽ ക്യുസി1 ലഭ്യമാകും.

#HondaActivaE #HondaQC1 #ElectricScooter #EV #ElectricVehicle #India