ന്യൂഡൽഹി: (KVARTHA) രാജ്യത്ത് റോഡ് സുരക്ഷ ഒരു പ്രധാന വിഷയമാണ്. ദിവസേന നിരവധി റോഡപകടങ്ങൾ നടക്കുന്നുണ്ട്. ഇതിൽ ഇടിച്ച വാഹനം തിരിച്ചറിയാൻ കഴിയാത്ത (ഹിറ്റ് ആൻഡ് റൺ) അപകടങ്ങൾ വലിയ പ്രശ്നമാണ്. അപകടം ഉണ്ടാക്കിയ വാഹനം രക്ഷപ്പെടുന്നതിനാൽ ഇത്തരം അപകടങ്ങളിൽ പെട്ടവർക്ക് നീതി ലഭിക്കാതെ പോകുന്നത് പതിവാണ്.

ഈ സാഹചര്യത്തിൽ, ഹിറ്റ് ആൻഡ് റൺ അപകടങ്ങളിൽ മരണമോ ഗുരുതരമായ പരിക്കോ സംഭവിക്കുന്നവരുടെ കുടുംബങ്ങളെ സാമ്പത്തികമായി സഹായിക്കുന്നതിനായി കേന്ദ്ര സർക്കാർ പദ്ധതി നടപ്പിലാക്കിയിട്ടുണ്ട്. ഈ പദ്ധതിയിലൂടെ മരിച്ചവരുടെ കുടുംബത്തിന് രണ്ട് ലക്ഷം രൂപയും ഗുരുതരമായി പരിക്കേറ്റവർക്ക് അൻപതിനായിരം രൂപയും നഷ്ടപരിഹാരമായി നൽകുന്നു. ഈ തുക ജനറൽ ഇൻഷുറൻസ് കൗൺസിലാണ് നൽകുന്നത്.

2022 മുതൽ ഈ ആനുകൂല്യത്തിന് അപേക്ഷിച്ചത് വളരെ കുറച്ച് പേർ മാത്രമാണ്. ഇതിന് പ്രധാന കാരണം, പൊതുജനങ്ങളിൽ ഭൂരിഭാഗത്തിനും ഇത്തരമൊരു പദ്ധതിയെക്കുറിച്ചും അപേക്ഷിക്കേണ്ട നടപടിക്രമങ്ങളെക്കുറിച്ചും അറിയില്ല എന്നതാണ്.

എങ്ങനെ അപേക്ഷിക്കാം?

● ഓൺലൈൻ: hitandrunschemeclaims(at)gicouncil(dot)in എന്ന ഇമെയിൽ വിലാസത്തിലേക്ക് അപേക്ഷിക്കാം.
● വക്കീൽ മുഖേന: ഒരു വക്കീലിന്റെ സഹായത്തോടെയും അപേക്ഷ സമർപ്പിക്കാം.
● വിശദമായ വിവരങ്ങൾക്ക് https://insurance-education/hit- and-run-motor-accidents എന്ന ലിങ്കിൽ സന്ദർശിക്കാം.

ആവശ്യമായ രേഖകൾ:

● തിരിച്ചറിയൽ കാർഡ് (ആധാർ, ഡ്രൈവിംഗ് ലൈസൻസ് മുതലായവ)
● ബാങ്ക് അക്കൗണ്ട് വിവരം
● ചികിത്സാരേഖകൾ
● എഫ്.ഐ.ആറിൻ്റെ പകർപ്പ്
● പോസ്റ്റ്മോർട്ടം റിപ്പോർട്ട് (മരണം സംഭവിച്ചെങ്കിൽ)
● മരണസർട്ടിഫിക്കറ്റ് / പരിക്കേറ്റതിന്റെ രേഖ

നടപടിക്രമം:

അപകടം സംഭവിച്ച് ഒരു മാസത്തിനുള്ളിൽ അപേക്ഷിക്കണം. തഹസിൽദാർ ഈ അപേക്ഷയിൽ ഉന്നയിച്ചിരിക്കുന്ന ആരോപണങ്ങളും വസ്തുതകളും വിശദമായി അന്വേഷിക്കും. ഈ അന്വേഷണത്തിന്റെ അടിസ്ഥാനത്തിൽ തയ്യാറാക്കിയ റിപ്പോർട്ട് തഹസിൽദാർ ജില്ലാ കലക്ടർക്ക് കൈമാറും. ജില്ലാ കലക്ടർ, സഹായധനം നൽകേണ്ടതിന്റെ ആവശ്യകതയും തുകയും നിർണയിക്കുന്നതിനായി ഈ റിപ്പോർട്ട് പരിശോധിക്കും.

ഇതിനായി ജില്ലാ കലക്ടർ ചെയർമാനായ ഒരു ജില്ലാ സമിതിയുണ്ട്. ഈ സമിതിയാണ് സഹായധനം നൽകുന്നതിനെക്കുറിച്ചുള്ള അന്തിമ തീരുമാനം എടുക്കുന്നത്. സമിതിയുടെ തീരുമാനപ്രകാരം, ആവശ്യമായ സഹായധനം ജനറൽ ഇൻഷുറൻസ് കൗൺസിലിൽ നിന്ന് അനുവദിക്കും. രേഖകൾ കൃത്യമാണെങ്കിൽ പരമാവധി 30 ദിവസത്തിനുള്ളിൽ പണം അക്കൗണ്ടിൽ ലഭിക്കും.

#hitandrunaccident #compensation #roadsafety #india #governmentscheme #legalhelp