ഗുജറാത്തിൽ മന്ത്രിസഭ വിപുലീകരിച്ചു; ഹർഷ് സംഘവി ഉപമുഖ്യമന്ത്രി, റിവാബ ജഡേജ വിദ്യാഭ്യാസ മന്ത്രി

ഗാന്ധിനഗർ: (KVARTHA) ഗുജറാത്തിൽ മുഖ്യമന്ത്രി ഭൂപേന്ദ്ര പട്ടേലിൻ്റെ നേതൃത്വത്തിൽ 26 അംഗ പുതിയ മന്ത്രിസഭ വെള്ളിയാഴ്ച അധികാരമേറ്റു. മന്ത്രിസഭ വിപുലീകരണത്തിൻ്റെ ഭാഗമായി 19 പുതുമുഖങ്ങൾ ഉൾപ്പെടെ 25 മന്ത്രിമാരാണ് സത്യപ്രതിജ്ഞ ചെയ്തത്. മുൻ ആഭ്യന്തര സഹമന്ത്രിയായിരുന്ന മജുറ എംഎൽഎ ഹർഷ് സംഘ്‌വിയെ പുതിയ ഉപമുഖ്യമന്ത്രിയായി തിരഞ്ഞെടുത്തു. കൂടാതെ അദ്ദേഹത്തിന് ആഭ്യന്തര വകുപ്പിൻ്റെ ചുമതലയും നൽകിയിട്ടുണ്ട്. പൊതുഭരണം മുഖ്യമന്ത്രി ഭൂപേന്ദ്ര പട്ടേലിനാണ്.

ക്രിക്കറ്റ് താരം രവീന്ദ്ര ജഡേജയുടെ ഭാര്യയും ജാംനഗർ നോർത്ത് എംഎൽഎയുമായ റിവാബ ജഡേജ പുതിയ മന്ത്രിസഭയിലെ പ്രധാന ആകർഷണമായി. വിദ്യാഭ്യാസ മന്ത്രിയായാണ് 34 വയസ്സുകാരിയായ റിവാബ ചുമതലയേറ്റത്. റിവാബ ഉൾപ്പെടെ ആകെ മൂന്ന് വനിതാ മന്ത്രിമാർ പുതിയ മന്ത്രിസഭയിൽ ഇടം നേടിയിട്ടുണ്ട്. മെക്കാനിക്കൽ എൻജിനീയറായ റിവാബ 2019-ലാണ് ബിജെപിയിൽ അംഗമായത്. 2022-ലെ നിയമസഭ തെരഞ്ഞെടുപ്പിൽ ആം ആദ്മി പാർട്ടിയുടെ കർഷൺഭായ് കാർമൂറിനെ അരലക്ഷത്തിലേറെ വോട്ടുകൾക്കാണ് അവർ പരാജയപ്പെടുത്തിയത്.

മന്ത്രിസഭ വിപുലീകരണത്തിന് മുന്നോടിയായി മുഖ്യമന്ത്രി ഭൂപേന്ദ്ര പട്ടേൽ ഒഴികെ 16 മന്ത്രിമാരും കഴിഞ്ഞ ദിവസമാണ് രാജിക്കത്ത് നൽകിയത്. മന്ത്രിസഭാ പുനഃസംഘടനയുടെ ഭാഗമായി ബിജെപി കേന്ദ്ര നേതൃത്വത്തിൻ്റെ നിർദേശപ്രകാരമായിരുന്നു രാജി. ഇതിനുശേഷം വെള്ളിയാഴ്ച രാവിലെ മുഖ്യമന്ത്രി പട്ടേൽ ഗവർണർ ആചാര്യ ദേവവ്രതിനെ കണ്ട് പുതിയ മന്ത്രിസഭാംഗങ്ങളുടെ സത്യപ്രതിജ്ഞാ ചടങ്ങിന് അനുമതി തേടിയിരുന്നു.

ഗാന്ധിനഗറിലെ മഹാത്മാ മന്ദിർ കൺവെൻഷൻ സെൻ്ററിൽ നടന്ന ചടങ്ങിൽ ഗവർണർ ആചാര്യ ദേവവ്രത് പുതിയ മന്ത്രിസഭാംഗങ്ങൾക്ക് സത്യവാചകം ചൊല്ലിക്കൊടുത്തു. പാർട്ടി ദേശീയ അധ്യക്ഷൻ ജെപി നദ്ദ ഉൾപ്പെടെയുള്ള പ്രമുഖർ ചടങ്ങിൽ പങ്കെടുത്തു. ധനകാര്യവും നഗരവികസനവും മന്ത്രി കനുഭായ് മോഹൻലാലിനാണ്. ഋഷികേഷ് ഗണേഷ്ഭായിയാണ് പാർലമെന്ററികാര്യ വകുപ്പ് മന്ത്രി. കഴിഞ്ഞ മന്ത്രിസഭയിലുണ്ടായിരുന്ന ഋഷികേശ് പട്ടേൽ, പ്രഫുൽ പൻഷേരിയ, കുൻവാർജി ഭവാലിയ, കനുഭായ് ദേശായി, പർഷോത്തം സോളാങ്കി, ജിതേന്ദ്ര വഗാനി എന്നിവരടക്കം ആറു മന്ത്രിമാരെ മാത്രമാണ് പുതിയ മന്ത്രിസഭയിൽ നിലനിർത്തിയത്.

സാമൂഹിക സമവാക്യങ്ങൾ പാലിച്ച് പ്രാതിനിധ്യം

വരാനിരിക്കുന്ന തദ്ദേശ സ്ഥാപന തെരഞ്ഞെടുപ്പുകളും ആം ആദ്മി പാർട്ടിയുടെ (എഎപി) വർധിച്ചുവരുന്ന സ്വാധീനവും സാമൂഹിക സമവാക്യങ്ങളും കണക്കിലെടുത്താണ് മന്ത്രിസഭ വിപുലീകരിച്ചതെന്നാണ് റിപ്പോർട്ടുകൾ. 182 അംഗങ്ങളുള്ള നിയമസഭയിൽ അനുവദനീയമായ പരമാവധി മന്ത്രിമാരുടെ എണ്ണം 27 ആണ്.

പുതിയ മന്ത്രിസഭയിൽ ഒബിസി വിഭാഗത്തിൽനിന്ന് എട്ടുപേരെയും പാട്ടിദാർ വിഭാഗത്തിൽനിന്ന് ആറുപേരെയും പട്ടികവർഗ്ഗ (എസ്ടി) വിഭാഗത്തിൽനിന്ന് നാലുപേരെയും പട്ടികജാതി (എസ്സി) വിഭാഗത്തിൽനിന്ന് മൂന്നുപേരെയും ക്ഷത്രിയ വിഭാഗത്തിൽനിന്ന് രണ്ടുപേരെയും ബ്രാഹ്‌മണ, ജൈന വിഭാഗങ്ങളിൽനിന്ന് ഓരോരുത്തരെയും ഉൾപ്പെടുത്തിയിട്ടുണ്ട്. നരേഷ് പട്ടേൽ, ദർശന വഗേല, കാന്തിലാൽ അമൃതിയ, മനിഷ വാകിൽ, അർജുൻ മോന്ദ്‌വാഡിയ, സ്വരൂപ് ജി ഠാക്കൂർ തുടങ്ങിയവരാണ് മന്ത്രിസഭയിലെ മറ്റ് പുതുമുഖങ്ങൾ.

ഗുജറാത്ത് മന്ത്രിസഭയിലെ മാറ്റങ്ങളെക്കുറിച്ചുള്ള നിങ്ങളുടെ അഭിപ്രായം കമൻ്റ് ചെയ്യുക.

Article Summary: Gujarat's 26-member new cabinet sworn in. Harsh Sanghavi is the Deputy CM. Rivaba Jadeja, Ravindra Jadeja's wife, gets the Education Ministry.

#GujaratCabinet #HarshSanghavi #RivabaJadeja #BJP #GujaratPolitics #CabinetExpansion