ന്യൂഡല്‍ഹി: (KVARTHA) സ്കൂളിലെ വിദ്യാർത്ഥിനികൾക്ക് സാനിറ്ററി പാഡുകൾ ലഭ്യമാക്കുന്നതിനുള്ള ആർത്തവ ശുചിത്വ നയം, കേന്ദ്ര സർക്കാർ  അംഗീകരിച്ചതായി സുപ്രീം കോടതിയെ അറിയിച്ചു. 2023 ഏപ്രിൽ മാസത്തിൽ നൽകിയ ഉത്തരവിന്റെ അടിസ്ഥാനത്തിൽ, 2024 നവംബർ രണ്ടിന് കേന്ദ്ര ആരോഗ്യ മന്ത്രാലയം ഈ നയം അംഗീകരിച്ചതായും സർക്കാർ പറഞ്ഞു.

കേന്ദ്ര സർക്കാർ, 6 മുതൽ 12 വരെ ക്ലാസുകളിലെ വിദ്യാർത്ഥികൾക്ക് സൗജന്യമായി സാനിറ്ററി പാഡുകൾ വിതരണം ചെയ്യുന്നതിനും, സ്‌കൂളുകളിലുടനീളം പ്രായോഗികമായ ശുചിത്വ സൗകര്യങ്ങൾ ഒരുക്കുന്നതിനും സമർപ്പിച്ച നടപടികൾ സംബന്ധിച്ച് വിശദീകരണം നൽകി.  

ആർത്തവ ശുചിത്വം സംബന്ധിച്ച നയത്തിന് അനുസൃതമായി, എയ്ഡഡ്, സംസ്ഥാന, സ്വകാര്യ സ്‌കൂളുകൾ ഉൾപ്പെടെയുള്ള വിവിധ വിദ്യാഭ്യാസ സ്ഥാപനങ്ങളിൽ, വിദ്യാർത്ഥിനികൾക്ക് പ്രത്യേകം ടോയലറ്റ് സൗകര്യങ്ങൾ ഉറപ്പാക്കാനും ആവശ്യപ്പെട്ട് കോണ്‍ഗ്രസ് നേതാവും സാമൂഹിക പ്രവർത്തകയുമായ ജയ താക്കൂർ സമർപ്പിച്ച പൊതുതാൽപ്പര്യ ഹരജി പരിഗണിച്ചുള്ളതാണ് തീരുമാനം.

സർക്കാർ, സംസ്ഥാന-എയ്ഡഡ്, സ്വകാര്യ സ്‌കൂളുകള്‍ ഉള്‍പ്പെടെ രാജ്യത്തെ 97.5 ശതമാനം സ്‌കൂളുകളിലും വിദ്യാർഥികള്‍ക്കായി പ്രത്യേകം ടോയ്‌ലറ്റ് സൗകര്യം ഒരുക്കിയിട്ടുണ്ടെന്ന് കേന്ദ്രം സുപ്രീം കോടതിയെ അറിയിച്ചു. ഡല്‍ഹി, ഗോവ, പുതുച്ചേരി തുടങ്ങിയ സംസ്ഥാനങ്ങളും കേന്ദ്രഭരണ പ്രദേശങ്ങളും 100 ശതമാനം ലക്ഷ്യങ്ങള്‍ കൈവരിക്കുകയും മുൻ കോടതി ഉത്തരവുകള്‍ പാലിക്കുകയും ചെയ്തു.

#MenstrualHygiene #FreeSanitaryPads #SchoolGirls #GovernmentPolicy #Health #SupremeCourt