Viral Video | ബാറ്റിംഗ് പരിശീലനം നടത്തുന്നതിനിടെ മൈതാനത്തില്‍നിന്നും പന്ത് പറന്നെത്തിയത് ആരാധകന്റെ ഐഫോണിലേക്ക്; ഗ്ലൗസ് സമ്മാനിച്ച് സന്തോഷവാനാക്കി താരം, വൈറലായി വീഡിയോ

മൊഹാലി: (KVARTHA) ഐ പി എലിനായുള്ള പഞ്ചാബിനെതിരായ ഒരു മത്സരത്തിന് മുമ്പുള്ള ഡാരില്‍ മിചലിന്റെ ഒരു വീഡിയോയാണ് ഇപ്പോള്‍ സമൂഹ മാധ്യമങ്ങളില്‍ വൈറലായിരിക്കുന്നത്. മത്സരത്തിന് മുമ്പ് ബാറ്റിംഗ് പരിശീലനം നടത്തുമ്പോഴായിരുന്നു സംഭവം. പരിശീലനത്തിനിടെ മിചലിന്റെ ഷോട് കാണികള്‍ക്കിടയിലേക്ക് എത്തുകയായിരുന്നു.

എന്നാല്‍ ഈ ഷോട് ആരാധകന്റെ ഐ ഫോണില്‍ പതിക്കുകയായിരുന്നു. മിചലിന്റെ പരിശീലനം ഫോണില്‍ പകര്‍ത്തുകയായിരുന്നു ആരാധകന്‍. എന്തായാലും മിചല്‍ ആരാധകനെ നിരാശപ്പെടുത്തിയില്ല. തന്റെ ഒരു ജോഡി ഗ്ലൗസ് അദ്ദേഹം ആരാധകന് സമ്മാനിക്കുകയായിരുന്നു.

ഐ പി എല്‍ പോയിന്റ് പട്ടികയില്‍ മൂന്നാം സ്ഥാനത്താണിപ്പോള്‍ ചെന്നൈ. 11 മത്സരങ്ങളില്‍ 12 പോയിന്റാണ് ചെന്നൈയ്ക്ക്. ആറ് മത്സരങ്ങള്‍ ജയിച്ചപ്പോള്‍ അഞ്ച് മത്സരങ്ങളില്‍ ചെന്നൈ പരാജയപ്പെട്ടു. ഇനി മൂന്ന് മത്സരങ്ങളാണ് ചെന്നൈക്ക് അവശേഷിക്കുന്നത്. വെള്ളിയാഴ്ച ഗുജറാത് ടൈറ്റന്‍സിനെതിരായാണ് അടുത്ത മത്സരം. പിന്നാലെ മെയ് 12ന് രാജസ്താന്‍ റോയല്‍സിനേയും നേരിടും. അവസാന മത്സരം മെയ് 18നാണ്. ചിന്നസ്വാമി സ്റ്റേഡിയത്തില്‍ റോയല്‍ ചലന്‍ജേഴ്സ് ബെംഗ്‌ളൂറിനെയും നേരിടും.