വാഷിംഗ്ടൺ: (KVARTHA) ഇന്ത്യയും അമേരിക്കയും തമ്മിൽ ഏറെക്കാലമായി നിലനിൽക്കുന്ന ബന്ധം കൂടുതൽ ശക്തിപ്പെടുത്തുന്നതിനുള്ള സുപ്രധാന ചർച്ചകൾക്കാണ് പ്രധാനമന്ത്രി നരേന്ദ്ര മോദിയുടെ യുഎസ് സന്ദർശനം വേദിയൊരുക്കിയിരിക്കുന്നത്. വ്യാപാരം, പ്രതിരോധം, ഊർജ്ജം തുടങ്ങി സുപ്രധാന മേഖലകളിൽ ഇരു രാജ്യങ്ങളും തമ്മിലുള്ള സഹകരണം വർദ്ധിപ്പിക്കുന്നതിനുള്ള തീരുമാനങ്ങൾ ഈ കൂടിക്കാഴ്ചയിൽ ഉണ്ടായി.

Sharing my remarks during meeting with @POTUS @realDonaldTrump. https://t.co/kSqmLuxiPs

— Narendra Modi (@narendramodi) February 13, 2025

വൈറ്റ് ഹൗസിൽ നടന്ന വാർത്താസമ്മേളനത്തിൽ ഇരുവരും പരസ്പരം പ്രശംസിച്ചപ്പോൾ, ട്രംപിന്റെ മുദ്രാവാക്യമായ 'മാഗ' (മേക്ക് അമേരിക്ക ഗ്രേറ്റ് എഗെയ്ൻ) പരാമർശിച്ചുകൊണ്ട് മോദി, 'മേക്ക് ഇന്ത്യ ഗ്രേറ്റ് എഗെയ്ൻ' എന്ന് പറയുകയും 'മാഗയും മാഗയും ഒന്നിക്കുമ്പോൾ അത് മെഗാ ആയി മാറുകയും ചെയ്യും' എന്ന് കൂട്ടിച്ചേർക്കുകയും ചെയ്തു. മോദി-ട്രംപ് കൂടിക്കാഴ്ചയിലെ അഞ്ച് പ്രധാന കാര്യങ്ങൾ.

1. അനധികൃത കുടിയേറ്റക്കാരുടെ പ്രശ്നം

അമേരിക്കയിൽ അനധികൃതമായി താമസിക്കുന്ന ഇന്ത്യക്കാരുടെ പ്രശ്നവും ചർച്ചയിൽ ഉന്നയിക്കപ്പെട്ടു. അനധികൃതമായി താമസിക്കുന്നവരെ തിരിച്ചയക്കുന്നതിനെക്കുറിച്ച് ഇരു നേതാക്കളും സംസാരിച്ചു. 'ഈ വിഷയത്തിൽ ഞങ്ങളുടെ കാഴ്ചപ്പാടുകൾ ഒന്നുതന്നെയാണ്, അതായത് അമേരിക്കയിൽ അനധികൃതമായി താമസിക്കുന്ന ഏതെങ്കിലും ഇന്ത്യക്കാരെ കണ്ടെത്തിയാൽ, അവരെ ഇന്ത്യയിലേക്ക് തിരികെ കൊണ്ടുപോകാൻ ഞങ്ങൾ പൂർണമായും തയ്യാറാണ്', പ്രധാനമന്ത്രി പറഞ്ഞു.

ചില കുടിയേറ്റക്കാരെ മനുഷ്യക്കടത്തുകാരാണ് കൊണ്ടുവരുന്നതെന്നും അവരെ അമേരിക്കയിലേക്ക് കൊണ്ടുപോയതായി അവർക്ക് പോലും അറിയില്ലെന്നും അദ്ദേഹം കൂട്ടിച്ചേർത്തു. ട്രംപ് പ്രസിഡന്റായി അധികാരമേറ്റതിനുശേഷം, രേഖകളില്ലാത്ത ഒരു കൂട്ടം ഇന്ത്യൻ കുടിയേറ്റക്കാരെ യുഎസ് സൈനിക വിമാനം ഉപയോഗിച്ച് ഇന്ത്യയിലേക്ക് തിരിച്ചയച്ച രീതി വലിയ പ്രതിഷേധത്തിന് ഇടയാക്കിയിരുന്നു. സ്വദേശത്തേക്ക് കൊണ്ടുപോകുന്ന ഇന്ത്യൻ പൗരന്മാരോട് മോശമായ പെരുമാറ്റം ഉണ്ടാകില്ലെന്ന് ഉറപ്പാക്കാൻ ഇന്ത്യ യുഎസുമായി ചേർന്ന് പ്രവർത്തിക്കുന്നുണ്ടെന്ന് കഴിഞ്ഞ ആഴ്ച ഇന്ത്യയുടെ വിദേശകാര്യ മന്ത്രി പറഞ്ഞിരുന്നു.

2.നികുതി ചുമത്തൽ 

ഇരു രാജ്യങ്ങളും തമ്മിലുള്ള വ്യാപാര ബന്ധം കൂടുതൽ ശക്തമാക്കുന്നതിനെക്കുറിച്ച് മോദിയും ട്രംപും ചർച്ചകൾ നടത്തി. അമേരിക്കൻ ഉൽപ്പന്നങ്ങൾക്ക് ഇന്ത്യ ചുമത്തുന്ന തീരുവ കുറയ്ക്കുന്നതിനെക്കുറിച്ച് ട്രംപ് പ്രതീക്ഷ പ്രകടിപ്പിച്ചു. എന്നാൽ 'പരസ്പര താരിഫു'കളിൽ നിന്ന് അമേരിക്ക ഇന്ത്യയെ ഒഴിവാക്കില്ലെന്നും ട്രംപ് വ്യക്തമാക്കി.

അമേരിക്ക ഇന്ത്യയ്ക്ക് മേൽ എന്ത് തീരുവ ചുമത്തിയാലും ഇന്ത്യ അതേ തീരുവ അമേരിക്കയ്ക്കും മേൽ ചുമത്തും എന്നതാണ് ട്രംപിന്റെ ഈ ആശയത്തിന്റെ പ്രധാന ലക്ഷ്യം. പ്രതിരോധ രംഗത്ത് സഹകരണം വർദ്ധിപ്പിക്കുന്നതിനും എഫ്-35 യുദ്ധവിമാനങ്ങൾ ഇന്ത്യയ്ക്ക് നൽകുന്നതിനെക്കുറിച്ചും ചർച്ചകൾ നടന്നു. എന്നാൽ എഫ്-35 വിമാനങ്ങൾ വാങ്ങുന്നതിനെക്കുറിച്ച് ഔദ്യോഗികമായ തീരുമാനമൊന്നും എടുത്തിട്ടില്ലെന്ന് പിന്നീട് അധികൃതർ അറിയിച്ചു.

3. തഹാവൂർ റാണയെ കൈമാറൽ 

മുംബൈ ഭീകരാക്രമണക്കേസിൽ ഇന്ത്യ തിരയുന്ന തഹാവൂർ റാണയെ കൈമാറുമെന്ന് ട്രംപ് പ്രഖ്യാപിച്ചു. ഇതിന് മോദി ട്രംപിനോട് നന്ദി പറഞ്ഞു. തീവ്രവാദത്തിന്റെ ഭീഷണി നേരിടാൻ ഇന്ത്യയും യുഎസും ഒരുമിച്ച് പ്രവർത്തിക്കുമെന്ന് ട്രംപ് പറഞ്ഞു. ലോകത്തിലെ ഏറ്റവും അപകടകാരികളായ ഒരാളെ ഇന്ത്യക്ക് കൈമാറാൻ തീരുമാനിച്ചതിൽ ഞാൻ സന്തോഷവാനാണ്. നിയമനടപടികൾക്കായി ഇന്ത്യയിലേക്ക് അയക്കും. മറ്റു ചിലരെയും ഇന്ത്യക്ക് കൈമാറാനുള്ള നടപടികൾ സ്വീകരിക്കുന്നുവെന്നും ട്രംപ് പറഞ്ഞു.

President Donald J. Trump and Indian Prime Minister @NarendraModi 🇺🇸🇮🇳 pic.twitter.com/5w7n5uRdmL

— President Donald J. Trump (@POTUS) February 13, 2025

4. ആണവോർജ സഹകരണം 

ഇന്ത്യയും യുഎസും തമ്മിലുള്ള സിവിൽ ആണവോർജ സഹകരണത്തിൽ വലിയ മുന്നേറ്റം ഉണ്ടായിട്ടുണ്ടെന്ന് യുഎസ് പ്രസിഡന്റ് പറഞ്ഞു. അമേരിക്കൻ ആണവ സാങ്കേതികവിദ്യ ഇന്ത്യയിൽ ലഭ്യമാക്കുന്നതിനായി ഇന്ത്യ നിയമങ്ങളിൽ മാറ്റങ്ങൾ വരുത്തുന്നുണ്ടെന്നും അദ്ദേഹം കൂട്ടിച്ചേർത്തു. ലഡാക്കിലെ ഇന്ത്യ-ചൈന അതിർത്തി സംഘർഷത്തെക്കുറിച്ച് സംസാരിക്കവെ, അതിർത്തിയിലെ സ്ഥിതിഗതികൾ വളരെ ഭയാനകമാണെന്നും, ഈ വിഷയത്തിൽ തനിക്ക് എങ്ങനെ സഹായിക്കാനാകുമെന്ന് പരിശോധിക്കുമെന്നും ട്രംപ് പറഞ്ഞു. 

5. പ്രതിരോധം, എണ്ണ

ഇന്ത്യയുടെ ഒന്നാം നമ്പർ എണ്ണ, വാതക വിതരണക്കാരായി യുഎസിനെ മാറ്റുന്ന ഒരു കരാറിൽ താനും മോദിയും എത്തിയതായി യുഎസ് പ്രസിഡന്റ് അറിയിച്ചു. ഇന്ത്യയുമായുള്ള 45 ബില്യൺ ഡോളറിന്റെ യുഎസ് വ്യാപാര കമ്മി കുറയ്ക്കുന്നതിനുള്ള പദ്ധതിയുടെ ഭാഗമാണിത്. പ്രതിരോധ മേഖലയിലെ സഹകരണം മെച്ചപ്പെടുത്താനും ഇരു രാജ്യങ്ങളും തീരുമാനിച്ചു. ഈ വർഷം മുതൽ ഇന്ത്യയിലേക്കുള്ള കോടിക്കണക്കിന് ഡോളറിന്റെ പ്രതിരോധ വിൽപന വർദ്ധിപ്പിക്കും. ലോകത്തിലെ ഏറ്റവും പുതിയ യുദ്ധവിമാനമായ എഫ്-35 ഇന്ത്യയ്ക്ക് നൽകുന്നതിനെക്കുറിച്ചും ആലോചിക്കുന്നുണ്ട്.

ഈ വാർത്ത പങ്കുവെക്കുകയും അഭിപ്രായങ്ങൾ രേഖപ്പെടുത്തുകയും ചെയ്യുക 

Prime Minister Modi and President Trump met to strengthen ties between India and the US. Key outcomes include tackling illegal immigration, tax issues, defense cooperation, and the handover of terrorist Tahawwur Rana to India.

#ModiTrumpMeeting #IndiaUSRelations #DefenseCooperation #TaxDeals #IllegalImmigration #TahawwurRana