ന്യൂഡൽഹി: (KVARTHA) ആപ്പിൾ ഫോണുകൾ നിർമ്മിക്കുന്ന ഫോക്സ്‌കോൺ കമ്പനി ഇന്ത്യയിലെ ജോലി നിയമനത്തിൽ വലിയ മാറ്റം വരുത്തി. ഇനിമുതൽ ജോലിക്ക് അപേക്ഷിക്കുന്നവരുടെ പ്രായം, ലിംഗം, വിവാഹിതരാണോ അല്ലയോ എന്നീ വിവരങ്ങൾ ചോദിക്കരുതെന്ന് കമ്പനി തീരുമാനിച്ചതായി റിപ്പോർട്ട്. ഈ തീരുമാനത്തിന് കാരണം വാർത്താ ഏജൻസിയായ റോയിട്ടേഴ്‌സ് പുറത്തുവിട്ട ഒരു റിപ്പോർട്ടാണ്. ഈ റിപ്പോർട്ടിൽ, ഫോക്സ്‌കോൺ കമ്പനി വിവാഹിതരായ സ്ത്രീകളെ ജോലിയിൽ നിന്ന് ഒഴിവാക്കുന്നു എന്ന ആരോപണം ഉയർന്നിരുന്നു.

ഇന്ത്യയിലെ ഫോക്സ്‌കോൺ ഫാക്ടറികളിൽ, പ്രത്യേകിച്ച് ഐഫോൺ നിർമ്മാണത്തിൽ, നിരവധി സ്ത്രീകൾ ജോലി ചെയ്യുന്നുണ്ട്. എന്നാൽ ജോലിക്കാരെ തെരഞ്ഞെടുക്കുന്നതിന് ഇടനിലക്കാർക്ക് ആണ് ചുമതല. ഒടുവിൽ അവരെ അഭിമുഖം നടത്തി തിരഞ്ഞെടുക്കുന്നത് ഫോക്സ്കോൺ ആണ്. ഇപ്പോൾ ഫോക്സ്‌കോൺ കമ്പനി കർശന നിർദേശങ്ങൾ നൽകിയെന്നാണ് റിപ്പോർട്ട്. ഇനിമുതൽ ജോലി അപേക്ഷകളിൽ വിവാഹിതരാണോ അല്ലയോ, പ്രായം, ലിംഗം എന്നിവ പരാമർശിക്കരുതെന്നുമാണ് നിർദേശം.

2023 ജനുവരി മുതൽ 2024 മെയ് വരെ ഫോക്‌സ്‌കോൺ ഉപയോഗിച്ചിരുന്ന തൊഴിൽ പരസ്യങ്ങൾ പരിശോധിച്ചപ്പോൾ, ആപ്പിളും ഫോക്‌സ്‌കോണും പറയുന്ന നയങ്ങൾക്ക് വിരുദ്ധമായി, സ്മാർട്ട്‌ഫോൺ നിർമ്മാണ ജോലികൾക്ക് പ്രത്യേക പ്രായത്തിലുള്ള അവിവാഹിതരായ സ്ത്രീകളെ മാത്രമേ എടുക്കുന്നുള്ളുവെന്നാണ് റോയിട്ടേഴ്‌സ് റിപ്പോർട്ട് ചെയ്തത്. 

ഈ വാർത്ത പുറത്തുവന്നതിന് ശേഷം, ഫോക്‌സ്‌കോൺ തങ്ങളുടെ എച്ച്ആർ ഉദ്യോഗസ്ഥരോട്, തൊഴിൽ പരസ്യങ്ങൾ മുഴുവൻ ഒരുപോലെയാക്കാൻ നിർദേശം നൽകിയതായി മൂന്ന് നിയമന ഏജൻസികളെ ഉദ്ധരിച്ച്  റോയിട്ടേഴ്‌സ് റിപ്പോർട്ട് ചെയ്തു. അതോടൊപ്പം, മാധ്യമങ്ങളോട് ഒന്നും പറയരുതെന്ന് ഏജൻസികളോട് നിർദേശം നൽകിയതായും ഇവർ പറഞ്ഞു.

അതേസമയം, ഇക്കാര്യത്തിൽ ഫോക്സ്‌കോൺ ഔദ്യോഗികമായി പ്രതികരിച്ചിട്ടില്ലെന്നാണ് റിപ്പോർട്ട്. ഐഫോൺ നിർമ്മാണത്തിൽ വിവാഹിതരായ സ്ത്രീകളെ നിയമിക്കുന്നതിനുള്ള നിയമങ്ങൾ മാറ്റിയോ എന്ന ചോദ്യത്തിനും മറുപടി ഉണ്ടായില്ല. ആപ്പിളും സമാനമായ ചോദ്യങ്ങൾക്ക് മറുപടി നൽകാൻ വിസമ്മതിച്ചു. എന്നാൽ ഇരു കമ്പനികളും ഇന്ത്യയിൽ വിവാഹിതരായ സ്ത്രീകളെ നിയമിക്കുന്നുണ്ടെന്ന് നേരത്തെ പറഞ്ഞിരുന്നു

#Foxconn #IndiaHiring #JobDiscrimination #GenderEquality #WomenInWorkforce #Apple #iPhone #Reuters #EmploymentLaw