ഡെല്‍ഹി നിയമസഭാ തെരഞ്ഞെടുപ്പിന് ദിവസങ്ങള്‍ മാത്രം ബാക്കി നില്‍ക്കെ ബിജെപിക്ക് തിരിച്ചടി; മുന്‍ കേന്ദ്രമന്ത്രി ഹര്‍ഷരന്‍ സിംഗ് അരവിന്ദ് കെജ് രിവാളിന്റെ പാളയത്തില്‍

ന്യൂഡെല്‍ഹി: (www.kvartha.com 26.01.2020) ഡെല്‍ഹി നിയമസഭ തെരഞ്ഞെടുപ്പിന് ദിവസങ്ങള്‍ മാത്രം ബാക്കിനില്‍ക്കെ ബി ജെ പിക്ക് തിരിച്ചടി നല്‍കി മുന്‍ കേന്ദ്രമന്ത്രിയും നാല് തവണ എം എല്‍ എയുമായ ഹര്‍ഷരന്‍ സിംഗ് ബള്ളി അരവിന്ദ് കെജ് രിവാളിന്റെ പാളയത്തില്‍.

തെരഞ്ഞെടുപ്പില്‍ ഹരി നഗര്‍ മണ്ഡലത്തില്‍ സീറ്റ് നിഷേധിച്ചതിനെ തുടര്‍ന്നാണ് ഹര്‍ഷരണ്‍ സിംഗ് ബി ജെ പി വിട്ട് ആം ആദ്മിയില്‍ ചേക്കേറിയത്. ഹര്‍ഷരണിന് പകരം ഇത്തവണ തജീന്ദര്‍ പല്‍ സിംഗിനെ ആണ് ഹരി നഗര്‍ സീറ്റില്‍ ബി ജെ പി മത്സരിപ്പിക്കുന്നത്.


1993 മുതല്‍ 2013 വരെ മണ്ഡലത്തെ പ്രതിനിധീകരിച്ചത് ഹര്‍ഷരണ്‍ ആയിരുന്നു. 2013ല്‍ സീറ്റ് നിഷേധിക്കപ്പെട്ടതോടെ ഹര്‍ഷരണ്‍ കോണ്‍ഗ്രസ് ടിക്കറ്റില്‍ മത്സരിച്ചു. എന്നാല്‍ തോറ്റതിന് പിന്നാലെ വീണ്ടും ബി ജെ പിയിലേക്ക് തിരിച്ചെത്തി.

ഇപ്പോള്‍ അരവിന്ദ് കേജ്രിവാളിന്റെയും മനീഷ് സിസോദിയയുടെയും സാന്നിധ്യത്തില്‍ വെള്ളിയാഴ്ചയാണ് ആം ആദ്മിയില്‍ അംഗമായത്. കെജ് രിവാള്‍ സര്‍ക്കാരിന് കീഴില്‍ വിദ്യാഭ്യാസം, ആരോഗ്യം എന്നീ വകുപ്പുകളാണ് ബള്ളിക്ക് വാഗ്ദാനം ചെയ്തിരിക്കുന്നത്. ചടങ്ങില്‍ വെച്ച് കെജ് രിവാളിനെ അഭിനന്ദിച്ച ബെള്ളി അദ്ദേഹത്തിന് എല്ലാവിധ അനുഗ്രഹങ്ങളും ആശംസകളും നേരുന്നുവെന്നും പറഞ്ഞു.

അതേസമയം, തെരഞ്ഞെടുപ്പ് അടുത്തിരിക്കെ ബി ജെ പി നേതാക്കളുടെ കൊഴിഞ്ഞുപോക്ക് പാര്‍ട്ടിക്ക് വന്‍ തിരിച്ചടിയാണ് നല്‍കിയിരിക്കുന്നത്. അധികാരം പിടിച്ചെടുക്കുന്നതിനായി നരേന്ദ്ര മോദി മുതല്‍ അമിത് ഷാ വരെ ഡെല്‍ഹിയിലെ പ്രചരണ രംഗത്തുണ്ട്.