ആദിത്യൻ ആറന്മുള  

(KVARTHA) അതിരൂക്ഷമായ കാലാവസ്ഥ കാരണം 2024ലെ ആദ്യ ഒമ്പത് മാസങ്ങളില്‍ രാജ്യത്ത് മൂവായിരത്തിലധികം പേര്‍ മരിക്കുകയും 2,00,000ലധികം വീടുകള്‍ നശിപ്പിക്കപ്പെടുകയും ചെയ്തതായി സെന്റര്‍ ഫോര്‍ സയന്‍സ് ആന്‍ഡ് എന്‍വയോണ്‍മെന്റ് എന്ന സന്നദ്ധസംഘടന വെള്ളിയാഴ്ച പുറത്തുവിട്ട റിപ്പോര്‍ട്ടില്‍ പറയുന്നു. അതിതീവ്ര മഴയും ഉഷ്ണതരംഗവും ഈ വര്‍ഷം ഇന്ത്യയില്‍ അതിരൂക്ഷമായിരുന്നു. കൃഷി, തൊഴില്‍, പൊതുതെരഞ്ഞെടുപ്പ് എന്നിവയെ സാരമായി ബാധിക്കുകയും ചെയ്തു. 

വോട്ട് ചെയ്യാന്‍ ക്യൂ നിന്നവരും തെരഞ്ഞെടുപ്പ് ഉദ്യോഗസ്ഥരും കുഴഞ്ഞുവീണ് മരിച്ച സാഹചര്യങ്ങളുണ്ടായി. നവംബറായിട്ടും രാജ്യത്ത് ഇതുവരെ ശൈത്യം ആരംഭിച്ചിട്ടില്ല. ഈ മാസവും ചൂടി കൂടുമെന്നാണ് കേന്ദ്ര കാലാവസ്ഥാ കേന്ദ്രം ഡയറക്ടര്‍ കഴിഞ്ഞ ആഴ്ച വാര്‍ത്താസമ്മേളനത്തില്‍ അറിയിച്ചത്. ഡിസംബര്‍ അവസാനത്തോടെ തണുപ്പിന്റെ സൂചന ഉണ്ടാകുമെന്നും ജനുവരിയില്‍ ആരംഭിക്കുമെന്നും വ്യക്തമാക്കി.

'കാലാവസ്ഥ ഇന്ത്യ 2024: തീവ്ര കാലാവസ്ഥാ സംഭവങ്ങളുടെ വിലയിരുത്തല്‍' എന്നാണ് റിപ്പോര്‍ട്ടിന്റെ പേര്. വര്‍ഷത്തിലെ ആദ്യ ഒമ്പത് മാസങ്ങളില്‍ 93% ദിവസങ്ങളിലും അല്ലെങ്കില്‍ 274-ല്‍ 255 ദിവസങ്ങളിലും രാജ്യം തീവ്ര കാലാവസ്ഥാ സംഭവങ്ങളെ അഭിമുഖീകരിച്ചതായി റിപ്പോര്‍ട്ട് പറയുന്നു. താരതമ്യപ്പെടുത്തുമ്പോള്‍, കഴിഞ്ഞ വര്‍ഷം ഇതേ കാലയളവില്‍ 86% ദിവസങ്ങളിലും 273-ല്‍ 235 ദിവസങ്ങളിലും രാജ്യം ഇത്തരം തീവ്ര കാലാവസ്ഥ നേരിട്ടു. 

മിന്നല്‍ അല്ലെങ്കില്‍ കൊടുങ്കാറ്റ്, കനത്ത മഴ അല്ലെങ്കില്‍ വെള്ളപ്പൊക്കം, ഉഷ്ണതരംഗങ്ങള്‍, തണുത്ത തരംഗങ്ങള്‍, മേഘസ്‌ഫോടനങ്ങള്‍, ചുഴലിക്കാറ്റുകള്‍, മഞ്ഞുവീഴ്ച, ഉരുള്‍പൊട്ടല്‍ എന്നിവ മരണത്തിന് കാരണമായതായി റിപ്പോര്‍ട്ടിലെ തീവ്ര കാലാവസ്ഥാ സംഭവങ്ങളെ നിര്‍വചിച്ചിരിക്കുന്നു. കാലാവസ്ഥ വ്യതിയാനം കാരണം ഏറ്റവും കൂടുതല്‍ പേര്‍ മരിച്ചത് വയനാട് ചൂരല്‍മലയിലുണ്ടായ ഉരുള്‍ പൊട്ടലിലാണ്, 420.

ഇന്ത്യന്‍ കാലാവസ്ഥാ വകുപ്പില്‍ നിന്നുള്ള സംഗ്രഹവും പ്രവചന ബുള്ളറ്റിനുകളും കേന്ദ്ര ആഭ്യന്തര മന്ത്രാലയത്തിന്റെ ദുരന്തനിവാരണ വിഭാഗത്തില്‍ നിന്നുള്ള സാഹചര്യ റിപ്പോര്‍ട്ടുകളും ഉപയോഗിച്ചാണ് റിപ്പോര്‍ട്ട് തയ്യാറാക്കിയത്. രാജ്യത്തെ അതിരൂക്ഷമായ കാലാവസ്ഥാ സംഭവങ്ങള്‍, സ്വത്ത് നാശം, വിളനാശം എന്നിവയെക്കുറിച്ചുള്ള ഡാറ്റയില്‍ വിടവുകള്‍ ഉണ്ടെന്ന് റിപ്പോര്‍ട്ട് പറയുന്നു. ചില സന്ദര്‍ഭങ്ങളില്‍, മാധ്യമ റിപ്പോര്‍ട്ടുകള്‍ കേന്ദ്ര ഗവണ്‍മെന്റിന്റെ നഷ്ടവും നാശനഷ്ടവും സംബന്ധിച്ച റിപ്പോര്‍ട്ടുകളുമായി വൈരുദ്ധ്യമുള്ളതായി റിപ്പോര്‍ട്ട് പറയുന്നു.

സംഭവത്തിന്റെ  നഷ്ടങ്ങളെക്കുറിച്ചുള്ള അപൂര്‍ണ്ണമായ ഡാറ്റ ശേഖരണം കാരണം റിപ്പോര്‍ട്ട് ചെയ്യപ്പെട്ട ഈ നാശനഷ്ടങ്ങള്‍ ശരിയായി വിലയിരിത്താനായിട്ടില്ല. പ്രത്യേകിച്ച് പൊതു സ്വത്ത്, വിള നാശനഷ്ടങ്ങള്‍ എന്നിവയുടെ കാര്യത്തിലെന്ന് ഗവേഷകര്‍ പറഞ്ഞു. കഴിഞ്ഞ ഒമ്പത് മാസങ്ങളില്‍ കേന്ദ്രഭരണപ്രദേശങ്ങളില്‍ ഉള്‍പ്പെടെ 32 സംസ്ഥാനങ്ങളില്‍ ഇടിമിന്നലും കൊടുങ്കാറ്റും അനുഭവപ്പെട്ടു, 1901 ന് ശേഷമുള്ള ഏറ്റവും ഉയര്‍ന്ന താപനിലയാണ് ഇക്കൊല്ലം അനുഭവപ്പെട്ടത്. ഈ വര്‍ഷം വെള്ളപ്പൊക്കത്തില്‍ രാജ്യവ്യാപകമായി 1,376 ജീവനുകള്‍ നഷ്ടപ്പെട്ടു.

കാലാവസ്ഥാ ദുരന്തങ്ങളെ സമീപിക്കുന്നതില്‍ നിര്‍ണായകമായ മാറ്റം ആവശ്യമാണെന്ന് ഗവേഷകര്‍ ആവശ്യപ്പെട്ടു. ഉദാഹരണത്തിന്, വെള്ളപ്പൊക്ക നിവാരണത്തിന് കടലാസിലെ പദ്ധതികളല്ല ആവശ്യമെന്നും റിപ്പോര്‍ട്ട് പറയുന്നു. ഭാവിയിലെ കൊടുങ്കാറ്റുകള്‍ക്കുള്ള തയ്യാറെടുപ്പിനായി പ്രകൃതിദത്ത ജലസംഭരണികളായി പ്രവര്‍ത്തിക്കാന്‍ വികസിപ്പിച്ച ഹരിത ഇടങ്ങളും വനങ്ങളും അടക്കം ഡ്രെയിനേജ്, വാട്ടര്‍ റീചാര്‍ജ് സംവിധാനങ്ങളുടെ തന്ത്രപരമായ വികസനം വേണമെന്ന്  ആവശ്യപ്പെടുന്നു.
കൂടാതെ,  മാനുഷികവും സാമ്പത്തികവുമായ നഷ്ടങ്ങള്‍ക്ക് ഉത്തരവാദികളായ ഉയര്‍ന്ന കാര്‍ബണ്‍ പുറന്തള്ളുന്ന രാജ്യങ്ങളില്‍ നിന്ന് കാലാവസ്ഥാ നഷ്ടപരിഹാരം ആവശ്യമാണെന്നും അവര്‍ നിര്‍ദ്ദേശിച്ചു.

ഈ റിപ്പോര്‍ട്ടിലുള്ള കാര്യങ്ങള്‍ നല്ല വാര്‍ത്തയല്ലെന്ന് സെന്റര്‍ ഫോര്‍ സയന്‍സ് ആന്‍ഡ് എന്‍വയോണ്‍മെന്റ് ഡയറക്ടര്‍ ജനറല്‍ സുനിത നരേന്‍ പറഞ്ഞു. എന്നാല്‍ ഇത് ആവശ്യമായ മുന്നറിയിപ്പാണ്, പ്രകൃതിയുടെ തിരിച്ചടി തിരിച്ചറിയാനുള്ള ആഹ്വാനവും അത് ലഘൂകരിക്കാന്‍ ആവശ്യമായ അടിയന്തിര നടപടിയുമാണ്. കാലാവസ്ഥാ വ്യതിയാനത്തെ അര്‍ത്ഥവത്തായ തോതില്‍ പ്രതിരോധിച്ചില്ലെങ്കില്‍, ഇന്നത്തെ വെല്ലുവിളികള്‍ നാളെ കൂടുതല്‍ വഷളാക്കുകയേയുള്ളൂ എന്നും അദ്ദേഹം ചൂണ്ടിക്കാട്ടി.

കഴിഞ്ഞ മെയില്‍ ചരിത്രത്തിലെ ഏറ്റവും ചൂടേറിയ ദിവസങ്ങള്‍ രേഖപ്പെടുത്തി. 2024 മാര്‍ച്ചില്‍, രാജ്യത്തെ താപനിലയുടെ 60 ശതമാനത്തിലധികം സാധാരണയിലും കൂടുതല്‍ ആയിരുന്നു. താപ തരംഗങ്ങളുടെ ആവൃത്തിയും തീവ്രതയും വര്‍ദ്ധിക്കുന്നതിനനുസരിച്ച് അവയുടെ ആഘാതം കൂടുന്നു. ഇത് ഏറ്റവും കൂടുതല്‍ ബാധിച്ചത് ഗ്രാമങ്ങളിലെയും നഗരങ്ങളിലെയും സാമ്പത്തികമായി പിന്നാക്കം   നില്‍ക്കുന്ന സ്ത്രീകളെയാണെന്ന് സിഗ്‌നിഫിക്കന്‍സ് മാഗസിനില്‍  അടുത്തിടെ പ്രസിദ്ധീകരിച്ച ഒരു പഠനം പറയുന്നു.  

2022 ലെ യുഎന്‍ വിമന്‍ റിപ്പോര്‍ട്ടില്‍ കാലാവസ്ഥാ വ്യതിയാനവും ലിംഗ അസമത്വവും  തമ്മിലുള്ള ബന്ധം വിശദീകരിക്കുന്നു. കാലാവസ്ഥാ വ്യതിയാനം  ഗര്‍ഭിണികളില്‍ രക്താതിമര്‍ദ്ദത്തിനുള്ള സാധ്യത വര്‍ദ്ധിപ്പിക്കുന്നു. വര്‍ദ്ധിച്ചുവരുന്ന താപനില കാരണം ജനിക്കും മുമ്പ് മരിച്ച കുട്ടികളുടെയും മാസം തികയാതെ ജനിച്ചവരുടെയും കണക്കുകളും റിപ്പോര്‍ട്ടില്‍ പറയുന്നു. ഗര്‍ഭകാലത്തുണ്ടാകുന്ന അണുബാധകള്‍ വിളര്‍ച്ച, കുട്ടിയുടെ വളര്‍ച്ചയെ ബാധിക്കുന്ന കാര്യങ്ങള്‍ എന്നിവയ്ക്ക് കാരണമാകും പോഷകാഹാര  കുറവ് , ശരീരത്തിലെ ഷുഗര്‍ ലെവലില്‍ വ്യതിയാനം സംഭവിക്കും, ഇവയെല്ലാം സങ്കീര്‍ണമായ ആരോഗ്യപ്രശ്നങ്ങള്‍  സൃഷ്ടിക്കും. 

സ്ത്രീകളുടെ ജീവന്‍ തന്നെ അപകടത്തിലായേക്കും- ഡല്‍ഹിയിലെ ഷാലിമാര്‍ ബാഗിലെ ഫോര്‍ട്ടിസ് ഹോസ്പിറ്റലിലെ ഒബ്സ്റ്റട്രിക്‌സ് ആന്‍ഡ് ഗൈനക്കോളജി ഡയറക്ടര്‍ ഡോ. ഉമാ വൈദ്യനാഥന്‍ പറയുന്നു.   20 വര്‍ഷത്തിലേറെയായി ഈ രംഗത്ത് പ്രവര്‍ത്തിക്കുന്നയാളാണ് ഡോക്ടര്‍.  ചൂട് കാരണം വിളവെടുപ്പ് വളരെ മോശമായിരുന്നു. ഇത് ഗര്‍ഭിണികളിലെ പോഷകാഹാരക്കുറവ്, മാസംതികയാതെയുള്ള പ്രസവം ഉള്‍പ്പെടെയുള്ള പ്രത്യുല്‍പാദനപരമായ പ്രത്യാഘാതങ്ങളുടെ സാധ്യത വര്‍ദ്ധിപ്പിക്കുന്ന.  കുഞ്ഞുങ്ങളിലെ വൈകല്യങ്ങള്‍ക്കും മരണനിരക്കിനും കൂടുതല്‍ സാധ്യതയുള്ളതാക്കുമെന്നും ഡോക്ടര്‍ പറയുന്നു.

ഇന്ത്യക്ക് ഏകീകൃതവും ശക്തവുമായ കാലാവസ്ഥാ നിയമം അത്യാവശ്യമാണ്, അത് ഹരിതവല്‍ക്കരണം പ്രോത്സാഹിപ്പിക്കുക മാത്രമല്ല, നമ്മുടെ സമ്പദ്വ്യവസ്ഥയെയും സമൂഹത്തെയും സുസ്ഥിരവും സുസ്ഥിരവുമാക്കുന്ന, യഥാര്‍ത്ഥ പാരിസ്ഥിതിക പുരോഗതി ലക്ഷ്യമിട്ടുള്ളതായിരിക്കണം-  ഫോസില്‍ ഇന്ധന ഉടമ്പടി ഇനിഷ്യേറ്റീവിന്റെ ഗ്ലോബല്‍ എന്‍ഗേജ്‌മെന്റ് ഡയറക്ടറും സഹസ്ഥാപകനുമായ ഹര്‍ജീത് സിംഗ് പറഞ്ഞു.  

പുതിയ കാര്‍ബണ്‍ ക്രെഡിറ്റ് ട്രേഡിംഗ് സ്‌കീമും ഗ്രീന്‍ ക്രെഡിറ്റ് പ്രോഗ്രാമും അവതരിപ്പിക്കുന്നതോടെ, കര്‍ശനവും സുതാര്യവുമായ പ്രവര്‍ത്തനമില്ലാതെ, ഈ സംരംഭങ്ങള്‍ കേവലം കോര്‍പ്പറേറ്റ് താല്‍പ്പര്യങ്ങളെ സേവിക്കുകയും പരിസ്ഥിതി നയത്തില്‍ വെള്ളം ചേര്‍ക്കുകയും  ചെയ്യുന്ന ഒരു വലിയ അപകടമുണ്ടാവുകയും ചെയ്യുമെന്നും സിംഗ് പറഞ്ഞു.

#ClimateCrisis #ExtremeWeather #India2024 #EnvironmentalImpact #CSEReport #SustainableFuture