ഭാര്യയ്ക്ക് വിവാഹേതരബന്ധമുണ്ടെന്നും കുഞ്ഞിനെ കൈമാറരുതെന്നും യുവാവ്; ആരോപണം മാത്രമാണെന്ന് കോടതി

നാലര വയസുള്ള കുട്ടിയുടെ സംരക്ഷണാവകാശം അമ്മയ്ക്ക് നല്‍കിക്കൊണ്ടാണ് കോടതിയുടെ ഈ സുപ്രധാന നിരീക്ഷണം. ഭര്‍ത്താവുമായി പിരിഞ്ഞു കഴിയുന്ന വിദേശ ഇന്ത്യക്കാരിയായ സ്ത്രീയാണ് കുട്ടിയുടെ അവകാശത്തിനായി കോടതിയെ സമീപിച്ചത്. എന്നാല്‍, ബന്ധുവായ ഒരാളുമായി ഇവര്‍ക്ക് വിവാഹേതര ബന്ധമുണ്ടെന്ന് ഭര്‍ത്താവ് ആരോപിച്ചു. തങ്ങള്‍ പിരിയാനുള്ള കാരണവും ഇതാണെന്ന് ഭര്‍ത്താവ് ചൂണ്ടിക്കാട്ടി.

എന്നാല്‍, ഭാര്യക്ക് വിവാഹേതര ബന്ധമുണ്ടെന്ന ഭര്‍ത്താവിന്റെ ആരോപണം അടിസ്ഥാനമില്ലാത്തതാണെന്ന് കോടതി നിരീക്ഷിച്ചു. അഥവാ, ഒരു സ്ത്രീക്ക് വിവാഹേതര ബന്ധമുണ്ടെങ്കില്‍ പോലും സ്വന്തം കുഞ്ഞിന്റെ സംരക്ഷണാവകാശം നിഷേധിക്കാനോ, അവര്‍ നല്ലൊരു അമ്മയല്ലെന്ന് പറയുവാനോ സാധിക്കില്ല എന്നും ജസ്റ്റിസ് അനുപീന്ദര്‍ സിങ് ഗ്രേവല്‍ വ്യക്തമാക്കി.

കുട്ടി കഴിഞ്ഞ ഒരു വര്‍ഷമായി പിതാവിനൊപ്പമായിരുന്നു കഴിഞ്ഞിരുന്നത്. താന്‍ മാതാപിതാക്കളോടൊപ്പമാണ് കഴിയുന്നതെന്നും, ഭാര്യ തനിച്ചാണ് കഴിയുന്നതെന്നും, കുടുംബാന്തരീക്ഷം മാറുന്നത് കുട്ടിയെ ബാധിക്കുമെന്നും ഭര്‍ത്താവ് വാദിച്ചെങ്കിലും കോടതി പരിഗണിച്ചില്ല.